ᠪᠡᠯᠭᠦᠨᠦᠳᠡᠢ ᠨ᠊᠂ ᠪᠦᠬᠡᠬᠠᠳᠠ | ᠦᠵᠦᠮᠦᠴᠢᠨ ᠮᠣᠩᠭᠤᠯᠴᠤᠳ ᠤᠨ ᠲᠥᠷᠥᠯ ᠰᠠᠳᠤᠨ ᠤ ᠲᠣᠭᠲᠠᠯᠴᠠᠭᠠ ᠨᠢ ᠮᠥᠨ ᠨᠡᠶᠢᠭᠡᠮ ᠬᠥᠭᠵᠢᠯ ᠤᠨ ᠤᠷᠤᠭ | ᠰᠠᠳᠤᠨ ᠤ ᠳᠦᠷᠢᠮ ᠤᠨ ᠬᠥᠭᠵᠢᠯᠲᠡ ᠶᠢ ᠳᠠᠭᠠᠯᠳᠤᠨ ᠨᠠᠷᠢᠰᠤᠨ ᠲᠡᠭᠦᠯᠳᠡᠷᠵᠢᠬᠦ ᠶᠢᠨ ᠬᠠᠮᠲᠤ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠢᠶᠠᠨ | ᠬᠠᠳᠠᠭᠠᠯᠠᠵᠤ ᠪᠠᠶᠢᠳᠠᠭ᠃ | | ᠴᠠᠭᠠᠨ ᠶᠠᠰᠤ᠂ ᠤᠯᠠᠭᠠᠨ ᠴᠢᠰᠤ ᠬᠡᠮᠡᠨ ᠬᠦᠨᠳᠦᠳᠬᠡᠵᠦ᠂ ᠶᠠᠰᠤ ᠴᠢᠰᠤᠨ ᠤ ᠲᠥᠷᠥᠯ ᠰᠠᠳᠤᠨ ᠢᠶᠠᠨ ᠡᠷᠬᠢᠮᠨᠡᠳᠡᠭ | ᠦᠵᠦᠮᠦᠴᠢᠨᠴᠤᠳ ᠴᠦ ᠪᠤᠰᠤᠳ ᠮᠣᠩᠭᠤᠯᠴᠤᠳ ᠲᠠᠢ ᠠᠳᠠᠯᠢ ᠪᠠᠷ ᠠᠯᠢ ᠡᠷᠲᠡᠨ ᠠᠴᠠ ᠦᠶᠡ ᠳᠠᠭᠤᠳᠠᠯᠭᠠ ᠪᠠᠨ | ᠳᠡᠭᠡᠭᠰᠢ ᠶᠢᠰᠦᠨ ᠦᠶᠡ᠂ ᠳᠣᠷᠣᠭᠰᠢ ᠶᠢᠰᠦᠨ ᠦᠶᠡ᠂ ᠪᠡᠶᠡ ᠶᠢᠨ ᠢᠵᠢᠯ ᠦᠶᠡ ᠲᠠᠢ ᠪᠠᠨ ᠠᠷᠪᠠᠨ ᠶᠢᠰᠦᠨ ᠦᠶᠡ ᠪᠠᠨ | ᠲᠣᠭᠲᠠᠭᠠᠨ ᠳᠠᠭᠤᠳᠠᠵᠤ ᠴᠢᠳᠠᠳᠠᠭ᠃ | | ᠦᠵᠦᠮᠦᠴᠢᠨᠴᠤᠳ ᠤᠨ ᠲᠥᠷᠥᠯ ᠰᠠᠳᠤᠨ ᠤ ᠲᠣᠭᠲᠠᠯᠴᠠᠭᠠ ᠨᠢ ᠶᠠᠰᠤᠨ ᠲᠥᠷᠥᠯ ᠢᠶᠠᠷ ᠲᠤᠯᠭᠠᠭᠤᠷᠢᠯᠠᠨ᠂ | ᠴᠢᠰᠤᠨ ᠲᠥᠷᠥᠯ ᠢ ᠲᠦᠰᠢᠯᠴᠡᠵᠦ᠂ ᠳᠠᠮ ᠰᠦᠯᠪᠡᠭᠡ ᠶᠢ ᠲᠠᠲᠠᠯᠴᠠᠭᠰᠠᠨ ᠲᠥᠷᠥᠯ ᠰᠠᠳᠤᠨ ᠤ ᠬᠤᠯᠪᠣᠭᠠ ᠶᠢᠨ ᠰᠠᠭᠤᠷᠢ | ᠳᠡᠭᠡᠷᠡ ᠲᠥᠷᠥᠯ — ᠰᠠᠳᠤᠨ — ᠰᠦᠯᠪᠡᠭᠡ ᠪᠠᠷ ᠭᠤᠷᠮᠤᠰᠤᠯᠠᠵᠤ ᠳᠡᠯᠭᠡᠷᠡᠩᠭᠦᠢ ᠰᠢᠭ ᠬᠡᠯᠡᠪᠡᠯ᠂ ᠡᠴᠢᠭᠡ ᠶᠢᠨ ᠰᠢᠰᠲ᠋ᠧᠮ | ᠤᠨ ᠨᠢᠭᠡ ᠣᠪᠣᠭ ᠤᠭᠰᠠᠭᠠ ᠶᠢᠨ ᠲᠥᠷᠥᠯ ᠢ ᠶᠠᠰᠤᠨ ᠲᠥᠷᠥᠯ᠂ ᠡᠬᠡ ᠶᠢᠨ ᠰᠢᠰᠲ᠋ᠧᠮ ᠤᠨ ᠨᠠᠭᠠᠴᠤ ᠨᠠᠷ ᠪᠣᠯᠣᠨ | ᠠᠪᠠᠭᠠ ᠡᠭᠡᠴᠢ᠂ ᠬᠦᠷᠭᠡᠳ ᠪᠠ ᠲᠡᠳᠡᠨ ᠤ ᠬᠡᠦᠬᠡᠳ ᠤᠳ ᠢ ᠲᠥᠷᠥᠯ ᠳᠤ ᠰᠢᠲᠦᠯᠴᠡᠬᠦ ᠰᠠᠳᠤᠨ — ᠳᠠᠷᠤᠢ ᠴᠢᠰᠤᠨ | ᠲᠥᠷᠥᠯ ᠭᠡᠵᠦ᠂ ᠡᠴᠢᠭᠡ ᠡᠬᠡ ᠶᠢᠨ ᠲᠥᠷᠥᠯ ᠰᠠᠳᠤᠨ ᠠᠴᠠ ᠵᠠᠶᠢᠳᠠᠭᠤᠬᠠᠨ ᠰᠢᠭ᠋ ᠥᠭᠡᠷᠡ ᠣᠪᠣᠭ ᠤᠨ ᠦᠷᠡ | ᠬᠠᠮᠢᠶᠠᠲᠠᠳ — ᠠᠪᠠᠭᠠ ᠡᠭᠡᠴᠢ ᠪᠠ ᠨᠠᠭᠠᠴᠤ ᠶᠢᠨ ᠭᠡᠷ ᠲᠤ ᠬᠤᠯᠪᠣᠭᠳᠠᠬᠤ ᠳᠠᠮ ᠰᠠᠳᠤᠨ ᠵᠢᠴᠢ ᠤᠷᠤᠭ ᠬᠤᠳᠠ᠂ | ᠬᠥᠨᠳᠡᠯᠡᠨ ᠤ ᠰᠠᠳᠤᠳ ᠢ ᠰᠦᠯᠪᠡᠭᠡ ᠭᠡᠳᠡᠭ᠃ ᠲᠥᠷᠥᠯ — ᠰᠠᠳᠤᠨ — ᠰᠦᠯᠪᠡᠭᠡ ᠪᠠᠷ ᠲᠣᠭᠲᠠᠯᠴᠠᠭᠰᠠᠨ ᠲᠥᠷᠥᠯ | ᠰᠠᠳᠤᠨ ᠤ ᠲᠣᠭᠲᠠᠯᠴᠠᠭᠠ ᠨᠢ ᠳᠠᠭᠤᠳᠠᠯᠭᠠ ᠪᠠᠷ ᠦᠶᠡ ᠪᠠᠨ ᠢᠯᠭᠠᠵᠤ᠂ ᠲᠤᠰ ᠲᠤᠰ ᠤᠨ ᠨᠢᠭᠡᠳᠦᠯᠲᠡᠢ ᠳᠦᠷᠢᠮᠵᠢᠭᠰᠡᠨ | ᠲᠤᠰᠬᠠᠢ ᠨᠡᠷᠡ ᠲᠣᠮᠢᠶᠠ ᠲᠠᠢ ᠪᠠᠶᠢᠵᠤ᠂ ᠳᠠᠭᠤᠳᠠᠯᠭᠠ ᠶᠢ ᠨᠢ ᠰᠣᠨᠣᠰᠤᠮᠠᠭᠴᠠ ᠬᠠᠷᠢᠴᠠᠭᠠ ᠶᠢ ᠨᠢ ᠲᠣᠳᠣ ᠮᠡᠳᠡᠴᠢᠬᠡᠳᠡᠭ | ᠲᠣᠳᠣᠷᠬᠠᠢ ᠣᠶᠢᠯᠠᠭᠠᠭᠳᠠᠬᠤᠨ ᠲᠠᠢ ᠪᠥᠭᠡᠳ ᠦᠶᠡ ᠳᠠᠭᠤᠳᠠᠯᠭᠠ ᠪᠠᠷ ᠬᠦᠨᠳᠦᠯᠡᠬᠦ᠂ ᠮᠡᠨᠳᠦᠴᠢᠯᠡᠬᠦ᠂ ᠠᠭᠴᠢᠯᠠᠬᠤ | ᠳᠡᠭᠦᠦᠴᠢᠯᠡᠬᠦ ᠶᠢᠨ ᠭᠡᠮ ᠬᠡᠮᠨᠡᠭᠦᠷ ᠪᠣᠯᠭᠠᠵᠤ ᠦᠶᠡ ᠳᠠᠭᠤᠳᠠᠯᠭᠠ ᠨᠢ ᠨᠡᠶᠢᠭᠡᠮ᠂ ᠰᠠᠳᠤᠨ ᠤ ᠶᠣᠰᠣ ᠮᠣᠷᠠᠯ ᠤᠨ ᠪᠠᠷᠢᠮᠵᠢᠶᠠ | ᠶᠢᠨ ᠡᠭᠦᠷᠭᠡ ᠶᠢ ᠭᠦᠢᠴᠡᠳᠬᠡᠵᠦ ᠪᠠᠶᠢᠳᠠᠭ ᠶᠤᠮ᠃ | ᠦᠵᠦᠮᠦᠴᠢᠨᠴᠤᠳ ᠤᠨ ᠳᠤᠮᠳᠠ᠂ ᠥᠨᠢ ᠤᠳᠠᠭᠠᠨ ᠢᠶᠠᠷ ᠬᠠᠳᠠᠭᠠᠯᠠᠭᠳᠠᠵᠤ ᠢᠷᠡᠭᠰᠡᠨ ᠦᠶᠡ ᠳᠠᠭᠤᠳᠠᠯᠭᠠ ᠶᠢᠨ | ᠰᠠᠶᠢᠨ ᠰᠠᠶᠢᠬᠠᠨ ᠤᠯᠠᠮᠵᠢᠯᠠᠯ ᠢ ᠬᠤᠶᠢᠴᠢ ᠦᠶᠡ ᠶᠢᠨ ᠬᠢᠨ ᠳᠡᠭᠡᠨ ᠵᠠᠯᠭᠠᠭᠤᠯᠵᠤ᠂ ᠲᠥᠷᠥᠯᠬᠢ ᠬᠡᠯᠡᠨ ᠤ ᠪᠠᠨ ᠥᠨᠢᠷ | ᠪᠠᠶᠠᠯᠢᠭ ᠦᠭᠡᠰ ᠤᠨ ᠰᠠᠩ ᠢ ᠠᠭᠤᠳᠠᠯᠤᠨ ᠠᠰᠢᠭᠯᠠᠬᠤ ᠵᠣᠷᠢᠯᠲᠠ ᠪᠠᠷ ︽ᠦᠵᠦᠮᠦᠴᠢᠨᠴᠤᠳ ᠤᠨ ᠦᠶᠡ ᠳᠠᠭᠤᠳᠠᠯᠭᠠ | ᠶᠢᠨ ᠶᠣᠰᠣᠨ︾ ᠢ ᠳᠦᠢᠮᠦᠴᠢᠯᠡᠨ ᠥᠭᠦᠯᠡᠬᠦ ᠪᠠᠷ ᠣᠷᠣᠯᠳᠤᠬᠤ ᠳᠠᠭᠠᠨ ᠪ᠊᠂ ᠸᠠᠩᠵᠢᠯ ᠭᠤᠸᠠᠢ ᠶᠢᠨ ︽ᠬᠥᠬᠡ ᠵᠤᠯᠠ︾ | ᠬᠡᠮᠡᠬᠦ ᠨᠠᠨᠳᠢᠨ ᠲᠣᠯᠢ ᠳᠤ ᠲᠣᠯᠳᠤᠶᠢᠳᠤᠨ᠂ ᠦᠵᠦᠮᠦᠴᠢᠨᠴᠣᠳ ᠤᠨ ᠵᠠᠩ ᠵᠠᠩᠰᠢᠯ ᠲᠠᠢ ᠤᠶᠠᠯᠳᠤᠭᠤᠯᠵᠤ ᠦᠶᠡ | ᠳᠠᠭᠤᠳᠠᠯᠭᠠ ᠶᠢᠨ ᠲᠤᠬᠠᠢ ᠣᠶᠢᠯᠠᠭᠠᠭᠳᠠᠬᠤᠨ ᠪᠠᠯᠠᠷᠬᠠᠢ ᠪᠠᠭᠠᠴᠤᠳ ᠲᠤ ᠲᠤᠰᠠᠯᠠᠮᠵᠢ ᠪᠣᠯᠭᠠᠬᠤ ᠪᠠᠷ ᠰᠠᠨᠠᠭᠠᠰᠢᠷᠠᠭᠰᠠᠨ | ᠢᠶᠠᠨ ᠴᠠᠭᠠᠷᠠᠭᠤᠯᠬᠤ ᠶᠢᠨ ᠳᠠᠯᠢᠮ ᠳᠤ᠂ ᠣᠰᠣᠯᠳᠠᠵᠤ ᠴᠠᠯᠠᠭᠠᠶᠢᠳᠠᠭᠰᠠᠨ ᠵᠦᠢᠯ ᠣᠯᠠᠨ ᠪᠠᠶᠢᠬᠤ ᠶᠢ ᠤᠩᠰᠢᠭᠴᠢ᠂ | ᠰᠤᠳᠤᠯᠤᠭᠴᠢ ᠮᠡᠷᠭᠡᠳ ᠠᠴᠠ ᠵᠢᠭᠠᠨ ᠵᠠᠯᠠᠷᠠᠭᠤᠯᠬᠤ ᠶᠢ ᠴᠢᠩ ᠦᠨᠡᠨᠴᠢ ᠪᠠᠷ ᠬᠦᠰᠡᠮᠵᠢᠯᠡᠵᠦ ᠠᠮᠤᠢ᠃ | | ᠡᠴᠢᠭᠡ ᠶᠢᠨ ᠲᠠᠯᠠ ᠶᠢᠨ ᠲᠥᠷᠥᠯ ᠤᠨ ᠳᠠᠭᠤᠳᠠᠯᠭᠠ — ᠡᠴᠢᠭᠡ ᠶᠢᠨ ᠲᠠᠯᠠ ᠶᠢᠨ ᠲᠥᠷᠥᠯ ᠤᠨ ᠳᠠᠭᠤᠳᠠᠯᠭᠠ ᠨᠢ | ᠡᠴᠢᠭᠡ ᠪᠠᠷ ᠡᠰᠢᠯᠡᠵᠦ᠂ ᠥᠪᠡᠷ ᠢ ᠡᠭᠦᠳᠦᠭᠰᠡᠨ ᠡᠷᠡᠭᠲᠡᠢ ᠬᠥᠮᠥᠨ ᠢ ᠡᠴᠢᠭᠡ ᠪᠤᠶᠤ ᠠᠪᠤ ᠭᠡᠳᠡᠭ᠃ ᠥᠪᠡᠷ ᠢ ᠡᠭᠦᠳᠦᠭᠰᠡᠨ | ᠡᠮᠡᠭᠲᠡᠢ ᠬᠥᠮᠥᠨ ᠢ ᠡᠬᠡ ᠪᠤᠶᠤ ᠡᠵᠢ ᠭᠡᠨᠡ᠃ ᠡᠨᠡ ᠮᠡᠲᠦ ᠪᠠᠷ ᠡᠴᠢᠭᠡ ᠶᠢᠨ ᠢᠶᠠᠨ ᠡᠴᠢᠭᠡ ᠶᠢ ᠡᠪᠦᠭᠡ ᠪᠤᠶᠤ ᠡᠪᠦᠭᠡ ᠠᠪᠤ | ᠂ ᠡᠴᠢᠭᠡ ᠶᠢᠨ ᠡᠬᠡ ᠶᠢ ᠡᠮᠡᠭᠡ ᠪᠤᠶᠤ ᠡᠮᠡᠭᠡ ᠡᠵᠢ ᠭᠡᠵᠦ᠂ ᠡᠴᠢᠭᠡ ᠶᠢᠨ ᠡᠪᠦᠭᠡ ᠶᠢ ᠡᠯᠦᠨᠴᠡ᠂ ᠡᠪᠦᠭᠡ ᠶᠢᠨ ᠡᠪᠦᠭᠡ ᠶᠢ | ᠨᠢ ᠬᠤᠯᠤᠨᠴᠠ ᠡᠪᠦᠭᠡ ᠭᠡᠵᠦ᠂ ᠡᠯᠦᠨᠴᠡ ᠡᠪᠦᠭᠡ ᠶᠢᠨ ᠡᠪᠦᠭᠡ ᠶᠢ ᠨᠢ ᠡᠯᠦᠨ ᠡᠪᠦᠭᠡ᠂ ᠬᠤᠯᠤᠨᠴᠠ ᠡᠪᠦᠭᠡ ᠶᠢᠨ ᠡᠪᠦᠭᠡ | ᠶᠢ ᠬᠤᠯᠤᠨ ᠡᠪᠦᠭᠡ᠂ ᠡᠯᠦᠨ ᠡᠪᠦᠭᠡ ᠶᠢᠨ ᠡᠪᠦᠭᠡ ᠶᠢ ᠬᠤᠯᠪᠣᠭᠠ ᠡᠪᠦᠭᠡ᠂ ᠬᠤᠯᠤᠨ ᠡᠪᠦᠭᠡ ᠶᠢᠨ ᠡᠪᠦᠭᠡ ᠶᠢ ᠥᠨᠳᠥᠷ | ᠡᠪᠦᠭᠡ᠂ ᠥᠨᠳᠥᠷ ᠡᠪᠦᠭᠡ ᠠᠴᠠ ᠳᠡᠭᠡᠭᠰᠢᠬᠢ ᠳᠡᠭᠡᠳᠦ ᠦᠶᠡ ᠶᠢᠨ ᠬᠢᠨ ᠢ ᠡᠪᠦᠭᠡ ᠳᠡᠭᠡᠳᠦᠰ ᠭᠡᠳᠡᠭ᠃ | | ᠡᠴᠢᠭᠡ — ᠡᠪᠦᠭᠡ — ᠡᠯᠦᠨᠴᠡ — ᠬᠤᠯᠤᠨᠴᠠ — ᠡᠯᠦᠨ — ᠬᠤᠯᠤᠨ — ᠬᠤᠯᠪᠣᠭᠠ — ᠥᠨᠳᠥᠷ ᠡᠪᠦᠭᠡ | ᠬᠦᠷᠲᠡᠯᠡ ᠪᠡᠶᠡ ᠠᠴᠠ ᠳᠡᠭᠡᠭᠰᠢ ᠨᠠᠢᠮᠠᠨ ᠦᠶᠡ ᠶᠢᠨ ᠡᠴᠢᠭᠡ᠂ ᠡᠬᠡ᠂ ᠡᠪᠦᠭᠡ ᠡᠮᠡᠭᠡ ᠭᠡᠬᠦ ᠳᠠᠭᠤᠳᠠᠯᠭᠠ ᠨᠢ ᠲᠥᠷᠥᠭᠰᠡᠨ | ᠡᠴᠢᠭᠡ ᠡᠬᠡ᠂ ᠡᠪᠦᠭᠡ ᠡᠮᠡᠭᠡ ᠠᠴᠠ ᠭᠠᠳᠠᠨᠠ ᠬᠠᠳᠠᠮ᠂ ᠬᠤᠶᠢᠲᠤ ᠡᠷᠭᠦᠭᠰᠡᠨ ︵ᠲᠡᠵᠢᠭᠡᠭᠰᠡᠨ︶᠂ ᠮᠥᠷᠭᠦᠭᠦᠯᠦᠭᠰᠡᠨ᠂ | ᠭᠦᠬᠦᠯᠲᠦ᠂ ᠰᠢᠷᠭᠤᠭᠤᠯᠤᠭᠰᠠᠨ ︵ᠲᠠᠨᠢᠭᠤᠯᠤᠭᠰᠠᠨ ᠪᠤᠶᠤ ᠬᠠᠭᠤᠷᠠᠢ︶ ᠭᠡᠬᠦ ᠤᠬᠠᠭᠳᠠᠬᠤᠨ ᠢ ᠪᠠᠭᠲᠠᠭᠠᠵᠤ ᠦᠶᠡ | ᠠᠬᠢᠭᠤᠯᠤᠨ ᠳᠠᠭᠤᠳᠠᠳᠠᠭ ᠶᠣᠰᠣ ᠲᠠᠢ᠃ | | ᠪᠡᠶᠡ ᠠᠴᠠ ᠳᠣᠷᠤᠭᠰᠢᠬᠢ ᠦᠶᠡ ᠶᠢᠨ ᠲᠥᠷᠥᠯ ᠤᠨ ᠳᠠᠭᠤᠳᠠᠯᠭᠠ — ᠪᠡᠶᠡ ᠭᠡᠳᠡᠭ ᠨᠢ ᠳᠡᠭᠡᠭᠰᠢ ᠳᠣᠷᠣᠭᠰᠢ | ᠠᠷᠪᠠ ᠶᠢᠰᠦᠨ ᠦᠶᠡ ᠶᠢᠨ ᠲᠡᠭ ᠳᠤᠮᠳᠠᠬᠢ ᠦᠶᠡ᠂ ᠳᠠᠷᠤᠢ ᠥᠪᠡᠷ ᠢ ᠨᠢ ᠵᠢᠭᠠᠵᠤ ᠪᠣᠢ᠃ ᠪᠡᠶᠡ ᠲᠠᠢ ᠬᠠᠤᠯᠢ ᠶᠣᠰᠣ ᠪᠠᠷ | ᠬᠤᠷᠢᠮᠯᠠᠭᠰᠠᠨ ᠪᠤᠰᠤᠳ ᠣᠪᠣᠭ ᠤᠨ ᠡᠮᠡᠭᠲᠡᠢ ᠶᠢ ᠡᠬᠡᠨᠡᠷ ᠭᠡᠳᠡᠭ᠃ ᠦᠵᠦᠮᠦᠴᠢᠨ ᠳᠤ ᠡᠷᠡᠭᠲᠡᠢ ᠨᠢ ᠪᠠᠭᠤᠯᠭᠠᠭᠰᠠᠨ ᠭᠡᠷᠭᠡᠢ | ᠪᠠᠨ ᠪᠡᠷᠢ ᠭᠡᠬᠦ ᠦᠭᠡᠢ ᠡᠬᠡᠨᠡᠷ ᠭᠡᠵᠦ ᠳᠠᠭᠤᠳᠠᠵᠤ᠂ ᠳᠡᠭᠡᠳᠦ ᠦᠶᠡ ᠶᠢᠨ ᠬᠥᠮᠥᠰ ᠨᠢ ︽ᠬᠦᠦ ᠪᠡᠷᠢ︾᠂ ︽ᠠᠴᠢ ᠪᠡᠷᠢ︾ | ᠂ ︽ᠵᠢᠴᠢ ᠪᠡᠷᠢ︾ ᠭᠡᠬᠦ ᠮᠡᠲᠦ ᠪᠠᠷ ᠪᠡᠷᠢᠯᠡᠨ ᠳᠠᠭᠤᠳᠠᠳᠠᠭ ᠵᠠᠩᠰᠢᠯ ᠲᠠᠢ᠃ | | ᠪᠡᠶᠡ ᠠᠴᠠ ᠲᠥᠷᠥᠭᠰᠡᠨ ᠬᠡᠦᠬᠡᠳ ᠤᠨ ᠡᠷᠡᠭᠲᠡᠢ ᠶᠢ ᠬᠦᠦ᠂ ᠡᠮᠡᠭᠲᠡᠢ ᠶᠢ ᠥᠬᠢᠨ ᠭᠡᠨᠡ᠃ ᠬᠦᠦ ᠶᠢᠨ ᠬᠠᠤᠯᠢ | ᠶᠣᠰᠣᠭᠠᠷ ᠬᠤᠷᠢᠮᠯᠠᠵᠤ ᠠᠪᠤᠭᠰᠠᠨ ᠪᠤᠰᠤᠳ ᠣᠪᠣᠭ ᠤᠨ ᠡᠮᠡᠭᠲᠡᠢ ᠶᠢ ᠬᠦᠦ ᠪᠡᠷᠢ ᠭᠡᠨᠡ᠃ ᠬᠦᠦ ᠶᠢᠨ ᠬᠡᠦᠬᠡᠳ ᠢ ᠠᠴᠢ᠂ | ᠠᠴᠢ ᠶᠢᠨ ᠬᠡᠦᠬᠡᠳ ᠢ ᠵᠢᠴᠢ᠂ ᠵᠢᠴᠢ ᠶᠢᠨ ᠬᠡᠦᠬᠡᠳ ᠢ ᠭᠤᠴᠢ᠂ ᠭᠤᠴᠢ ᠶᠢᠨ ᠬᠡᠦᠬᠡᠳ ᠢ ᠭᠤᠴᠢᠨᠴᠢᠷ᠂ ᠭᠤᠴᠢᠨᠴᠢᠷ | ᠤᠨ ᠬᠡᠦᠬᠡᠳ ᠢ ᠵᠢᠬᠦ᠂ ᠵᠢᠬᠦ ᠶᠢᠨ ᠬᠡᠦᠬᠡᠳ ᠢ ᠵᠢᠯᠢᠭᠦᠢ᠂ ᠵᠢᠯᠢᠭᠦᠢ ᠶᠢᠨ ᠬᠡᠦᠬᠡᠳ ᠢ ᠳᠠᠯᠠᠶᠢᠬᠦᠢ ᠭᠡᠨᠡ᠃ | | ᠪᠡᠶᠡ ᠠᠴᠠ ᠬᠥᠨᠳᠡᠯᠡᠨ ᠦᠶᠡ ᠶᠢᠨ ᠲᠥᠷᠥᠯ ᠤᠨ ᠳᠠᠭᠤᠳᠠᠯᠭᠠ — ᠪᠡᠶᠡ ᠶᠢᠨ ᠨᠢᠭᠡ ᠡᠬᠡ ᠠᠴᠠ ᠲᠥᠷᠥᠭᠰᠡᠨ | ᠡᠰᠡᠬᠦᠯᠡ ᠡᠴᠢᠭᠡ ᠨᠢᠭᠡᠲᠡᠢ ᠡᠬᠡ ᠥᠭᠡᠷᠡ᠂ ᠪᠡᠶᠡ ᠠᠴᠠ ᠨᠠᠰᠤ ᠪᠠᠷ ᠶᠡᠭᠡ ᠡᠷᠡᠭᠲᠡᠢ ᠬᠥᠮᠥᠨ ᠢ ᠠᠬᠠ᠂ ᠡᠮᠡᠭᠲᠡᠢ ᠬᠥᠮᠥᠨ ᠢ | ᠡᠭᠡᠴᠢ ᠭᠡᠨᠡ᠃ ᠡᠴᠢᠭᠡ ᠡᠬᠡ ᠨᠢᠭᠡᠲᠡᠢ ᠶᠢ ᠨᠢ ᠲᠥᠷᠥᠭᠰᠡᠨ ᠠᠬᠠ ᠡᠭᠡᠴᠢ ᠭᠡᠳᠡᠭ᠃ ᠠᠬᠠ ᠡᠭᠡᠴᠢ ᠳᠠᠭᠤᠳᠠᠯᠭᠠ ᠳᠤ | ᠬᠦᠷᠭᠡᠨ ᠠᠬᠠ᠂ ᠬᠠᠳᠠᠮ ᠠᠬᠠ ᠡᠭᠡᠴᠢ᠂ ᠵᠢᠷᠤᠮ ᠤᠨ ᠠᠬᠠ ᠡᠭᠡᠴᠢ᠂ ᠠᠶᠢᠯ ᠠᠶᠢᠮᠠᠭ ᠤᠨ ᠠᠬᠠ ᠡᠭᠡᠴᠢ ᠭᠡᠬᠦ ᠠᠭᠤᠯᠭᠠ | ᠴᠦ ᠪᠠᠭᠲᠠᠨᠠ᠃ | | ᠠᠬᠠ ᠶᠢᠨ ᠪᠦᠰᠡᠭᠦᠢ ᠶᠢ ᠪᠡᠷᠭᠡᠨ ᠭᠡᠳᠡᠭ᠃ ᠪᠡᠷᠭᠡᠨ ᠭᠡᠳᠡᠭ ᠦᠭᠡ ᠨᠢ ᠠᠬᠠ ᠶᠢᠨ ᠪᠦᠰᠡᠭᠦᠢ ᠭᠡᠰᠡᠨ ᠭᠤᠣᠯ | ᠤᠳᠬᠠ ᠠᠴᠠ ᠭᠠᠳᠠᠨᠠ᠂ ᠪᠡᠶᠡ ᠦᠶᠡ ᠠᠴᠠ ᠳᠡᠭᠡᠭᠰᠢᠬᠢ ᠣᠯᠠᠨ ᠦᠶᠡ ᠶᠢᠨ ᠪᠤᠰᠤᠳ ᠣᠪᠣᠭ ᠠᠴᠠ ᠪᠠᠭᠤᠯᠭᠠᠨ | ᠠᠪᠤᠭᠰᠠᠨ ᠬᠥᠨᠳᠡᠯᠡᠨ ᠦᠶᠡ ᠶᠢᠨ ᠡᠮᠡᠭᠲᠡᠶᠢᠴᠦᠳ ᠤᠨ ᠨᠡᠶᠢᠲᠡ ᠳᠤᠮᠳᠠ ᠶᠢᠨ ᠳᠠᠭᠤᠳᠠᠯᠭᠠ ᠪᠣᠯᠣᠨᠠ᠃ ᠵᠢᠱᠢᠶᠡᠯᠡᠪᠡᠯ | ᠪᠡᠷᠭᠡᠨ ︵ᠠᠬᠠ ᠶᠢᠨ ᠪᠦᠰᠡᠭᠦᠢ︶᠂ ᠠᠪᠠᠭᠠ ᠪᠡᠷᠭᠡᠨ ︵ᠡᠴᠢᠭᠡ ᠶᠢᠨ ᠠᠬᠠ ᠳᠡᠭᠦᠦ ᠶᠢᠨ ᠪᠦᠰᠡᠭᠦᠢ︶᠂ ᠠᠪᠠᠭᠠ ᠪᠡᠷᠭᠡᠨ | ᠡᠬᠡ ︽ᠡᠪᠦᠭᠡ ᠶᠢᠨ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠪᠦᠰᠡᠭᠦᠢ ᠶᠢ ᠳᠥᠭᠦᠮᠴᠢᠯᠡᠭᠡᠳ ᠠᠪᠠᠭᠠ ᠡᠬᠡ ᠪᠤᠶᠤ ᠠᠪᠠᠭᠠ ᠡᠵᠢ ᠴᠦ | ᠭᠡᠳᠡᠭ︾ ᠭᠡᠬᠦ ᠮᠡᠲᠦ᠃ | | ᠪᠡᠶᠡ ᠶᠢᠨ ᠡᠴᠢᠭᠡ ᠯᠦᠭᠡ ᠬᠡᠪᠡᠯᠢ ᠨᠢᠭᠡᠲᠡᠢ ᠬᠡᠬᠡᠢ ᠭᠠᠭᠴᠠᠳᠠᠨ ᠠᠬᠠ ᠳᠡᠭᠦᠦ ᠶᠢᠨ ᠡᠷᠡᠭᠲᠡᠢ ᠶᠢ ᠠᠪᠠᠭᠠ᠂ ᠡᠮᠡᠭᠲᠡᠢ | ᠶᠢ ᠠᠪᠠᠭᠠ ᠡᠭᠡᠴᠢ ᠭᠡᠵᠦ ᠳᠠᠭᠤᠳᠠᠳᠠᠭ᠃ ᠠᠪᠠᠭᠠ ᠭᠡᠳᠡᠭ ᠦᠭᠡᠨ ᠳᠤ ᠡᠴᠢᠭᠡ ᠲᠠᠢ ᠨᠢᠭᠡ ᠦᠶᠡ ᠶᠢ ᠵᠢᠭᠠᠭᠰᠠᠨ | ᠥᠪᠡᠷᠮᠢᠴᠡ ᠤᠳᠬᠠ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠳᠠᠭ ᠶᠤᠮ᠃ ᠵᠢᠱᠢᠶᠡᠯᠡᠪᠡᠯ ᠶᠡᠭᠡ ᠠᠪᠠᠭᠠ ᠡᠴᠢᠭᠡ᠂ ᠶᠡᠭᠡ ᠠᠪᠠᠭᠠ ᠪᠡᠷᠭᠡᠨ | ᠲᠠᠢ ᠢᠷᠠᠯᠠ ᠭᠡᠪᠡᠯ᠂ ᠡᠪᠦᠭᠡ ᠶᠢᠨ ᠠᠬᠠ ᠪᠦᠰᠡᠭᠦᠢ ᠲᠠᠢ ᠪᠠᠨ ᠬᠠᠮᠲᠤ ᠢᠷᠠᠪᠠ ᠭᠡᠵᠦ ᠣᠶᠢᠯᠭᠠᠬᠤ᠂ ᠪᠠᠭᠠ ᠠᠪᠠᠭᠠ | ᠡᠴᠢᠭᠡ ᠢᠷᠠᠯᠠ ᠭᠡᠪᠡᠯ᠂ ᠡᠪᠦᠭᠡ ᠶᠢᠨ ᠳᠡᠭᠦᠦ ᠢᠷᠠᠵᠤ ᠪᠠᠶᠢᠨᠠ ᠭᠡᠵᠦ ᠮᠡᠳᠡᠬᠦ᠃ ᠡᠭᠦᠨ ᠳᠤ ᠠᠪᠠᠭᠠ ᠭᠡᠳᠡᠭ ᠳᠡᠭᠡᠷᠡ ᠨᠢᠭᠡ | ᠦᠶᠡ ᠶᠢ ᠵᠢᠭᠠᠭᠰᠠᠨ ᠦᠭᠡᠨ ᠳᠤ ᠡᠴᠢᠭᠡ ᠭᠡᠳᠡᠭ ᠮᠥᠨ ᠬᠦ ᠳᠡᠭᠡᠷᠡ ᠨᠢᠭᠡ ᠦᠶᠡ ᠶᠢ ᠵᠢᠭᠠᠭᠰᠠᠨ ᠦᠭᠡ ᠶᠢ ᠨᠡᠮᠡᠵᠦ᠂ | ᠳᠡᠭᠡᠷᠡ ᠬᠤᠶᠠᠷ ᠦᠶᠡ ᠶᠢᠨ ᠬᠥᠮᠥᠨ ᠤ ᠬᠥᠨᠳᠡᠯᠡᠨ ᠬᠠᠷᠢᠴᠠᠭᠠ ᠶᠢᠨ ᠳᠠᠭᠤᠳᠠᠯᠭᠠ ᠶᠢ ᠪᠦᠲᠦᠭᠡᠭᠰᠡᠨ ᠶᠤᠮ᠃ ᠡᠶᠢᠨ ᠬᠦ | ᠠᠪᠠᠭᠠ ᠭᠡᠳᠡᠭ ᠦᠭᠡ ᠲᠠᠢ ᠬᠤᠯᠪᠣᠭᠠ ᠦᠭᠡ ᠪᠦᠲᠦᠭᠡᠭᠰᠡᠨ ᠡᠴᠢᠭᠡ ᠠᠴᠠ ᠳᠡᠭᠡᠭᠰᠢᠬᠢ ᠦᠶᠡ ᠨᠢᠭᠡ ᠪᠦᠷᠢ ᠶᠢᠨ ᠨᠡᠷᠡ᠂ | ᠪᠦᠷ ᠨᠢᠭᠡ ᠦᠶᠡ ᠠᠬᠢᠵᠤ ᠳᠠᠭᠤᠳᠠᠭᠳᠠᠨᠠ᠃ ᠵᠢᠱᠢᠶᠡᠯᠡᠪᠡᠯ᠂ ᠠᠪᠠᠭᠠ ᠡᠪᠦᠭᠡ ︵ᠡᠯᠦᠨᠴᠡ ᠶᠢᠨ ᠠᠬᠠ ᠳᠡᠭᠦᠦ︶᠂ | ᠠᠪᠠᠭᠠ ᠡᠯᠦᠨᠴᠡ ︵ᠬᠤᠯᠤᠨᠴᠠ ᠶᠢᠨ ᠠᠬᠠ ᠪᠤᠶᠤ ᠳᠡᠭᠦᠦ︶ ᠭᠡᠬᠦ ᠮᠡᠲᠦ᠃ | | ᠦᠵᠦᠮᠦᠴᠢᠨᠴᠤᠳ᠂ ᠡᠷᠲᠡᠨ ᠠᠴᠠ ᠪᠠᠨ ᠦᠶᠡ ᠳᠠᠭᠤᠳᠠᠯᠭᠠ ᠶᠢ ᠮᠠᠰᠢ ᠠᠩᠬᠠᠷᠳᠠᠭ ᠪᠠᠶᠢᠪᠠ᠃ ᠵᠢᠱᠢᠶᠡᠯᠡᠪᠡᠯ᠂ | ᠠᠪᠠᠭᠠ ᠡᠭᠡᠴᠢ ᠲᠠᠢ ᠬᠤᠷᠢᠮᠯᠠᠭᠰᠠᠨ ᠡᠷᠡᠭᠲᠡᠢ ᠬᠥᠮᠥᠨ ᠢ ᠠᠪᠠᠭᠠ ᠬᠦᠷᠭᠡᠨ ᠠᠬᠠ ᠭᠡᠵᠦ ᠳᠠᠭᠤᠳᠠᠬᠤ ᠠᠴᠠ ᠪᠢᠰᠢ ᠠᠪᠠᠭᠠ | ᠬᠦᠷᠭᠡᠨ ᠠᠪᠤ ᠭᠡᠵᠦ ᠳᠠᠭᠤᠳᠠᠳᠠᠭ ᠦᠭᠡᠢ᠃ ᠣᠳᠣ ᠡᠨᠡᠬᠦ ᠵᠠᠩᠰᠢᠯ ᠮᠠᠷᠲᠠᠭᠳᠠᠵᠤ ᠠᠪᠠᠭᠠ ︵ᠡᠴᠢᠭᠡ ᠶᠢᠨ ᠠᠬᠠ ᠳᠡᠭᠦᠦ︶ | ᠪᠠᠨ ︽ᠠᠪᠠᠭᠠ ᠠᠪᠤ︾᠂ ᠠᠪᠠᠭᠠ ᠡᠭᠡᠴᠢ ᠪᠠᠨ ︽ᠠᠪᠠᠭᠠ ᠡᠵᠢ︾ ᠭᠡᠵᠦ ᠳᠠᠭᠤᠳᠠᠬᠤ ᠨᠢ ᠣᠯᠠᠨ ᠰᠣᠨᠣᠰᠳᠠᠵᠤ ᠪᠣᠢ᠃ | ᠣᠨᠴᠠᠭᠠᠶᠢᠯᠠᠨ ᠥᠭᠡᠷᠡ ᠣᠪᠣᠭ ᠲᠤ ᠬᠠᠷᠢᠯᠠᠵᠤ ᠮᠣᠷᠳᠠᠭᠰᠠᠨ ᠲᠤᠰ ᠪᠠᠭᠤᠴᠠᠨ ᠤ ᠪᠦᠰᠡᠭᠦᠶᠢᠴᠦᠳ ᠢ ᠨᠠᠰᠤ ᠨᠢ ᠬᠡᠳᠦᠢ | ᠶᠡᠭᠡ ᠦᠶᠡ ᠨᠢ ᠬᠡᠳᠦᠢ ᠳᠡᠭᠡᠷᠡ ᠪᠠᠶᠢᠭᠰᠠᠨ ᠴᠦ ᠡᠵᠢ ᠭᠡᠵᠦ ᠳᠠᠭᠤᠳᠠᠳᠠᠭ ᠦᠭᠡᠢ᠂ ᠴᠥᠮ ᠡᠭᠡᠴᠢ ᠪᠠᠷ ᠬᠠᠨᠳᠤᠵᠤ | ᠠᠪᠠᠭᠠ ᠡᠭᠡᠴᠢ᠂ ᠠᠪᠠᠭᠠ ᠡᠪᠦᠭᠡ ᠡᠭᠡᠴᠢ᠂ ᠠᠪᠠᠭᠠ ᠡᠯᠦᠨᠴᠡ ᠡᠭᠡᠴᠢ ᠭᠡᠵᠦ ᠦᠶᠡ ᠶᠢ ᠲᠣᠳᠣᠳᠬᠠᠨ ᠳᠠᠭᠤᠳᠠᠳᠠᠭ | ᠶᠣᠰᠣ ᠪᠣᠯ ᠵᠢᠷᠤᠮᠯᠠᠭᠤᠰᠢᠲᠠᠢ ᠵᠠᠩᠰᠢᠯ ᠪᠣᠯᠬᠤ ᠶᠤᠮ᠃ ᠤᠴᠢᠷ ᠨᠢ ᠲᠤᠰ ᠣᠪᠣᠭ ᠤᠨ ᠬᠠᠷᠢ ᠳᠤ ᠮᠣᠷᠳᠠᠭᠰᠠᠨ | ᠪᠦᠰᠡᠭᠦᠶᠢᠴᠦᠳ ᠡᠨᠡ ᠭᠡᠷ ᠲᠥᠷᠥᠯ ᠳᠡᠭᠡᠨ ᠡᠬᠡ ᠪᠤᠶᠤ ︵ᠡᠵᠢ︶ ᠪᠣᠯᠬᠤ ᠶᠣᠰᠣ ᠦᠭᠡᠢ᠂ ᠥᠨᠢ ᠡᠭᠦᠷᠢᠳᠡ ᠡᠨᠡ | ᠪᠠᠭᠤᠴᠠ ᠶᠢᠨ ᠥᠬᠢᠨ ᠪᠣᠯᠬᠤ ᠠᠴᠠ ᠡᠭᠡᠴᠢ ᠳᠠᠭᠤᠳᠠᠭᠳᠠᠬᠤ ᠤᠴᠢᠷᠲᠠᠢ ᠠᠵᠤᠭᠤ᠃ | | ᠠᠪᠠᠭᠠ ᠳᠠᠭᠤᠳᠠᠯᠭᠠ ᠨᠢ᠂ ᠠᠪᠠᠭᠠ — ᠠᠪᠠᠭᠠ ᠪᠡᠷᠭᠡᠨ᠂ ᠠᠪᠠᠭᠠ ᠡᠴᠢᠭᠡ — ᠠᠪᠠᠭᠠ ᠡᠬᠡ᠂ ᠠᠪᠠᠭᠠ ᠡᠪᠦᠭᠡ | — ᠠᠪᠠᠭᠠ ᠡᠮᠡᠭᠡ᠂ ᠠᠪᠠᠭᠠ ᠡᠯᠦᠨᠴᠡ ᠡᠪᠦᠭᠡ — ᠠᠪᠠᠭᠠ ᠡᠯᠦᠨᠴᠡ ᠡᠮᠡᠭᠡ᠂ ᠠᠪᠠᠭᠠ ᠬᠤᠯᠤᠨᠴᠠ ᠡᠪᠦᠭᠡ — ᠠᠪᠠᠭᠠ | ᠬᠤᠯᠤᠨᠴᠠ ᠡᠮᠡᠭᠡ ᠭᠡᠬᠦ ᠮᠡᠲᠦ ᠪᠠᠷ ᠦᠶᠡ ᠠᠬᠢᠵᠤ ᠠᠪᠠᠭᠠ ᠥᠨᠳᠥᠷ ᠡᠪᠦᠭᠡ ᠡᠮᠡᠭᠡ ᠳᠤ ᠬᠦᠷᠲᠡᠯᠡ ᠳᠠᠭᠤᠳᠠᠵᠤ ᠪᠣᠯᠳᠠᠭ | ᠶᠤᠮ᠃ | | ᠡᠬᠡ ᠶᠢᠨ ᠲᠠᠯᠠ ᠶᠢᠨ ᠲᠥᠷᠥᠯ ᠤᠨ ᠳᠠᠭᠤᠳᠠᠯᠭᠠ — ᠦᠵᠦᠮᠦᠴᠢᠨᠴᠤᠳ ︽ᠬᠥᠮᠥᠨ ᠤ ᠦᠨᠳᠦᠰᠦ ᠨᠠᠭᠠᠴᠤ︾᠂ | ︽ᠨᠠᠭᠠᠴᠤ ᠶᠢᠨ ᠰᠢᠷᠠ ᠨᠣᠬᠠᠢ ᠨᠢ ᠴᠦ ᠠᠬᠠᠯᠠᠨᠠ︾ ᠭᠡᠵᠦ ᠡᠬᠡ ᠶᠢᠨ ᠲᠠᠯᠠ ᠶᠢᠨ ᠰᠠᠳᠤᠨ ᠲᠥᠷᠥᠯ ᠢ ᠬᠦᠨᠳᠦᠳᠬᠡᠵᠦ᠂ | ᠰᠠᠶ᠋ᠢ ᠭᠠᠷᠤᠭᠰᠠᠨ ᠵᠢᠭᠡ ᠶᠢ ᠨᠢ ᠨᠠᠭᠠᠴᠤ ᠶᠢᠨ ᠳᠤᠨᠢ ᠵᠢᠭᠡ ᠪᠠᠭᠤᠯᠭᠠᠬᠤ᠂ ᠵᠢᠭᠡ ᠬᠥᠮᠥᠨ ᠨᠠᠭᠠᠴᠤ ᠶᠢᠨ ᠳᠡᠷᠭᠡᠳᠡ ᠳᠠᠯᠤ | ᠥᠯᠥ ᠪᠠᠷᠢᠬᠤ᠂ ᠨᠠᠭᠠᠴᠤ ᠶᠢᠨ ᠭᠡᠷ ᠤᠨ ᠡᠭᠦᠳᠡᠨ ᠳᠤ ᠥᠯᠥ ᠰᠠᠭᠤᠬᠤ᠂ ᠪᠣᠱᠤᠭᠠ ᠶᠢ ᠥᠯᠥ ᠤᠨᠤᠬᠤ᠂ ︽ᠨᠠᠭᠠᠴᠤ | ᠪᠠᠨ ᠵᠣᠳᠣᠪᠠᠯ ᠴᠡᠴᠡᠷᠡᠭᠡ ᠪᠣᠯᠳᠠᠭ︾ ᠭᠡᠬᠦ ᠴᠡᠭᠡᠷ ᠶᠣᠰᠣ ᠪᠠᠶᠢᠳᠠᠭ ᠪᠠ ᠵᠢᠯ ᠴᠠᠭᠠᠨ ᠰᠠᠷᠠ ᠳᠤ ᠨᠠᠭᠠᠴᠤ ᠶᠢᠨ ᠬᠢᠨᠢ ᠵᠢᠭᠡ | ᠳᠡᠭᠡᠨ ︽ᠵᠢᠭᠡ ᠰᠦᠪᠡᠭᠡ︾ ᠭᠡᠵᠦ ᠭᠠᠳᠠᠷᠲᠠᠢ ᠰᠦᠪᠡᠭᠡ ᠬᠠᠪᠢᠰᠤ ᠡᠪᠦᠷᠯᠡᠭᠦᠯᠳᠡᠭ ᠵᠠᠩᠰᠢᠯ ᠲᠠᠢ ᠪᠢᠯᠡ᠃ | | ᠨᠠᠭᠠᠴᠤ ᠭᠡᠳᠡᠭ ᠦᠭᠡ ᠪᠣᠯ ᠡᠬᠡ ᠲᠠᠢ ᠬᠦᠢ ᠨᠢᠭᠡᠲᠡᠢ ᠡᠷᠡᠭᠲᠡᠢ ᠬᠥᠮᠥᠨ ᠢ ᠵᠢᠭᠠᠭᠰᠠᠨ ᠤᠳᠬᠠ ᠲᠠᠢ ᠦᠭᠡ ᠪᠣᠯᠬᠤ | ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠠᠪᠠᠭᠠ ᠲᠠᠢ ᠠᠳᠠᠯᠢ ᠡᠬᠡ ᠶᠢᠨ ᠲᠠᠯᠠ ᠶᠢᠨ ᠳᠡᠭᠡᠷᠡ ᠨᠢᠭᠡ ᠦᠶᠡ ᠶᠢ ᠵᠢᠭᠠᠭᠰᠠᠨ ᠨᠡᠷᠡᠶᠢᠳᠦᠯ ᠶᠤᠮ᠃ | ᠡᠬᠡ ᠠᠴᠠ ᠠᠬᠠ ᠶᠢ ᠶᠡᠭᠡ ᠨᠠᠭᠠᠴᠤ ᠪᠤᠶᠤ ᠪᠦᠳᠦᠭᠦᠨ ᠨᠠᠭᠠᠴᠤ᠂ ᠡᠬᠡ ᠠᠴᠠ ᠳᠡᠭᠦᠦ ᠶᠢ ᠪᠠᠭᠠ ᠨᠠᠭᠠᠴᠤ ᠪᠤᠶᠤ | ᠵᠢᠭᠠᠬᠠᠨ ᠨᠠᠭᠠᠴᠤ ᠭᠡᠳᠡᠭ᠃ ᠣᠯᠠᠨ ᠨᠠᠭᠠᠴᠤ ᠨᠠᠷ ᠲᠠᠢ ᠪᠣᠯ ᠲᠤᠭᠠ ᠪᠤᠶᠤ ᠣᠨᠴᠠᠯᠢᠭ ᠡᠰᠡᠬᠦᠯᠡ ᠬᠦᠨᠳᠦᠯᠡᠪᠦᠷᠢ | ᠳᠠᠭᠤᠳᠠᠯᠭᠠ ᠪᠠᠷ ᠨᠢ ᠢᠯᠭᠠᠵᠤ ᠳᠠᠭᠤᠳᠠᠳᠠᠭ᠃ ᠨᠠᠭᠠᠴᠤ ᠲᠠᠢ ᠬᠠᠤᠯᠢ ᠶᠣᠰᠣ ᠪᠠᠷ ᠬᠤᠷᠢᠮᠯᠠᠨ ᠰᠠᠭᠤᠭᠰᠠᠨ ᠡᠮᠡᠭᠲᠡᠢ ᠶᠢ | ᠨᠠᠭᠠᠴᠤ ᠪᠡᠷᠭᠡᠨ ︵ᠡᠬᠡ ᠶᠢᠨ ᠪᠡᠷᠭᠡᠨ︶ ᠭᠡᠨᠡ᠃ ᠨᠠᠭᠠᠴᠤ ᠶᠢᠨ ᠡᠬᠡ ᠶᠢ ᠨᠠᠭᠠᠴᠤ ᠡᠵᠢ ︵ᠡᠬᠡ︶ ᠭᠡᠨᠡ᠃ ᠡᠬᠡ ᠶᠢᠨ | ᠡᠪᠦᠭᠡ ᠶᠢ ᠨᠠᠭᠠᠴᠤ ᠡᠪᠦᠭᠡ᠂ ᠡᠮᠡᠭᠡ ᠶᠢ ᠨᠠᠭᠠᠴᠤ ᠡᠮᠡᠭᠡ ᠭᠡᠨᠡ᠃ ᠡᠬᠡ ᠶᠢᠨ ᠡᠭᠡᠴᠢ ᠪᠤᠶᠤ ᠥᠬᠢᠨ ᠳᠡᠭᠦᠦ ᠶᠢ ᠨᠠᠭᠠᠴᠤ | ᠡᠭᠡᠴᠢ᠂ ᠨᠠᠭᠠᠴᠤ ᠡᠭᠡᠴᠢ ᠶᠢᠨ ᠬᠦᠷᠭᠡᠨ ᠢ ᠨᠠᠭᠠᠴᠤ ᠬᠦᠷᠭᠡᠨ ᠠᠬᠠ ᠪᠤᠶᠤ ᠬᠦᠷᠭᠡᠨ ᠠᠪᠤᠭᠠᠢ ᠭᠡᠨᠡ᠃ ᠦᠵᠦᠮᠦᠴᠢᠨ ᠳᠤ | ᠠᠬᠠ ᠶᠢ ᠣᠯᠠᠩᠬᠢ ᠳᠠᠭᠠᠨ ︽ᠠᠪᠤᠭᠠᠢ︾ ᠭᠡᠳᠡᠭ᠃ | | ᠪᠡᠶᠡ ᠠᠴᠠ ᠳᠣᠷᠤᠭᠰᠢᠬᠢ ᠭᠤᠣᠯ ᠤᠭᠰᠠᠭᠠ ᠶᠢᠨ ᠳᠠᠭᠤᠳᠠᠯᠭᠠ — ᠡᠬᠡ ᠨᠢᠭᠡᠲᠡᠢ ᠪᠤᠶᠤ ᠨᠡᠶᠢᠭᠡᠮ ᠳᠡᠭᠡᠷᠡᠬᠢ ᠪᠡᠶᠡ | ᠠᠴᠠ ᠨᠠᠰᠤ ᠪᠠᠷ ᠪᠠᠭᠠ ᠡᠷᠡᠭᠲᠡᠢ ᠶᠢ ᠳᠡᠭᠦᠦ᠂ ᠡᠴᠢᠭᠡ ᠡᠬᠡ ᠨᠢᠭᠡᠲᠡᠢ ᠪᠤᠶᠤ ᠡᠰᠡᠬᠦᠯᠡ ᠡᠴᠢᠭᠡ ᠨᠢᠭᠡᠲᠡᠢ᠂ ᠡᠬᠡ ᠥᠭᠡᠷᠡ | ᠲᠠᠢ ᠥᠪᠡᠷ ᠠᠴᠠ ᠨᠠᠰᠤ ᠪᠠᠷ ᠪᠠᠭᠠ ᠡᠷᠡᠭᠲᠡᠢ ᠶᠢ ᠲᠥᠷᠥᠭᠰᠡᠨ ᠳᠡᠭᠦᠦ ᠭᠡᠨᠡ᠃ ᠳᠡᠭᠦᠦ ᠶᠢᠨ ᠬᠤᠷᠢᠮᠯᠠᠵᠤ ᠪᠠᠭᠤᠯᠭᠠᠭᠰᠠᠨ | ᠪᠤᠰᠤᠳ ᠣᠪᠣᠭ ᠤᠨ ᠡᠮᠡᠭᠲᠡᠢ ᠶᠢ ᠳᠡᠭᠦᠦ ᠪᠡᠷᠢ ᠭᠡᠳᠡᠭ᠃ | | ᠡᠪᠦᠭᠡ ᠨᠢᠭᠡᠲᠡᠢ ᠠᠬᠠ ᠳᠡᠭᠦᠦ ᠶᠢ ᠦᠶᠡᠯᠢᠳ ᠠᠬᠠ ᠳᠡᠭᠦᠦ᠂ ᠡᠯᠦᠨᠴᠡ ᠨᠢᠭᠡᠲᠡᠢ ᠠᠬᠠ ᠳᠡᠭᠦᠦ ᠶᠢ ᠬᠠᠶᠠᠯᠢᠳ | ᠠᠬᠠ ᠳᠡᠭᠦᠦ᠂ ᠬᠤᠯᠤᠨᠴᠠ ᠨᠢᠭᠡᠲᠡᠢ ᠠᠬᠠ ᠳᠡᠭᠦᠦ ᠶᠢ ᠦᠶᠡ ᠠᠬᠠ ᠳᠡᠭᠦᠦ᠂ ᠡᠯᠦᠨ ᠡᠪᠦᠭᠡ ᠨᠢᠭᠡᠲᠡᠢ ᠠᠬᠠ ᠳᠡᠭᠦᠦ ᠶᠢ | ᠬᠠᠶᠠ ᠠᠬᠠ ᠳᠡᠭᠦᠦ᠂ ᠬᠤᠯᠤᠨ ᠡᠪᠦᠭᠡ ᠨᠢᠭᠡᠲᠡᠢ ᠠᠬᠠ ᠳᠡᠭᠦᠦ ᠶᠢ ᠦᠶᠡᠨᠴᠢᠷ ᠠᠬᠠ ᠳᠡᠭᠦᠦ᠂ ᠬᠤᠯᠪᠣᠭᠠ ᠡᠪᠦᠭᠡ | ᠨᠢᠭᠡᠲᠡᠢ ᠠᠬᠠ ᠳᠡᠭᠦᠦ ᠶᠢ ᠬᠠᠶᠠᠨᠴᠢᠷ ᠠᠬᠠ ᠳᠡᠭᠦᠦ᠂ ᠥᠨᠳᠥᠷ ᠡᠪᠦᠭᠡ ᠨᠢᠭᠡᠲᠡᠢ ᠠᠬᠠ ᠳᠡᠭᠦᠦ ᠶᠢ ᠲᠥᠷᠥᠯ ᠤᠨ ᠠᠬᠠ | ᠳᠡᠭᠦᠦ᠂ ᠤᠭ ᠳᠡᠭᠡᠳᠦᠰ ᠨᠢᠭᠡᠲᠡᠢ ᠠᠬᠠ ᠳᠡᠭᠦᠦᠰ ᠢ ᠠᠶᠢᠮᠠᠭ ᠤᠨ ᠠᠬᠠ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠯᠴᠠᠨᠠ᠃ ᠮᠥᠨ ᠴᠦ | ᠲᠡᠳᠡᠨ ᠤ ᠭᠡᠷᠭᠡᠶᠢᠳ ᠢ ᠦᠶᠡᠯᠢᠳ — ᠬᠠᠶᠠᠯᠢᠳ — ᠦᠶᠡ — ᠬᠠᠶᠠ — ᠦᠶᠡᠨᠴᠢᠷ — ᠬᠠᠶᠠᠨᠴᠢᠷ — ᠲᠥᠷᠥᠯ — | ᠠᠶᠢᠮᠠᠭ ᠤᠨ ᠪᠡᠷᠢᠶᠡᠳ ᠭᠡᠵᠦ ᠦᠶᠡ ᠳᠣᠷᠣᠭᠰᠢᠯᠠᠭᠤᠯᠤᠨ ᠰᠤᠨᠤᠭᠠᠵᠤ ᠳᠠᠭᠤᠳᠠᠳᠠᠭ ᠶᠤᠮ᠃ | | ᠳᠣᠣᠷᠠ ᠨᠢᠭᠡ ᠦᠶᠡ ᠶᠢᠨ ᠬᠡᠦᠬᠡᠳ ᠤᠨ ᠬᠤᠭᠤᠷᠣᠨᠳᠤᠬᠢ ᠳᠠᠭᠤᠳᠠᠯᠭᠠ — ᠠᠬᠠ ᠳᠡᠭᠦᠦ ᠬᠤᠶᠠᠷ ᠤᠨ ᠬᠡᠦᠬᠡᠳ᠂ | ᠬᠤᠭᠤᠷᠣᠨᠳᠤ ᠪᠠᠨ ᠦᠶᠡᠯᠢᠳ ᠠᠬᠠ ᠳᠡᠭᠦᠦ᠂ ᠦᠶᠡᠯᠢᠳ ᠡᠭᠡᠴᠢ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠯᠴᠠᠳᠠᠭ᠃ ᠡᠳᠡ ᠪᠣᠯ ᠣᠪᠣᠭ | ᠨᠢᠭᠡᠲᠡᠢ᠃ ᠡᠭᠡᠴᠢ᠂ ᠥᠬᠢᠨ ᠳᠡᠭᠦᠦ ᠬᠤᠶᠠᠷ ᠤᠨ ᠬᠡᠦᠬᠡᠳ ᠬᠤᠭᠤᠷᠣᠨᠳᠤ ᠪᠠᠨ ᠪᠦᠯᠦ ᠠᠬᠠ ᠳᠡᠭᠦᠦ᠂ ᠪᠦᠯᠦ ᠡᠭᠡᠴᠢ | ᠳᠡᠭᠦᠦ ᠳᠠᠭᠤᠳᠠᠵᠤ᠂ ᠲᠡᠳᠡᠨ ᠤ ᠬᠡᠦᠬᠡᠳ ᠬᠤᠭᠤᠷᠣᠨᠳᠤ ᠪᠠᠨ ᠪᠦᠯᠦᠨᠴᠢᠷ ᠪᠣᠯᠳᠠᠭ᠂ ᠲᠡᠳᠡᠨᠦᠰ ᠪᠣᠯ ᠣᠪᠣᠭ ᠣᠨᠳᠣᠣ᠃ | | ᠠᠬᠠ ᠥᠬᠢᠨ ᠳᠡᠭᠦᠦ ᠪᠤᠶᠤ ᠡᠰᠡᠬᠦᠯᠡ ᠡᠭᠡᠴᠢ ᠳᠡᠭᠦᠦ ᠬᠤᠶᠠᠷ ᠤᠨ ᠬᠡᠦᠬᠡᠳ ᠬᠤᠭᠤᠷᠣᠨᠳᠤ ᠪᠠᠨ ᠨᠠᠭᠠ ᠵᠢᠭᠡ | ᠪᠤᠶᠤ ᠵᠢᠭᠡ — ᠨᠠᠭᠠ ᠪᠣᠯᠳᠠᠭ᠃ ᠨᠠᠰᠤᠨ ᠤ ᠶᠡᠭᠡ ᠪᠠᠭᠠ ᠪᠠᠷ ᠢᠶᠠᠨ ᠨᠠᠭᠠ ᠠᠪᠤᠭᠠᠢ ︵ᠠᠬᠠ︶᠂ ᠨᠠᠭᠠ ᠠᠨᠢᠶᠠ ︵ | ᠡᠭᠡᠴᠢ︶᠂ ᠵᠢᠭᠡ ᠠᠪᠤᠭᠠᠢ ︵ᠠᠬᠠ︶᠂ ᠵᠢᠭᠡ ᠠᠨᠢᠶᠠ ︵ᠡᠭᠡᠴᠢ︶ ᠭᠡᠬᠦ ᠮᠡᠨᠳᠦᠴᠢᠯᠡᠨ ᠳᠠᠭᠤᠳᠠᠳᠠᠭ᠃ ᠨᠠᠭᠠ ᠭᠡᠳᠡᠭ | ᠪᠣᠯ ᠨᠠᠭᠠᠴᠤ ᠲᠠᠢ ᠠᠳᠠᠯᠢ ᠳᠡᠭᠡᠷᠡ ᠨᠢᠭᠡ ᠦᠶᠡ ᠶᠢ ᠵᠢᠭᠠᠭᠰᠠᠨ ᠤᠳᠬᠠ ᠲᠠᠢ ᠪᠢᠰᠢ᠂ ᠬᠠᠷᠢᠨ ᠦᠶᠡ ᠠᠳᠠᠯᠢ ᠪᠠᠶᠢᠬᠤ ᠶᠢ | ᠢᠯᠡᠳᠬᠡᠭᠰᠡᠨ ᠥᠪᠡᠷᠮᠢᠴᠡ ᠳᠠᠭᠤᠳᠠᠯᠭᠠ ᠲᠠᠰᠢᠶᠠᠷᠠᠵᠤ ᠪᠠᠶᠢᠭᠠ ᠶᠠᠪᠤᠳᠠᠯ ᠶᠤᠮ᠃ ᠨᠠᠭᠠ ᠡᠪᠦᠭᠡ ᠭᠡᠳᠡᠭ ᠢᠶᠠᠷ ᠵᠢᠱᠢᠶᠡᠯᠡᠪᠡᠯ | ᠲᠡᠷᠡ ᠨᠢ ᠨᠠᠭᠠ ᠶᠢᠨ ᠡᠪᠦᠭᠡ᠂ ᠪᠡᠶᠡ ᠳᠤ ᠠᠪᠴᠤ ᠬᠡᠯᠡᠪᠡᠯ ᠨᠠᠭᠠᠴᠤ ᠠᠪᠤ ᠶᠢ ᠵᠢᠭᠠᠵᠤ ᠪᠠᠶᠢᠬᠤ ᠶᠢ ᠮᠡᠳᠡᠭᠡᠷᠡᠢ᠃ ᠠᠬᠠ | ᠪᠤᠶᠤ ᠳᠡᠭᠦᠦ ᠶᠢᠨ ᠬᠡᠦᠬᠡᠳ᠂ ᠥᠪᠡᠷ ᠲᠤ ᠠᠴᠢ ᠪᠣᠯᠣᠨᠠ᠃ ᠡᠨᠡ ᠪᠣᠯ ᠤᠳᠤᠮ ᠤᠭᠰᠠᠭᠠ ᠳᠤ ᠠᠴᠢ ᠰᠠᠯᠠᠭᠠ ᠦᠶᠡ | ᠭᠠᠷᠤᠯᠠ ᠭᠡᠬᠦ ᠤᠳᠬᠠ ᠲᠠᠢ ᠦᠭᠡ ᠪᠣᠯᠬᠤ ᠠᠴᠠ ᠭᠠᠳᠠᠨᠠ ᠲᠥᠷᠥᠭᠰᠡᠨ ᠬᠦᠦ ᠶᠢᠨ ᠬᠡᠦᠬᠡᠳ ᠢ ᠴᠦ ᠠᠴᠢ ᠭᠡᠵᠦ | ᠳᠠᠭᠤᠳᠠᠵᠤ᠂ ᠬᠦᠦ ᠶᠢᠨ ᠬᠡᠦᠬᠡᠳ᠂ ᠲᠥᠷᠥᠭᠰᠡᠨ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠬᠡᠦᠬᠡᠳ ᠢ ᠬᠠᠮᠲᠤ ᠳᠤᠨᠢ ᠵᠢᠭᠠᠳᠠᠭ ᠳᠠᠪᠬᠤᠷ | ᠤᠳᠬᠠ ᠲᠠᠢ ᠳᠠᠭᠤᠳᠠᠯᠭᠠ ᠪᠣᠯᠬᠤ ᠶᠤᠮ᠃ | | ᠡᠭᠡᠴᠢ ᠪᠠ ᠥᠬᠢᠨ ᠳᠡᠭᠦᠦ ᠶᠢᠨ ᠬᠡᠦᠬᠡᠳ ᠤᠳ ᠥᠪᠡᠷ ᠲᠤ ᠵᠢᠭᠡ ᠪᠣᠯᠳᠠᠭ᠃ ᠵᠢᠭᠡ ᠶᠢᠨ ᠬᠡᠦᠬᠡᠳ ᠨᠢ ᠵᠢᠭᠡᠨᠴᠢᠷ | ᠪᠣᠯᠳᠠᠭ᠃ | | ᠰᠠᠳᠤᠨ ᠢᠶᠠᠷ ᠦᠵᠡᠬᠦ ᠣᠶᠢᠷᠠ ᠲᠥᠷᠥᠯ ᠤᠨ ᠪᠤᠰᠤᠳ ᠳᠠᠭᠤᠳᠠᠯᠭᠠ — ᠦᠵᠦᠮᠦᠴᠢᠨ ᠳᠤ ᠬᠤᠶᠢᠲᠤ ᠠᠪᠤ ︵ | ᠡᠴᠢᠭᠡ ᠨᠢ ᠦᠬᠦᠭᠰᠡᠨ ᠪᠤᠶᠤ ᠤᠷᠤᠭ ᠰᠠᠯᠤᠭᠰᠠᠨ ᠬᠤᠶᠢᠨᠠ ᠡᠬᠡ ᠶᠢᠨ ᠳᠠᠬᠢᠨ ᠤᠷᠤᠭᠯᠠᠭᠰᠠᠨ ᠡᠷᠡ ᠶᠢ ᠬᠤᠶᠢᠲᠤ ᠠᠪᠤ | ᠭᠡᠨᠡ︶᠂ ᠬᠤᠶᠢᠲᠤ ᠡᠵᠢ ︵ᠡᠬᠡ ᠦᠬᠦᠭᠰᠡᠨ ᠪᠤᠶᠤ ᠤᠷᠤᠭ ᠰᠠᠯᠤᠭᠰᠠᠨ ᠬᠤᠶᠢᠨᠠ ᠡᠴᠢᠭᠡ ᠶᠢᠨ ᠳᠠᠬᠢᠨ ᠤᠷᠤᠭᠯᠠᠭᠰᠠᠨ | ᠡᠮᠡ ᠶᠢ ᠬᠤᠶᠢᠲᠤ ᠡᠵᠢ ᠭᠡᠨᠡ︶᠂ ᠶᠡᠭᠡ ᠪᠠᠭᠠ ᠡᠵᠢ ︵ᠡᠴᠢᠭᠡ ᠶᠢᠨ ᠰᠠᠭᠠᠳᠠᠭᠯᠠᠵᠤ ᠪᠠᠭᠤᠯᠭᠠᠭᠰᠠᠨ᠂ ᠡᠬᠡ ᠠᠴᠠ | ᠪᠤᠰᠤᠳ ᠡᠬᠡᠨᠡᠷ ᠤᠳ︶᠂ ᠲᠡᠵᠢᠭᠡᠵᠦ ᠦᠷᠡᠴᠢᠯᠡᠭᠰᠡᠨ ᠡᠴᠢᠭᠡ ᠡᠬᠡ᠂ ᠰᠦᠨᠡᠰᠦᠨ ᠡᠭᠡᠴᠢ ︵ᠵᠠᠷᠢᠮ ᠪᠢᠴᠢᠭ ᠲᠤ | ᠰᠤᠨᠤᠭᠰᠠᠨ ᠡᠭᠡᠴᠢ ᠭᠡᠬᠦ᠂ ᠡᠭᠡᠴᠢ ᠶᠢ ᠦᠬᠦᠭᠰᠡᠨ ᠪᠤᠶᠤ ᠰᠠᠯᠤᠭᠰᠠᠨ ᠬᠤᠶᠢᠨᠠ ᠡᠭᠡᠴᠢ ᠶᠢ ᠣᠷᠣᠯᠠᠵᠤ ᠬᠦᠷᠭᠡᠨ ᠠᠬᠠ | ᠶᠢᠨ ᠲᠠᠬᠢᠨ ᠪᠠᠭᠤᠯᠭᠠᠭᠰᠠᠨ ᠡᠬᠡᠨᠡᠷ︶᠂ ᠬᠥᠬᠦᠯᠲᠦ ᠡᠴᠢᠭᠡ ᠡᠬᠡ᠂ ᠮᠥᠷᠭᠦᠭᠦᠯᠦᠭᠰᠡᠨ ᠥᠬᠢᠨ ᠳᠡᠭᠦᠦ᠂ ᠨᠠᠶᠢᠵᠠ ᠬᠤᠳᠠ | ᠬᠤᠳᠠᠭᠠᠢ᠂ ᠨᠠᠶᠢᠵᠠ ︵ᠥᠬᠢᠳ ᠬᠤᠭᠤᠷᠣᠨᠳᠤ ᠪᠠᠨ ᠵᠢᠷᠤᠮ ᠤᠨ ᠡᠭᠡᠴᠢ ᠳᠡᠭᠦᠦ ᠪᠠᠷᠢᠯᠳᠤᠭᠰᠠᠨ︶᠂ ᠠᠨᠳᠠ ︵ | ᠬᠥᠪᠡᠭᠦᠳ ᠬᠤᠭᠤᠷᠣᠨᠳᠤ ᠪᠠᠨ ᠲᠡᠭᠷᠢ ᠳᠤ ᠮᠥᠷᠭᠦᠵᠦ ᠠᠨᠳᠠᠭᠠᠶᠢᠯᠠᠭᠰᠠᠨ ᠠᠬᠠ ᠳᠡᠭᠦᠦ︶᠂ ᠰᠢᠷᠭᠤᠭᠤᠯᠤᠭᠰᠠᠨ ᠡᠴᠢᠭᠡ | ᠡᠬᠡ ︵ᠡᠩᠬᠦᠷᠡᠢ ᠬᠡᠦᠬᠡᠳ ᠢ ᠬᠤᠷᠮᠣᠢ ᠳᠤᠨᠢ ᠰᠢᠷᠭᠤᠭᠤᠯᠵᠤ᠂ ᠡᠪᠦᠳᠦᠭ ᠳᠤᠨᠢ ᠮᠥᠷᠭᠦᠭᠦᠯᠵᠦ ᠡᠴᠢᠭᠡ ᠡᠬᠡ | ᠲᠠᠨᠢᠭᠤᠯᠤᠭᠰᠠᠨ︶ ᠶᠢ ᠴᠥᠮ ᠵᠠᠶᠢᠯᠠᠰᠢ ᠦᠭᠡᠢ ᠰᠠᠳᠤᠨ ᠰᠦᠯᠪᠡᠭᠡ ᠪᠠᠷ ᠦᠵᠡᠵᠦ ᠳᠠᠭᠤᠳᠠᠳᠠᠭ ᠶᠣᠰᠣ ᠲᠠᠢ᠃ | | ᠦᠶᠡ᠂ ᠨᠠᠰᠤ ᠢᠯᠭᠠᠬᠤ ᠶᠣᠰᠣᠨ — ᠦᠵᠦᠮᠦᠴᠢᠨᠴᠤᠳ ᠶᠠᠰᠤᠨ ᠲᠥᠷᠥᠯ᠂ ᠴᠢᠰᠤᠨ ᠲᠥᠷᠥᠯ᠂ ᠰᠠᠳᠤᠨ | ᠰᠦᠯᠪᠡᠭᠡ ᠶᠢᠨ ᠠᠬᠠ ᠳᠡᠭᠦᠦ᠂ ᠡᠭᠡᠴᠢ ᠥᠬᠢᠨ ᠳᠡᠭᠦᠦ ᠶᠢᠨ ᠡᠮᠡ ᠨᠥᠬᠦᠷ᠂ ᠡᠷᠡ ᠨᠥᠬᠦᠷ ᠢ ᠨᠠᠰᠤ ᠢᠯᠭᠠᠬᠤ ᠦᠭᠡᠢ | ᠠᠬᠠ ᠳᠡᠭᠦᠦ᠂ ᠡᠭᠡᠴᠢ ᠥᠬᠢᠨ ᠳᠡᠭᠦᠦ ᠪᠠᠨ ᠳᠠᠭᠠᠭᠤᠯᠵᠤ ᠳᠠᠭᠤᠳᠠᠳᠠᠭ᠃ ᠵᠢᠱᠢᠶᠡᠯᠡᠪᠡᠯ᠂ ᠪᠡᠷᠭᠡᠨ ᠤ ᠨᠠᠰᠤ ᠨᠢ ᠪᠡᠶᠡ | ᠠᠴᠠ ᠳᠡᠭᠦᠦ ᠪᠠᠶᠢᠭᠰᠠᠨ ᠴᠦ ᠡᠭᠡᠴᠢ ᠪᠠᠷ ᠦᠵᠡᠵᠦ ᠪᠡᠷᠭᠡᠨ ᠳᠠᠭᠤᠳᠠᠨᠠ᠃ ᠳᠡᠭᠦᠦ ᠪᠡᠷᠢ ᠶᠢᠨ ᠨᠠᠰᠤ ᠨᠢ ᠪᠡᠶᠡ ᠠᠴᠠ | ᠡᠭᠡᠴᠢ ᠪᠠᠶᠢᠭᠰᠠᠨ ᠴᠦ ᠳᠡᠭᠦᠦ ᠪᠠᠷ ᠦᠵᠡᠵᠦ ᠳᠡᠭᠦᠦ ᠪᠡᠷᠢ ᠳᠠᠭᠤᠳᠠᠨᠠ᠃ ᠬᠦᠷᠭᠡᠨ ᠠᠬᠠ ᠶᠢᠨ ᠨᠠᠰᠤ ᠨᠢ ᠪᠡᠶᠡ ᠠᠴᠠ | ᠳᠡᠭᠦᠦ ᠴᠦ ᠠᠬᠠ ᠪᠠᠷ ᠦᠵᠡᠵᠦ ᠬᠦᠷᠭᠡᠨ ᠠᠬᠠ ᠳᠠᠭᠤᠳᠠᠵᠤ᠂ ᠳᠡᠭᠦᠦ ᠬᠦᠷᠭᠡᠨ ᠤ ᠨᠠᠰᠤ ᠪᠡᠶᠡ ᠠᠴᠠ ᠠᠬᠠ ᠪᠠᠶᠢᠭᠰᠠᠨ | ᠴᠦ ᠳᠡᠭᠦᠦ ᠪᠠᠷ ᠦᠵᠡᠵᠦ ᠳᠡᠭᠦᠦ ᠬᠦᠷᠭᠡᠨ ᠳᠠᠭᠤᠳᠠᠨᠠ᠃ ᠪᠡᠷᠭᠡᠨ ᠪᠠ ᠬᠦᠷᠭᠡᠨ ᠠᠬᠠ ᠶᠢᠨ ᠳᠡᠭᠦᠦ ᠪᠠ ᠥᠬᠢᠨ ᠳᠡᠭᠦᠦ | ᠶᠢ ᠨᠠᠰᠤ ᠢᠯᠭᠠᠵᠤ ᠪᠡᠶᠡ ᠠᠴᠠ ᠨᠠᠰᠤ ᠠᠬᠠ ᠶᠢ ᠨᠢ ᠬᠤᠳᠠ ᠠᠬᠠ᠂ ᠬᠤᠳᠠᠭᠠᠢ ᠡᠭᠡᠴᠢ ᠭᠡᠵᠦ᠂ ᠨᠠᠰᠤ ᠳᠡᠭᠦᠦ ᠶᠢ | ᠬᠤᠳᠠ ᠳᠡᠭᠦᠦ᠂ ᠬᠤᠳᠠᠭᠠᠢ ᠥᠬᠢᠨ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠨᠠ᠃ | | ᠳᠡᠭᠦᠦ ᠪᠡᠷᠢ ᠪᠠ ᠳᠡᠭᠦᠦ ᠬᠦᠷᠭᠡᠨ ᠤ ᠠᠬᠠ ᠡᠭᠡᠴᠢ ᠶᠢ ᠮᠥᠨ ᠨᠠᠰᠤ ᠢᠯᠭᠠᠵᠤ᠂ ᠪᠡᠶᠡ ᠠᠴᠠ ᠠᠬᠠ ︵ᠡᠭᠡᠴᠢ︶ | ᠶᠢ ᠨᠢ ᠬᠤᠳᠠ ᠠᠬᠠ᠂ ᠬᠤᠳᠠᠭᠠᠢ ᠡᠭᠡᠴᠢ ᠭᠡᠵᠦ᠂ ᠨᠠᠰᠤ ᠪᠠᠷ ᠳᠡᠭᠦᠦ ᠶᠢ ᠨᠢ ᠬᠤᠳᠠ ᠳᠡᠭᠦᠦ᠂ ᠬᠤᠳᠠᠭᠠᠢ ᠥᠬᠢᠨ | ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠨᠠ᠃ ᠳᠡᠭᠦᠦ ᠪᠡᠷᠢ ᠪᠠ ᠳᠡᠭᠦᠦ ᠬᠦᠷᠭᠡᠨ ᠤ ᠳᠡᠭᠦᠦ ᠨᠠᠷ ᠤᠳ ᠢ ᠨᠠᠰᠤ ᠨᠢ ᠪᠡᠶᠡ ᠠᠴᠠ ᠠᠬᠠ | ᠪᠠᠶᠢᠭᠰᠠᠨ ᠴᠦ ᠬᠤᠳᠠ ᠳᠡᠭᠦᠦ᠂ ᠬᠤᠳᠠᠭᠠᠢ ᠥᠬᠢᠨ ᠳᠡᠭᠦᠦ ᠭᠡᠵᠦ ᠳᠠᠭᠤᠳᠠᠳᠠᠭ᠃ | | ᠡᠬᠡᠨᠡᠷ ᠬᠠᠷᠠ ᠬᠥᠮᠥᠨ ᠬᠤᠶᠠᠷ ︵ᠡᠷᠡ ᠡᠮᠡ ᠬᠤᠶᠠᠷ︶ ᠬᠠᠷᠢᠯᠴᠠᠨ ᠨᠢᠭᠡᠨ ᠢᠶᠠᠨ ᠳᠠᠭᠠᠵᠤ᠂ ᠡᠬᠡᠨᠡᠷ ᠨᠢ ᠬᠠᠷᠠ | ᠬᠥᠮᠥᠨ ᠢᠶᠠᠨ ᠳᠠᠭᠠᠵᠤ ᠬᠠᠷᠠ ᠬᠥᠮᠥᠨ ᠨᠢ ᠡᠬᠡᠨᠡᠷ ᠢᠶᠠᠨ ᠳᠠᠭᠠᠵᠤ ᠨᠠᠰᠤ ᠢᠯᠭᠠᠬᠤ ᠦᠭᠡᠢ ᠳᠠᠭᠤᠳᠠᠳᠠᠭ᠃ ᠵᠢᠱᠢᠶᠡᠯᠡᠪᠡᠯ᠂ | ᠬᠠᠷᠠ ᠬᠥᠮᠥᠨ ᠤ ᠠᠬᠠ ᠡᠭᠡᠴᠢ ᠶᠢᠨ ᠨᠠᠰᠤ ᠨᠢ ᠳᠡᠭᠦᠦ ᠪᠠᠶᠢᠭᠰᠠᠨ ᠴᠦ ᠪᠡᠷᠢ ᠨᠢ ᠬᠠᠳᠠᠮ ᠠᠬᠠ᠂ ᠬᠠᠳᠠᠮ ᠡᠭᠡᠴᠢ | ᠳᠠᠭᠤᠳᠠᠨᠠ᠃ ᠬᠠᠷᠠ ᠬᠥᠮᠥᠨ ᠤ ᠳᠡᠭᠦᠦ ᠶᠢᠨ ᠨᠠᠰᠤ ᠨᠢ ᠪᠡᠷᠭᠡᠨ ᠠᠴᠠ ᠪᠠᠨ ᠠᠬᠠ ᠪᠤᠶᠤ ᠡᠭᠡᠴᠢ ᠪᠠᠶᠢᠭᠰᠠᠨ ᠴᠦ ᠪᠡᠷᠭᠡᠨ | ᠨᠢ ᠬᠠᠳᠠᠮ ᠳᠡᠭᠦᠦ᠂ ᠬᠠᠳᠠᠮ ᠥᠬᠢᠨ ᠳᠡᠭᠦᠦ ᠳᠠᠭᠤᠳᠠᠨᠠ᠃ ᠮᠥᠨ ᠡᠨᠡ ᠮᠡᠲᠦ ᠪᠠᠷ ᠡᠬᠡᠨᠡᠷ ᠤᠨ ᠠᠬᠠ ᠡᠭᠡᠴᠢ ᠶᠢᠨ | ᠨᠠᠰᠤ ᠨᠢ ᠳᠡᠭᠦᠦ ᠬᠦᠷᠭᠡᠨ ᠠᠴᠠ ᠪᠠᠨ ᠳᠡᠭᠦᠦ ᠪᠠᠶᠢᠭᠰᠠᠨ ᠴᠦ ᠬᠦᠷᠭᠡᠨ ᠨᠢ ᠬᠠᠳᠠᠮ ᠠᠬᠠ᠂ ᠡᠭᠡᠴᠢ ᠳᠠᠭᠤᠳᠠᠵᠤ ᠬᠦᠷᠢ | ᠳᠡᠭᠦᠦ ᠨᠠᠷ ᠤᠨ ᠨᠠᠰᠤ ᠨᠢ ᠪᠡᠶᠡ ᠠᠴᠠ ᠨᠢ ᠠᠬᠠ ᠪᠠᠶᠢᠭᠰᠠᠨ ᠴᠦ ᠬᠦᠷᠢ ᠳᠡᠭᠦᠦ᠂ ᠬᠦᠷᠢ ᠥᠬᠢᠨ ᠳᠡᠭᠦᠦ ᠭᠡᠵᠦ | ᠳᠠᠭᠤᠳᠠᠳᠠᠭ᠃ | | ᠵᠠᠷᠢᠮ ᠳᠠᠭᠤᠳᠠᠯᠭᠠ ᠳᠤ ᠦᠶᠡ ᠶᠢ ᠴᠢᠩᠭᠠ ᠢᠯᠭᠠᠵᠤ᠂ ᠨᠠᠰᠤ ᠶᠢ ᠢᠯᠭᠠᠬᠤ ᠦᠭᠡᠢ ᠪᠠᠶᠢᠳᠠᠭ᠃ ᠵᠢᠱᠢᠶᠡᠯᠡᠪᠡᠯ᠂ | ᠠᠪᠠᠭᠠ ᠶᠢᠨ ᠨᠠᠰᠤ ᠨᠢ ᠪᠡᠶᠡ ᠠᠴᠠ ᠳᠡᠭᠦᠦ ᠪᠠᠶᠢᠭᠰᠠᠨ ᠴᠦ ᠡᠴᠢᠭᠡ ᠦᠶᠡ ᠶᠢᠨ ᠬᠥᠮᠥᠨ᠂ ᠦᠶᠡᠯᠢᠳ ᠳᠡᠭᠦᠦ ᠶᠢᠨ ᠨᠠᠰᠤ | ᠨᠢ ᠪᠡᠶᠡ ᠠᠴᠠ ᠠᠬᠠ ᠪᠠᠶᠢᠭᠰᠠᠨ ᠴᠦ ᠬᠥᠪᠡᠭᠦᠳ ᠦᠶᠡ ᠶᠢᠨ ᠬᠥᠮᠥᠨ᠃ | | ᠳᠡᠭᠡᠷᠡ ᠳᠣᠣᠷᠠ ᠦᠶᠡ ᠶᠢᠨ ᠬᠥᠮᠥᠰ ᠤᠨ ᠢᠵᠢᠯ ᠦᠶᠡ ᠳᠣᠲᠣᠷᠠᠬᠢ ᠶᠡᠭᠡ ᠪᠠᠭᠠ ᠶᠢ ᠢᠯᠭᠠᠬᠤ ᠳᠠᠭᠠᠨ ᠳᠡᠭᠡᠷᠡ | ᠦᠶᠡ ᠶᠢᠨ ᠬᠥᠮᠥᠰ ᠤᠨ ᠢᠵᠢᠯ ᠦᠶᠡ ᠶᠢᠨ ᠬᠢᠨᠢ ᠳᠣᠲᠣᠷᠠᠬᠢ ᠶᠡᠭᠡ ᠪᠠᠭᠠ ᠶᠢ ᠠᠬᠠ ᠪᠣᠯᠬᠤ ᠶᠢ ᠨᠢ ︽ᠶᠡᠭᠡ︾᠂ | ᠳᠡᠭᠦᠦ ᠪᠣᠯᠬᠤ ᠶᠢ ᠨᠢ ︽ᠪᠠᠭᠠ︾ ᠪᠠᠷ ᠲᠣᠳᠣᠳᠬᠠᠵᠤ ᠳᠠᠭᠤᠳᠠᠳᠠᠭ᠃ ᠳᠣᠣᠷᠠ ᠦᠶᠡ ᠶᠢᠨ ᠬᠥᠮᠥᠰ ᠢ ᠨᠡᠷᠡ ᠪᠠᠷ ᠨᠢ | ᠪᠤᠶᠤ ᠳᠡᠭᠦᠦ ᠪᠣᠯᠬᠤ ᠶᠢ ᠨᠢ ︽ᠪᠠᠭᠠ︾ ᠪᠠᠷ ᠲᠣᠳᠣᠳᠬᠠᠵᠤ ᠳᠠᠭᠤᠳᠠᠳᠠᠭ᠃ ᠳᠣᠣᠷᠠ ᠦᠶᠡ ᠶᠢᠨ ᠬᠥᠮᠥᠰ ᠢ ᠨᠡᠷᠡ ᠪᠠᠷ | ᠨᠢ ᠪᠤᠶᠤ ᠦᠶᠡ ᠪᠠᠷ ᠨᠢ ᠰᠢᠭᠤᠳ ᠳᠠᠭᠤᠳᠠᠳᠠᠭ ᠪᠣᠯᠪᠠᠴᠤ ᠲᠡᠳᠡᠨ ᠢ ᠢᠵᠢᠯ ᠦᠶᠡ ᠳᠣᠲᠣᠷᠠ ᠨᠢ ᠬᠠᠷᠢᠨ ᠬᠠᠮᠤᠭ ᠤᠨ | ᠲᠡᠷᠢᠭᠦᠨ ᠳᠤ ᠲᠥᠷᠥᠭᠰᠡᠨ ᠢ ᠨᠢ ᠤᠤᠭᠠᠨ᠂ ᠳᠠᠷᠠᠭᠠ ᠲᠥᠷᠥᠭᠰᠡᠨ ᠢ ᠨᠢ ᠤᠳᠠᠭᠠᠬᠢ᠂ ᠬᠠᠮᠤᠭ ᠤᠨ ᠰᠡᠭᠦᠯ ᠲᠥᠷᠥᠭᠰᠡᠨ ᠢ | ᠨᠢ ᠣᠳᠬᠤᠨ ᠭᠡᠵᠦ ᠢᠯᠭᠠᠨ ᠳᠠᠭᠤᠳᠠᠳᠠᠭ ᠶᠤᠮ᠃ | | |