ᠨᠢᠭᠡ᠂ ᠵᠢᠷᠭᠠᠯᠠᠩᠲᠤ ᠨᠠᠢᠮᠠᠨ ᠮᠣᠷᠢ | ᠤᠷᠢᠳᠤ ᠦᠵᠦᠮᠦᠴᠢᠨ ᠨᠤᠲᠤᠭ ᠲᠤ ᠳᠣᠯᠣᠭᠠᠨ ᠵᠢᠯ ᠳᠠᠷᠠᠭᠠᠯᠠᠨ ᠦᠶᠡᠷ ᠤᠰᠤᠳᠤᠯ᠂ ᠬᠤᠷᠣᠬᠠᠢ ᠰᠢᠪᠠᠵᠢ᠂ | ᠴᠠᠰᠤ ᠵᠤᠳ᠂ ᠳᠡᠭᠡᠷᠡᠮ ᠬᠤᠯᠠᠭᠠᠢ ᠶᠢᠨ ᠭᠠᠮᠰᠢᠭ ᠦᠷᠭᠦᠯᠵᠢᠯᠡᠵᠦ᠂ ᠤᠯᠠᠭᠠᠢ ᠭᠤᠣᠯ ᠨᠢ ᠬᠤᠶᠠᠷ ᠦᠵᠦᠮᠦᠴᠢᠨ | ᠤ ᠳᠤᠮᠳᠠᠭᠤᠷ ᠤᠷᠤᠰᠤᠨ ᠬᠠᠯᠬᠠ ᠶᠢᠨ ᠴᠢᠨ᠋ᠸᠠ ᠭᠤᠣᠯ ᠳᠤ ᠴᠢᠳᠬᠤᠵᠤ᠂ ᠴᠢᠨᠠᠭᠰᠢ ᠪᠠᠨ ᠲᠦᠷᠭᠡᠨ ᠲᠤᠤᠯᠠ ᠲᠠᠢ | ᠤᠷᠤᠰᠬᠠᠯ ᠨᠡᠶᠢᠯᠡᠭᠰᠡᠨ ᠳᠤ ᠦᠵᠦᠮᠦᠴᠢᠨ ᠨᠤᠲᠤᠭ ᠤᠨ ᠲᠣᠮᠣᠭᠠᠳᠠᠳ ︽ᠦᠵᠦᠮᠦᠴᠢᠨᠴᠦᠳ ᠬᠠᠯᠬᠠ ᠶᠢᠨ ᠴᠢᠨ᠋ᠸᠠ | ᠳᠤ ᠰᠣᠷᠣᠭᠳᠠᠯᠠ︾ ᠬᠡᠮᠡᠨ ᠰᠡᠵᠢᠭᠯᠡᠵᠦ ᠲᠡᠭᠦᠨ ᠢ ᠬᠤᠷᠢᠭᠯᠠᠨ ᠵᠣᠭᠰᠣᠭᠠᠬᠤ ᠦᠭᠡᠢ ᠪᠣᠯ ᠦᠵᠦᠮᠦᠴᠢᠨ | ᠶᠠᠳᠠᠭᠤᠷᠠᠵᠤ ᠬᠤᠭᠤᠰᠤᠷᠠᠬᠤ ᠨᠢ ᠥᠷᠯᠥᠭᠡ ᠦᠳᠡᠰᠢ ᠶᠢᠨ ᠬᠤᠭᠤᠷᠣᠨᠳᠤ ᠪᠣᠯᠪᠠ ᠭᠡᠳ ᠦᠵᠦᠮᠦᠴᠢᠨ ᠤ ᠵᠠᠰᠠᠭ | ᠨᠣᠶᠠᠳ ᠤᠳ ᠠᠴᠠ ᠲᠦᠢᠩᠺᠡᠷ ᠡᠩᠡ ᠲᠦᠷᠦᠭᠦᠲᠡᠢ ᠣᠯᠠᠨ ᠬᠥᠮᠥᠰ ᠢ ᠪᠠᠷᠠᠭᠤᠨ ᠭᠠᠵᠠᠷ ᠲᠤ ᠶᠠᠪᠤᠭᠤᠯᠵᠤ᠂ | ᠠᠪᠤᠷᠠᠯ ᠳᠠᠭᠠᠳᠬᠠᠯ ᠬᠢᠯᠭᠡᠭᠰᠡᠨ ᠪᠠᠶᠢᠵᠠᠢ᠃ | ᠲᠤᠬᠠᠢ ᠶᠢᠨ ᠵᠢᠯ ᠤᠳ ᠲᠤ ᠤᠯᠠᠭᠠᠢ ᠭᠤᠣᠯ ᠤᠨ ᠤᠰᠤᠨ ᠰᠢᠰᠲ᠋ᠧᠮ ᠤᠨ ᠰᠧᠯᠵᠢ᠂ ᠢᠨᠵᠠᠭᠠᠨ᠂ | ᠭᠤᠷᠣᠬᠠᠨ᠂ ᠪᠠᠯᠭᠠᠷ᠂ ᠬᠤᠭᠤᠯᠠᠲᠦ᠂ ᠠᠯᠲᠠ᠂ ᠶᠡᠭᠡ ᠪᠠᠭᠠ ᠬᠤᠶᠠᠷ ᠵᠢᠷᠢ ᠪᠠ ᠰᠢᠯᠢ ᠶᠢᠨ ᠭᠤᠣᠯ᠂ ᠣᠶᠣᠲᠠᠢ | ᠶᠢᠨ ᠭᠤᠣᠯ ᠵᠡᠷᠭᠡ ᠠᠷᠪᠠᠨ ᠶᠡᠭᠡ ᠭᠤᠣᠯ ᠤᠳ ᠴᠦ ᠤᠯᠠᠭᠠᠢ ᠭᠤᠣᠯ ᠲᠠᠢ ᠤᠷᠤᠰᠬᠠᠯ ᠨᠡᠶᠢᠯᠡᠵᠦ᠂ ᠬᠠᠳᠠᠪᠴᠢ ᠪᠠᠷ | ᠬᠠᠯᠬᠠ ᠳᠤ ᠤᠷᠤᠰᠤᠨ ᠣᠷᠣᠵᠤ ᠴᠢᠨ᠋ᠸᠠ ᠭᠤᠣᠯ ᠳᠤ ᠴᠢᠳᠬᠤᠳᠠᠭ ᠪᠠᠶᠢᠭᠰᠠᠨ ᠭᠡᠨᠡ᠃ | ᠲᠣᠶᠢᠩᠺᠠᠷ ᠡᠩᠡ ᠲᠡᠷᠡ ᠤᠳᠠᠭᠠ ᠯᠠᠪᠷᠤᠩ ᠳᠤ ᠬᠦᠷᠴᠦ᠂ ᠵᠠᠮᠢᠶᠠᠨᠱᠠᠳᠪᠠ ᠶᠢᠨ ᠭᠡᠭᠡᠨ ᠳᠤ ᠮᠥᠷᠭᠦᠵᠦ | ᠬᠤᠰᠢᠭᠤ᠂ ᠬᠤᠲᠠᠯᠠ ᠪᠠᠨ ᠳᠠᠭᠠᠳᠬᠠᠵᠤ ᠠᠶᠢᠯᠠᠳᠬᠠᠭᠠᠳ ᠥᠪᠡᠷ ᠤᠨ ᠵᠣᠬᠢᠶᠠᠭᠰᠠᠨ ︽ᠵᠢᠷᠭᠠᠯᠠᠩᠲᠤ ᠨᠠᠢᠮᠠᠨ ᠮᠣᠷᠢ | ︾ ᠶᠢᠨ ᠰᠢᠯᠦᠭ ᠢᠶᠠᠨ ᠥᠭᠭᠦᠭᠰᠡᠨ ᠳᠤ ᠭᠡᠭᠡᠨ ᠠᠷᠤ ᠳᠡᠭᠡᠷᠡ ᠨᠢ ᠨᠢᠭᠡᠨ ᠡᠷᠡ ᠴᠠᠭᠠᠨ ᠠᠷᠰᠯᠠᠨ ᠵᠢᠷᠤᠵᠤ | ᠥᠭᠭᠦᠭᠡᠳ᠄ ︽ᠡᠶᠢᠮᠦ ᠰᠢᠨᠵᠢ ᠶᠢᠨ ᠯᠤᠤᠰ ᠢ ᠣᠯᠵᠤ ᠳᠠᠬᠢᠭᠠᠷᠠᠢ᠂ ᠡᠨᠡ ᠵᠢᠷᠤᠭ ᠢ ᠮᠣᠯᠣᠮ ᠪᠯᠠᠮᠠ ᠶᠢᠨ ᠭᠡᠭᠡᠨ | ᠳᠤ ᠪᠠᠷᠢ᠂ ᠲᠡᠷᠡ ᠮᠡᠳᠡᠬᠦ ᠶᠤᠮ᠃ ᠴᠢᠩᠭᠢᠭᠡᠳ ᠡᠨᠡ ᠰᠢᠯᠦᠭ ᠢᠶᠠᠨ ᠳᠠᠭᠤᠤ ᠪᠣᠯᠭᠠᠵᠤ ᠡᠳᠦᠷ ᠲᠤ ᠭᠤᠷᠪᠠᠨᠲᠠ | ᠳᠠᠭᠤᠯᠠᠭᠤᠯᠪᠠᠯ ᠦᠵᠦᠮᠦᠴᠢᠨ ᠳᠠᠶᠠᠭᠠᠷ ᠲᠤ ᠠᠮᠤᠭᠤᠯᠠᠩ ᠲᠠᠶᠢᠪᠤᠩ ᠪᠣᠯᠣᠨᠠ︾ ᠭᠡᠵᠤ ᠠᠶᠢᠯᠠᠳᠤᠭᠰᠠᠨ ᠭᠡᠳᠡᠭ᠃ | ᠴᠢᠩᠭᠢᠭᠡᠳ ᠮᠣᠯᠣᠮ ᠪᠯᠠᠮᠠ ᠶᠢᠨ ᠭᠡᠭᠡᠨ᠂ ᠲᠣᠶᠢᠩᠺᠠᠷ ᠡᠩᠡ ᠶᠢ ᠳᠠᠭᠠᠭᠤᠯᠵᠤ ᠮᠣᠷᠳᠠᠭᠠᠳ ᠤᠯᠠᠭᠠᠢ ᠭᠤᠣᠯ | ᠤᠨ ᠬᠤᠶᠢᠲᠤ ᠬᠥᠪᠡᠭᠡᠨ ᠳᠠᠬᠢ ᠠᠭᠤᠯᠠ ᠠᠰᠬᠠ ᠶᠢ ᠰᠢᠨᠵᠢᠵᠦ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠠᠷᠵᠠᠭᠠᠷ ᠪᠠᠷᠵᠠᠭᠠᠷ ᠬᠠᠳᠠ | ᠲᠠᠢ ᠠᠭᠤᠯᠠ ᠶᠢ ᠵᠢᠭᠠᠵᠤ᠄ ︽ᠡᠨᠡ ᠪᠣᠯ ᠡᠷᠡ ᠴᠠᠭᠠᠨ ᠠᠷᠰᠯᠠᠨ ᠵᠡᠭᠦᠨᠰᠢ ᠡᠷᠭᠢᠨ ᠬᠠᠷᠠᠵᠤ ᠪᠠᠶᠢᠬᠤ ᠰᠢᠨᠵᠢᠲᠡᠢ | ᠨᠣᠶᠠᠨ ᠯᠤᠤᠰ ᠪᠣᠯᠣᠨᠠ᠂ ᠣᠪᠣᠭᠠ ᠪᠣᠰᠬᠠᠵᠤ ᠳᠠᠬᠢᠭᠠᠳ ᠦᠵᠦᠮᠦᠴᠢᠨ ᠴᠢᠨ ᠸᠠᠩ ᠤᠨ ᠬᠠᠤᠯᠢ ᠶᠢᠨ ᠪᠢᠴᠢᠭ | ᠳᠠᠭᠤᠳᠠᠭᠤᠯᠪᠠᠯ᠂ ᠥᠬᠢᠨ ᠯᠤᠤᠰ ᠤᠯᠠᠭᠠᠢ ᠭᠤᠣᠯ᠂ ᠨᠣᠶᠠᠨ ᠯᠤᠤᠰ ᠤᠨ ᠤᠷᠢᠳᠠᠭᠤᠷ ᠤᠷᠤᠰᠴᠤ ᠭᠠᠷᠬᠤ ᠦᠭᠡᠢ | ᠪᠣᠯᠣᠨᠠ︾ ᠭᠡᠳ ᠡᠩᠭᠡᠷ ᠤᠨ ᠬᠢᠨᠢ ᠰᠢᠨᠠ ᠳᠡᠭᠡᠷᠡ ᠨᠠᠶᠠᠨ ᠵᠢᠩ ᠤᠨ ᠬᠦᠨᠳᠦ ᠲᠥᠷᠥ ᠶᠢᠨ ᠭᠢᠨᠵᠢ ᠲᠠᠯᠪᠢᠭᠠᠳ᠂ | ᠬᠤᠶᠢᠲᠤ ᠳᠡᠭᠡᠷᠡ ᠨᠢ ᠣᠪᠣᠭᠠᠨ ᠳᠠᠬᠢᠯᠭᠠ ᠶᠢᠨ ᠨᠠᠶᠢᠷ ᠥᠷᠨᠢᠭᠦᠯᠵᠦ᠂ ᠣᠪᠣᠭᠠ ᠪᠠᠨ ︽ᠠᠷᠰᠯᠠᠨ ᠣᠪᠣᠭᠠ︾ | ᠬᠡᠮᠡᠨ ᠨᠡᠷᠡᠯᠡᠵᠦ ᠨᠠᠶᠢᠷ ᠳᠡᠭᠡᠷᠡ ᠲᠣᠶᠢᠩᠺᠠᠷ ᠡᠩᠡ ᠶᠢᠨ ᠵᠣᠬᠢᠶᠠᠭᠰᠠᠨ ︽ᠵᠢᠷᠭᠠᠯᠠᠩᠲᠤ ᠨᠠᠢᠮᠠᠨ ᠮᠣᠷᠢᠨ ᠤ ᠳᠠᠭᠤᠤ︾ | ᠶᠢ ᠳᠠᠭᠤᠯᠠᠭᠤᠯᠵᠤ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠭᠡᠳᠡᠭ᠃ ᠲᠡᠷᠡ ᠳᠠᠭᠤᠤ ᠶᠢᠨ ᠰᠢᠯᠦᠭ ᠨᠢ᠄ | ᠢᠪᠡᠭᠡᠯ ᠤᠨ ᠡᠰᠡᠷᠡᠭ ᠴᠠᠭ ᠤᠨ ᠪᠣᠳᠢᠰᠠᠳᠠᠸᠠ | ᠢᠯᠡᠷᠬᠡᠢ ᠬᠥᠬᠡᠷᠡᠬᠦ ᠡᠩᠬᠡ ᠤᠯᠠᠷᠢᠯ | ᠢᠯᠡᠳᠲᠡ ᠨᠠᠢᠮᠠᠨ ᠠᠵᠢᠨᠠᠢ ᠮᠠᠩᠯᠠᠢ | ᠢᠳᠡᠷ ᠬᠥᠯᠥᠭ ᠵᠡᠭᠡᠷᠲᠡ ᠮᠣᠷᠢᠨ ᠤ ᠰᠦᠯᠳᠡ | ᠴᠢᠭᠢᠷᠠᠭ ᠪᠠᠲᠤ ᠳᠡᠯᠡᠬᠡᠢ ᠳ᠋ᠠᠬᠢᠨ ᠳᠤᠷ | ᠴᠢᠳᠠᠮᠠᠭᠠᠢ ᠠᠯᠳᠠᠷ ᠲᠦᠭᠡᠮᠡᠯ ᠳᠠᠭᠤᠷᠢᠰᠤᠭᠰᠠᠨ | ᠴᠢᠨᠠᠷ ᠬᠤᠪᠢ᠂ ᠵᠣᠬᠢᠶᠠᠯ ᠤᠨ ᠪᠠᠷᠢᠯᠳᠤᠯᠭᠠ ᠲᠠᠢ | ᠴᠢᠭᠤᠯᠭᠠᠨ ᠨᠣᠮᠣᠬᠠᠨ ᠬᠤᠩᠭᠤᠷ ᠮᠣᠷᠢᠨ ᠤ ᠰᠦᠯᠳᠡ | ᠰᠢᠯᠢᠳᠡᠭ ᠬᠤᠷᠴᠠ ᠲᠡᠭᠷᠢ ᠠᠴᠠ ᠵᠣᠬᠢᠶᠠᠯ ᠲᠠᠢ | ᠰᠢᠳᠢ ᠡᠷᠳᠡᠮ ᠥᠪᠡᠷ ᠢᠶᠠᠨ ᠪᠦᠷᠢᠳᠦᠭᠰᠡᠨ | ᠰᠢᠮᠡ ᠠᠬᠤᠢ ᠶᠢᠷᠲᠢᠨᠴᠦ ᠶᠢᠨ ᠲᠦᠰᠢᠯᠭᠡ | ᠰᠢᠨᠡᠬᠡᠨ ᠬᠢᠯᠪᠠᠷ ᠬᠡᠭᠡᠷ ᠮᠣᠷᠢᠨ ᠤ ᠰᠦᠯᠳᠡ | ᠬᠡᠰᠢᠭ ᠬᠥᠷᠥᠩᠭᠡ ᠶᠢᠨ ᠲᠤᠶᠢᠯ ᠤᠨ ᠰᠢᠲᠦᠭᠡᠨ | ᠬᠡᠯᠪᠡᠯᠵᠡᠨ ᠲᠣᠪᠴᠢᠯᠠᠬᠤ ᠠᠭᠲᠠ ᠶᠢᠨ ᠵᠢᠪᠬᠤᠯᠠᠩ | ᠬᠡᠯᠬᠢᠶᠡ ᠦᠨᠳᠦᠰᠦ ᠡᠵᠡᠨ ᠳᠡᠭᠡᠨ ᠵᠢᠳᠬᠦᠯᠲᠡᠢ | ᠬᠢᠴᠢᠶᠡᠩᠭᠦᠢ ᠠᠮᠤᠷᠬᠠᠨ ᠰᠠᠷᠠᠯ ᠮᠣᠷᠢᠨ ᠤ ᠰᠦᠯᠳᠡ | ᠬᠢᠮᠠᠭᠠᠳᠠᠬᠤ ᠶᠢᠨ ᠬᠦᠴᠦᠨ ᠢ ᠪᠦᠷᠢᠨ ᠠᠬᠤᠭᠤᠯᠤᠭᠰᠠᠨ | ᠬᠢᠯᠪᠠᠷ ᠢᠶᠠᠷ ᠰᠡᠳᠬᠢᠯ ᠢ ᠭᠦᠢᠴᠡᠳᠬᠡᠭᠴᠢ | ᠬᠢᠨᠠᠭ ᠦᠭᠡᠢ ᠡᠵᠡᠨ ᠳᠡᠭᠡᠨ ᠵᠢᠳᠬᠦᠯᠲᠡᠢ | ᠬᠢᠨᠠᠮᠠᠭᠠᠢ ᠳᠤᠭᠤᠢ ᠴᠣᠬᠤᠷ ᠮᠣᠷᠢᠨ ᠤ ᠰᠦᠯᠳᠡ | ᠨᠢᠭᠦᠯᠡᠰᠦᠩᠭᠦᠢ ᠶᠢᠨ ᠪᠤᠶᠠᠨ ᠠᠷᠢᠭᠤᠨ ᠴᠢᠨᠠᠷ ᠲᠠᠢ | ᠨᠢᠭᠡᠮᠦᠰᠦᠨ ᠭᠠᠪᠢᠶᠠ ᠪᠦᠲᠦᠭᠡᠬᠦ ᠴᠢᠳᠠᠯ ᠲᠠᠢ | ᠨᠡᠯᠢᠶᠡᠳ ᠬᠤᠷᠳᠤᠨ ᠴᠠᠬᠢᠯᠭᠠᠨ ᠭᠦᠶᠦᠳᠡᠯ ᠲᠠᠢ | ᠨᠢᠰᠬᠦ ᠮᠡᠲᠦ ᠪᠦᠷᠳᠡ ᠬᠠᠷᠠ ᠮᠣᠷᠢᠨ ᠤ ᠰᠦᠯᠳᠡ | ᠵᠢᠮᠡ ᠶᠣᠰᠣ ᠪᠡᠶᠡ ᠯᠦᠭᠡ ᠬᠠᠮᠲᠤᠳᠬᠠᠭᠰᠠᠨ | ᠵᠢᠷᠭᠠᠯᠠᠩ ᠠᠮᠤᠭᠤᠯᠠᠩ ᠬᠤᠣᠰᠯᠠᠨ ᠪᠦᠷᠢᠳᠦᠭᠰᠡᠨ | ᠵᠢᠯᠬᠠ ᠲᠠᠮᠢᠷ ᠳᠡᠯᠭᠡᠷᠡᠩᠭᠦᠢ ᠲᠡᠳᠬᠦᠮᠵᠢ ᠲᠠᠢ | ᠵᠢᠪᠬᠤᠯᠠᠩ ᠬᠦᠴᠦᠲᠦ ᠪᠣᠷᠣ ᠮᠣᠷᠢᠨ ᠤ ᠰᠦᠯᠳᠡ | ᠪᠢᠳᠠᠨ ᠤ ᠮᠣᠩᠭᠤᠯ ᠤᠨ ᠴᠣᠭᠲᠤ ᠰᠦᠷᠦᠭ | ᠪᠢᠰᠢᠷᠡᠨ ᠢᠲᠡᠭᠡᠬᠦ ᠤᠨᠤᠯᠭᠠ ᠶᠢᠨ ᠣᠬᠢ | ᠪᠠᠬᠢ ᠲᠤᠯᠭᠠᠭᠤᠷᠢ᠂ ᠲᠥᠷᠥ ᠶᠢᠨ ᠳᠡᠮᠵᠢᠯᠭᠡ | ᠪᠢᠯᠢᠭ ᠵᠢᠷᠤᠮᠲᠤ ᠴᠠᠭᠠᠨ ᠮᠣᠷᠢᠨ ᠤ ᠰᠦᠯᠳᠡ | ᠮᠢᠯᠠ ᠪᠣᠭᠳᠠ ᠶᠢᠨ ᠳᠠᠭᠤᠯᠠᠯ ᠤᠨ ᠳᠦᠷᠢᠮ | ᠮᠠᠷᠲᠠᠯ ᠦᠭᠡᠢ ᠲᠦᠮᠡᠨ ᠪᠠᠶᠠᠷ ᠤᠨ ᠡᠭᠦᠰᠬᠡᠯ | ᠮᠢᠨᠤ ᠰᠢᠯᠦᠭᠯᠡᠭᠰᠡᠨ ᠴᠢᠬᠢᠨ ᠤ ᠴᠢᠮᠡᠭ | ᠮᠢᠩᠭᠠᠨ ᠣᠨ ᠳᠤ ᠦᠷᠭᠦᠯᠵᠢᠳᠡ ᠪᠣᠯᠲᠤᠭᠠᠢ︕ | ᠬᠤᠶᠠᠷ᠂ ᠵᠢᠷᠣᠭᠠᠨ ᠵᠢᠷᠤᠭᠠ ᠤᠯᠠᠭᠠᠨ | ᠲᠣᠶᠢᠩᠺᠠᠷ ᠡᠩᠡ ᠬᠤᠰᠢᠭᠤ ᠨᠤᠲᠤᠭ ᠤᠨ ᠡᠮᠦᠨᠡ ᠠᠴᠠ ᠠᠪᠤᠷᠠᠯ ᠳᠠᠭᠠᠳᠬᠠᠯ ᠡᠷᠢᠬᠦ ᠪᠠᠷ ᠶᠠᠪᠤᠬᠤ ᠳᠠᠭᠠᠨ | ᠲᠡᠮᠡᠭᠡᠨ ᠠᠴᠢᠶᠠ᠂ ᠮᠣᠷᠢᠨ ᠲᠡᠷᠭᠡ ᠲᠠᠢ ᠶᠠᠪᠤᠭᠰᠠᠨ ᠭᠡᠨᠡ᠃ ᠲᠣᠶᠢᠩᠺᠠᠷ ᠡᠩᠡ ᠳᠤ ᠸᠠᠩᠭᠠᠢ ᠠᠴᠠ ᠲᠤᠰᠠᠬᠠᠢ | ᠪᠡᠯᠡᠳᠬᠡᠵᠦ ᠥᠭᠭᠦᠭᠰᠡᠨ ᠤᠯᠠᠭᠠᠨ ᠪᠦᠷᠢᠶᠡᠰᠦ᠂ ᠬᠥᠬᠡ ᠴᠢᠮᠬᠢᠶᠡᠷᠢ ᠲᠠᠢ᠂ ᠬᠠᠭᠠᠯᠭᠠ ᠴᠣᠩᠬᠤ ᠲᠠᠢ ᠪᠢᠲᠡᠭᠦᠦ ᠬᠠᠮ | ᠨᠢ ᠵᠣ ᠳᠡᠭᠡᠷᠡ ᠪᠠᠨ ᠬᠥᠬᠡ ᠰᠠᠭᠤᠷᠢ ᠲᠠᠢ ᠭᠠᠤᠯᠢᠨ ᠲᠤᠭ ᠲᠠᠢ ᠪᠥᠭᠡᠳ ᠨᠠᠷᠠᠨ ᠤ ᠬᠠᠯᠬᠠᠪᠴᠢ ᠪᠥᠰ ᠰᠧ ᠲᠠᠢ | ᠪᠠᠶᠢᠵᠤ᠂ ᠬᠥᠯᠦᠰᠢᠨ ᠮᠣᠷᠢ ᠨᠢ ᠴᠦ ᠵᠢᠢ ᠳ᠋ᠠ ᠮᠣᠨᠴᠤᠭ᠂ ᠬᠤᠳᠤᠷᠭᠠ ᠪᠦᠷᠢᠨ᠂ ᠲᠡᠷᠭᠡᠴᠢᠨ ᠨᠢ ᠤᠯᠠᠭᠠᠨ ᠭᠤᠣᠯ | ᠬᠠᠳᠬᠤᠭᠰᠠᠨ ᠲᠠᠪᠠᠭ ᠵᠠᠯᠭᠠᠠᠲᠦ ᠬᠠᠷᠠ ᠲᠣᠭᠤᠷᠴᠤᠭ ᠲᠠᠯᠪᠢᠵᠤ᠂ ᠠᠭᠤᠯᠠ ᠤᠰᠤᠨ ᠤ ᠵᠢᠷᠤᠭ ᠬᠠᠳᠬᠤᠮᠠᠯ ᠲᠠᠢ | ᠬᠠᠷᠠ ᠱᠠᠬᠠᠢ ᠡᠮᠦᠰᠴᠦ᠂ ᠰᠢᠯᠪᠢ ᠪᠠᠨ ᠪᠣᠭᠤᠴᠢᠬᠠᠭᠰᠠᠨ ᠶᠠᠭ ᠯᠡ ᠨᠢᠭᠡᠨ ᠬᠤᠰᠢᠭᠤᠨ ᠡᠵᠡᠨ ᠵᠠᠰᠠᠭ ᠰᠢᠤᠬᠠᠨ | ᠮᠣᠷᠢᠯᠠᠳᠠᠭ ᠳᠦᠷᠢᠮ ᠲᠠᠢ ᠪᠠᠶᠢᠵᠠᠢ᠃ | ᠵᠠᠮ ᠤᠨ ᠭᠤᠳᠣᠰ ᠲᠤ᠂ ᠨᠢᠭᠡᠨ ᠡᠳᠦᠷ ᠲᠡᠷᠭᠡᠨ ᠳᠤ ᠬᠥᠯᠥᠭᠰᠡᠨ ᠵᠢᠷᠤᠭᠠ ᠤᠯᠠᠭᠠᠨ ᠮᠣᠷᠢ ᠨᠢ ᠶᠠᠮᠠᠷ | ᠨᠢᠭᠡᠨ ᠶᠠᠭᠤᠮᠠᠨ ᠠᠴᠠ ᠦᠷᠭᠦᠵᠦ ᠬᠥᠭᠯᠡᠭᠰᠡᠨ ᠳᠤ ᠲᠡᠷᠭᠡᠴᠢᠨ ᠨᠢ ᠠᠭᠤᠷᠯᠠᠵᠤ᠂ ᠮᠣᠷᠢ ᠪᠠᠨ ᠭᠤᠶᠠᠳᠠᠵᠤ | ᠰᠢᠷᠦᠭᠦᠬᠡᠨ ᠶᠠᠪᠤᠭᠰᠠᠭᠠᠷ ᠣᠷᠣᠢ ᠬᠥᠰᠬᠡ ᠪᠠᠭᠤᠬᠤ ᠳᠤ ᠮᠣᠷᠢ ᠨᠢ ᠰᠤᠯᠠᠷᠠᠴᠢᠬᠠᠭᠰᠠᠨ ᠶᠤᠮ ᠭᠡᠨᠡ᠃ | ᠲᠡᠭᠡᠬᠦᠯᠡᠷ᠂ ᠲᠣᠶᠢᠩᠺᠠᠷ ᠡᠩᠡ ᠬᠡᠯᠡ ᠠᠮᠠ ᠦᠭᠡᠢ ᠠᠳᠤᠭᠤᠰᠤ ᠶᠢ ᠲᠠᠷᠴᠢᠯᠠᠵᠤ ᠴᠣᠬᠢᠬᠤᠯᠠᠷ | ᠬᠥᠭᠡᠷᠦᠬᠦᠶᠢᠯᠡᠵᠦ ᠪᠠᠰᠠ ᠠᠯᠤᠰ ᠤᠨ ᠵᠠᠮ ᠢ ᠲᠤᠭᠤᠯᠬᠤ ᠠᠶᠠᠨ ᠤ ᠬᠠᠨᠢ ᠬᠥᠯᠥᠭ ᠢᠶᠠᠨ ᠭᠠᠮᠨᠠᠬᠤ ᠶᠢ ᠲᠡᠷᠭᠡᠴᠢᠨ | ᠳᠡᠭᠡᠨ ᠰᠤᠷᠭᠠᠬᠤ ᠶᠢ ᠪᠣᠳᠣᠵᠤ᠂ ᠲᠡᠷᠡ ᠰᠥᠨᠢ ᠳᠡᠭᠡᠨ ᠬᠡᠳᠦᠨ ᠪᠠᠳᠠᠭ ᠰᠢᠯᠦᠭ ᠵᠣᠬᠢᠶᠠᠭᠰᠠᠨ ᠢᠶᠠᠨ ᠮᠠᠷᠭᠠᠰᠢ ᠨᠢ | ᠵᠠᠮ ᠶᠠᠪᠤᠵᠤ ᠪᠠᠶᠢᠬᠤ ᠳᠠᠭᠠᠨ ᠠᠶᠠᠯᠤᠭᠤᠯᠤᠨ ᠳᠠᠭᠤᠯᠠᠵᠤ ᠥᠭᠭᠦᠭᠰᠡᠨ ᠭᠡᠨᠡ᠃ ᠲᠡᠷᠡ ᠳᠠᠭᠤᠤ ᠶᠢᠨ ᠰᠢᠯᠦᠭ ᠨᠢ᠄ | ᠵᠢᠷᠣᠭᠠᠨ ᠵᠢᠷᠤᠭᠠ ᠤᠯᠠᠭᠠᠨ ᠢ ᠪᠠᠨ | ᠵᠢᠯᠣᠭᠤ ᠶᠢ ᠨᠢ ᠪᠢᠲᠡᠬᠡᠢ ᠲᠠᠯᠪᠢᠭᠠᠷᠠᠢ | ᠵᠣᠷᠢᠭᠰᠠᠨ ᠭᠠᠵᠠᠷ ᠬᠤᠯᠠᠬᠠᠨ ᠰᠢᠤ | ᠵᠣᠷᠢᠭ ᠢᠶᠠᠨ ᠪᠦᠦ ᠯᠡ ᠮᠣᠬᠤᠭᠠᠷᠠᠢ | ᠠᠨᠳᠤᠤ ᠭᠡᠳᠡᠭ ᠨᠢ ᠬᠤᠯᠠ ᠰᠢᠤ | ᠠᠷᠪᠠᠨ ᠰᠠᠷᠠ ᠶᠢᠨ ᠭᠠᠵᠠᠷ ᠰᠢᠤ | ᠠᠨᠳᠤᠤ ᠳᠠᠭᠠᠨ ᠮᠡᠨᠳᠦ ᠬᠦᠷᠬᠦ ᠶᠢ | ᠠᠨᠳᠤᠤ ᠶᠢᠨ ᠴᠤᠶᠢᠷᠵᠠᠩ ᠥᠷᠥᠰᠢᠶᠡ ᠳ᠋ᠠ | ᠭᠤᠮᠪᠣᠨ ᠭᠡᠳᠡᠭ ᠨᠢ ᠬᠤᠯᠠ ᠰᠢᠤ | ᠭᠤᠷᠪᠠᠨ ᠰᠠᠷᠠ ᠶᠢᠨ ᠭᠠᠵᠠᠷ ᠰᠢᠤ | ᠭᠤᠮᠪᠣᠨ ᠳᠠᠭᠠᠨ ᠮᠡᠨᠳᠦ ᠬᠦᠷᠬᠦ ᠶᠢ | ᠭᠤᠮᠪᠣᠨ ᠤ ᠴᠣᠶᠢᠷᠵᠠᠩ ᠥᠷᠥᠰᠢᠶᠡ ᠳ᠋ᠠ | ᠵᠤᠤ ᠭᠡᠳᠡᠭ ᠨᠢ ᠬᠤᠯᠠ ᠰᠢᠤ | ᠵᠢᠷᠭᠤᠭᠠᠨ ᠰᠠᠷᠠ ᠶᠢᠨ ᠭᠠᠵᠠᠷ ᠰᠢᠤ | ᠵᠤᠤ ᠳᠠᠭᠠᠨ ᠮᠡᠨᠳᠦ ᠬᠦᠷᠬᠦ ᠶᠢ | ᠵᠤᠤ ᠶᠢᠨ ᠴᠣᠶᠢᠷᠵᠠᠩ ᠥᠷᠥᠰᠢᠶᠡ ᠳ᠋ᠠ᠃ | ᠭᠤᠷᠪᠠ᠂ ᠪᠣᠭᠳᠠ ᠠᠭᠤᠯᠠ ᠶᠢᠨ ᠣᠷᠣᠢ | ᠲᠣᠶᠢᠩᠺᠠᠷ ᠡᠩᠡ ᠦᠵᠦᠮᠦᠴᠢᠨ ᠨᠣᠶᠠᠨ ᠲᠠᠢ ᠬᠠᠮᠲᠤ ᠠᠷᠤ ᠪᠣᠭᠳᠠ ᠶᠢᠨ ᠬᠦᠷᠢᠶᠡᠨ ᠳᠤ ᠣᠴᠢᠵᠤ ᠳᠠᠯᠠᠢ | ᠪᠯᠠᠮᠠ ᠳᠤ ᠮᠥᠷᠭᠦᠭᠰᠡᠨ ᠶᠤᠮ ᠭᠡᠨᠡ᠃ ᠲᠡᠭᠡᠭᠡᠳ ᠪᠤᠴᠠᠬᠤ ᠳᠠᠭᠠᠨ ᠬᠠᠯᠬᠠ ᠶᠢᠨ ᠪᠣᠭᠳᠠ ᠠᠭᠤᠯᠠ ᠶᠢ ᠢᠩᠭᠢᠵᠦ | ᠰᠢᠯᠦᠭᠯᠡᠵᠦ ᠳᠠᠭᠤᠯᠠᠭᠰᠠᠨ ᠭᠡᠳᠡᠭ᠃ ᠲᠡᠷᠡ ᠳᠠᠭᠤᠤ ᠶᠢᠨ ᠰᠢᠯᠦᠭ ᠨᠢ᠄ | ᠪᠣᠭᠳᠠ ᠠᠭᠤᠯᠠ ᠶᠢᠨ ᠣᠷᠣᠢ ᠳᠤ | ᠪᠤᠷᠬᠠᠨ ᠤ ᠬᠦᠷᠢᠶᠡ ᠲᠠᠲᠠᠨᠠ | ᠪᠤᠴᠠᠭᠠᠳ ᠬᠤᠶᠢᠰᠢ ᠪᠠᠨ ᠬᠠᠷᠠᠬᠤᠯᠠᠷ | ᠰᠠᠩ ᠤᠨ ᠤᠲᠤᠭᠠ ᠰᠡᠩᠰᠡᠷᠡᠨᠡ | ᠠᠯᠲᠠᠨ ᠰᠢᠷᠠ ᠭᠠᠨᠵᠢᠷᠠ ᠲᠠᠢ | ᠠᠭᠠᠷᠠᠤ ᠴᠦᠶ᠋ᠢᠤ ᠲᠤᠯᠭᠠᠭᠤᠷᠢ ᠲᠠᠢ | ᠠᠮᠢᠲᠠᠨ ᠤ ᠬᠦᠰᠡᠯ ᠢ ᠬᠠᠩᠭᠠᠭᠴᠢ | ᠠᠪᠤᠷᠠᠯ ᠤᠨ ᠳᠡᠭᠡᠳᠦ ᠣᠷᠣᠨ | ᠰᠢᠵᠢᠷ ᠠᠯᠲᠠᠨ ᠭᠠᠨᠵᠢᠷᠠ ᠲᠠᠢ | ᠰᠢᠯ ᠮᠥᠩᠭᠦᠨ ᠳᠡᠭᠡᠪᠦᠷ ᠲᠠᠢ | ᠰᠢᠨ ᠵᠢᠢ ᠵᠠᠯᠪᠤ ᠳᠠᠯᠠᠢ ᠪᠯᠠᠮᠠ | ᠰᠠᠭᠠᠲᠠᠵᠤ ᠨᠡᠶᠢᠯᠡᠭᠰᠡᠨ ᠬᠡᠶᠢᠳ | ᠤᠯᠠᠭᠠᠨ ᠠᠯᠲᠠᠨ ᠭᠠᠨᠵᠢᠷᠠ ᠲᠠᠢ | ᠣᠭ᠍ᠶᠤ ᠱᠢᠷᠦᠨ ᠲᠤᠯᠭᠠᠭᠤᠷᠢ ᠲᠠᠢ | ᠸᠴᠢᠷ ᠳ᠋ᠠᠷᠠ ᠳᠠᠯᠠᠢ ᠪᠯᠠᠮᠠ ᠳᠠᠭᠠᠨ | ᠤᠨᠠᠵᠤ ᠮᠥᠷᠭᠦᠭᠡᠳ ᠪᠠᠷᠠᠭᠠᠳᠠᠯᠠ᠃ | ᠳᠥᠷᠪᠡ᠂ ᠭᠠᠶᠢᠬᠠᠮᠰᠢᠭᠲᠤ ᠪᠯᠠᠮᠠ | ᠲᠣᠶᠢᠩᠺᠠᠷ ᠡᠩᠡ ᠨᠢᠭᠡ ᠵᠢᠯ ᠴᠢᠨ ᠸᠠᠩ ᠠᠯᠳᠠᠨᠬᠤᠶᠠᠭᠲᠤ ᠶᠢ ᠳᠠᠭᠠᠵᠤ ᠪᠡᠭᠡᠵᠢᠩ ᠤᠨ ᠵᠢᠰᠢᠶᠠᠨ ᠳᠤ | ᠶᠠᠪᠤᠭᠰᠠᠨ ᠪᠠᠶᠢᠵᠠᠢ᠃ | ᠪᠡᠭᠡᠵᠢᠩ ᠳᠤ ᠣᠴᠢᠭᠠᠳ ᠠᠯᠳᠠᠨᠬᠤᠶᠠᠭᠲᠤ ᠴᠢᠨ ᠸᠠᠩ ᠪᠣᠯᠣᠨ ᠲᠡᠭᠦᠨ ᠤ ᠳᠠᠭᠠᠭᠰᠠᠳ᠂ ᠨᠠᠢᠮᠠᠳᠤᠭᠠᠷ | ᠳᠦᠷᠢ ᠶᠢᠨ ᠪᠠᠨᠴᠢᠨ ᠪᠣᠭᠳᠠ ᠳᠤ ᠮᠥᠷᠭᠦᠵᠦ ᠲᠠᠪᠤᠨ ᠵᠠᠭᠤᠨ ᠯᠠᠩ ᠤᠨ ᠮᠥᠩᠭᠦ ᠪᠠᠷ ᠮᠠᠨᠳᠠᠯ ᠡᠷᠭᠦᠵᠡᠢ᠃ ᠲᠡᠳᠡ | ᠪᠤᠴᠠᠬᠤ ᠳᠠᠭᠠᠨ ᠲᠠᠬᠢᠨᠳᠠ ᠪᠣᠭᠳᠠ ᠳᠤ ᠮᠥᠷᠭᠦᠵᠦ ᠬᠤᠰᠢᠭᠤ ᠬᠤᠲᠠᠯᠠ ᠶᠢᠨ ᠡᠮᠦᠨᠡ ᠠᠴᠠ ᠳᠠᠭᠠᠳᠬᠠᠵᠤ ᠮᠢᠩᠭᠠᠨ | ᠯᠠᠩ ᠤᠨ ᠮᠠᠨᠳᠠᠯ ᠡᠷᠭᠦᠭᠰᠡᠨ ᠶᠤᠮ ᠭᠡᠨᠡ᠃ ᠲᠡᠳᠡᠨ ᠢ ᠮᠥᠷᠭᠦᠵᠦ ᠪᠠᠷᠠᠭᠠᠳ ᠪᠠᠭᠤᠳᠠᠯ ᠳᠠᠭᠠᠨ ᠬᠦᠷᠦᠬᠦᠯᠡᠷ | ᠪᠣᠭᠳᠠ ᠶᠢᠨ ᠳᠡᠷᠭᠡᠳᠡ ᠶᠢᠨ ᠱᠠᠪᠢᠨᠠᠷ ᠤᠳ ᠬᠤᠶᠢᠨᠠ ᠠᠴᠠ ᠨᠢ ᠢᠷᠠᠵᠤ ᠬᠤᠶᠠᠷ ᠤᠳᠠᠭᠠ ᠶᠢᠨ ᠮᠠᠨᠳᠠᠯ ᠪᠠᠷᠢᠭᠰᠠᠨ | ᠮᠥᠩᠭᠦ ᠶᠢ ᠨᠢ ᠤᠭ ᠬᠡᠪ ᠢᠶᠠᠷ ᠨᠢ ᠪᠤᠴᠠᠭᠠᠵᠤ᠂ ᠳᠡᠭᠡᠷᠡ ᠨᠢ ᠲᠠᠪᠤᠨ ᠯᠠᠩ ᠮᠥᠩᠭᠦ ᠨᠡᠮᠡᠵᠦ᠂ ᠪᠣᠭᠳᠠ ᠠᠴᠠ | ᠦᠵᠦᠮᠦᠴᠢᠨ ᠤ ᠥᠭᠯᠢᠭᠡ ᠶᠢᠨ ᠡᠵᠡᠳ ᠲᠤ ᠬᠦᠷᠲᠡᠭᠡᠭᠰᠡᠨ ᠯᠠᠩ ᠬᠡᠰᠢᠭ ᠭᠡᠵᠤ ᠷᠠᠰᠢᠶᠠᠨ᠂ ᠤᠲᠤᠯᠭᠠ᠂ ᠵᠠᠩᠭᠢᠶᠠ | ᠲᠡᠷᠢᠭᠦᠲᠡᠨ ᠰᠣᠶᠣᠷᠬᠠᠭᠰᠠᠨ ᠭᠡᠨᠡ᠃ | ᠡᠭᠦᠨ ᠢ ᠦᠵᠡᠭᠡᠳ ᠲᠣᠶᠢᠩᠺᠠᠷ ᠡᠩᠡ ᠶᠢᠨ ᠰᠡᠳᠬᠢᠯ ᠬᠥᠳᠡᠯᠵᠦ ︽ᠦᠨᠡᠨ ᠪᠣᠭᠳᠠ︾ ᠭᠠᠶᠢᠬᠠᠮᠰᠢᠭᠲᠤ | ᠪᠯᠠᠮᠠ ᠬᠡᠮᠡᠨ ᠰᠦᠵᠢᠭᠯᠡᠨ ᠪᠢᠰᠢᠷᠡᠵᠦ᠂ ︽ᠭᠠᠶᠢᠬᠠᠮᠰᠢᠭᠲᠤ ᠪᠯᠠᠮᠠ︾ ᠭᠡᠬᠦ ᠳᠠᠭᠤᠤ ᠶᠢ ᠵᠣᠬᠢᠶᠠᠨ᠂ ᠪᠠᠨᠴᠢᠨ | ᠪᠣᠭᠳᠠ ᠶᠢ ᠨᠠᠢᠮᠠᠨ ᠳᠠᠬᠢᠯ ᠢᠶᠠᠷ ᠮᠠᠭᠲᠠᠵᠤ ᠰᠢᠯᠦᠭᠯᠡᠭᠰᠡᠨ ᠭᠡᠯᠴᠡᠳᠡᠭ᠃ ᠳᠠᠭᠤᠤ ᠶᠢᠨ ᠰᠢᠯᠦᠭ ᠨᠢ᠄ | ᠭᠠᠶᠢᠬᠠᠮᠰᠢᠭᠲᠤ ᠪᠯᠠᠮᠠ ᠶᠢ ᠪᠠᠨ | ᠬᠠᠮᠤᠭ ᠣᠯᠠᠨ ᠢᠶᠠᠷ ᠢᠶᠠᠨ ᠴᠤᠭᠯᠠᠷᠠᠮᠠᠨ | ᠬᠠᠭᠠᠴᠠᠯᠳᠠ ᠦᠭᠡᠢ ᠰᠡᠳᠬᠢᠯ ᠢᠶᠠᠷ | ᠬᠠᠩᠭᠠᠬᠤ ᠶᠢᠨ ᠢᠷᠦᠭᠡᠯ ᠢ ᠲᠠᠯᠪᠢᠰᠤᠭᠠᠢ | ᠥᠩᠭᠡ ᠨᠢ ᠭᠤᠷᠪᠠ ᠶᠣᠯᠠᠪ ᠲᠠᠢ | ᠦᠵᠡᠰᠬᠦᠯᠡᠩ ᠤᠨ ᠳᠡᠭᠡᠳᠦ ᠰᠢᠬᠦᠷ ᠢᠶᠠᠨ | ᠦᠯᠡᠮᠵᠢ ᠳᠡᠭᠡᠳᠦ ᠪᠣᠭᠳᠠ ᠳᠠᠭᠠᠨ ᠡᠷᠭᠦᠭᠡᠳ | ᠦᠨᠡᠨ ᠠᠷᠢᠭᠤᠨ ᠰᠦᠵᠢᠭ ᠢᠶᠠᠷ ᠮᠥᠷᠭᠦᠶᠡ | ᠠᠯᠲᠠᠨ ᠨᠢᠳᠦ ᠲᠠᠢ ᠵᠢᠭᠠᠰᠤ ᠨᠢ | ᠠᠷᠢᠭᠤᠨ ᠳᠠᠯᠠᠢ ᠳᠠᠭᠠᠨ ᠴᠡᠩᠭᠡᠨᠡ | ᠠᠪᠤᠷᠠᠯ ᠤᠨ ᠳᠡᠭᠡᠳᠦ ᠪᠣᠭᠳᠠ ᠮᠢᠨᠢ | ᠠᠮᠢᠲᠠᠨ ᠤ ᠬᠦᠰᠡᠯ ᠢ ᠬᠠᠩᠭᠠᠲᠤᠭᠠᠢ | ᠨᠠᠰᠤᠨ ᠰᠢᠳᠢ ᠶᠢ ᠰᠣᠶᠣᠷᠬᠠᠭᠴᠢ | ᠨᠠᠮᠵᠢᠯ ᠨᠡᠷᠡᠲᠡᠢ ᠪᠤᠮᠪᠠᠨ | ᠨᠠᠩᠴᠢᠳ ᠷᠠᠰᠢᠶᠠᠨ ᠢ ᠪᠦᠲᠦᠭᠡᠭᠡᠳ | ᠨᠢᠰᠧᠨᠢᠰ ᠤᠨ ᠭᠭᠢᠷ ᠢ ᠠᠷᠢᠯᠭᠠᠲᠤᠭᠠᠢ | ᠤᠷᠭᠤᠮᠠᠯ ᠤᠨ ᠳᠡᠭᠡᠳᠦ ᠮᠠᠩᠯᠠᠢ | ᠤᠳᠪᠠᠯᠠ ᠯᠢᠩᠬᠤᠠ ᠴᠡᠴᠡᠭ ᠢᠶᠠᠨ | ᠣᠷᠣᠢ ᠶᠢᠨ ᠴᠢᠮᠡᠭ ᠪᠣᠭᠳᠠ ᠳᠠᠭᠠᠨ | ᠣᠨᠴᠠᠯᠠᠨ ᠡᠷᠭᠦᠭᠡᠳ ᠮᠥᠷᠭᠦᠶᠡ | ᠡᠷᠭᠢᠬᠦ ᠶᠢᠨ ᠵᠥᠪ ᠢᠶᠠᠷ ᠡᠷᠭᠢᠳᠡᠭ | ᠡᠭᠡᠰᠢᠭ ᠳᠠᠭᠤ ᠲᠠᠢ ᠯᠠᠪᠠᠢ ᠨᠢ | ᠡᠷᠳᠡᠮ ᠨᠣᠮ ᠤᠨ ᠬᠤᠷᠠᠯ ᠳᠠᠭᠠᠨ | ᠡᠭᠦᠷᠢᠳᠡ ᠬᠠᠮᠲᠤ ᠪᠠᠷ ᠳᠠᠭᠤᠷᠢᠰᠤᠭᠠᠰᠠᠢ | ᠦᠯᠡᠮᠵᠢ ᠮᠥᠷ ᠤᠨ ᠪᠡᠯᠭᠡ | ᠦᠷᠭᠦᠯᠵᠢ ᠶᠢᠨ ᠵᠠᠯᠭᠠᠭᠠᠳ ᠰᠦᠯᠵᠢᠮᠡᠯ | ᠦᠨᠡᠨ ᠠᠷᠢᠭᠤᠨ ᠰᠦᠵᠢᠭᠲᠡᠨ ᠨᠦᠭᠦᠳ | ᠦᠷᠭᠦᠯᠵᠢ ᠬᠠᠮᠲᠤ ᠪᠠᠷ ᠳᠠᠭᠠᠰᠤᠭᠠᠢ | ᠲᠤᠸᠠᠽᠠ ᠶᠢᠨ ᠠᠷᠢᠭᠤᠨ ᠪᠠᠯᠭᠠᠰᠤ | ᠲᠠᠩᠰᠤᠭ ᠤᠨ ᠳᠡᠭᠡᠳᠦ ᠣᠷᠳᠣᠨ | ᠲᠠᠭᠠᠯᠠᠨ ᠳᠤᠷᠠ ᠪᠠᠷ ᠢᠶᠠᠨ ᠰᠠᠭᠠᠲᠠᠬᠤ ᠶᠢ | ᠲᠠᠨ ᠤ ᠬᠦᠰᠡᠯ ᠬᠠᠩᠭᠠᠲᠤᠭᠠᠢ | ᠮᠢᠩᠭᠠᠨ ᠬᠡᠰᠢᠭᠲᠦ ᠬᠦᠷᠳᠦ | ᠮᠢᠷᠠᠯᠵᠠᠨ ᠡᠷᠭᠢᠬᠦ ᠴᠢᠨᠳᠠᠮᠤᠨᠢ | ᠮᠠᠩᠯᠠᠢ ᠶᠢᠨ ᠳᠡᠭᠡᠳᠦ ᠪᠣᠭᠳᠠ ᠳᠠᠭᠠᠨ | ᠮᠠᠨᠳᠠᠯ ᠢᠶᠠᠨ ᠡᠷᠭᠦᠭᠡᠳ ᠮᠥᠷᠭᠦᠶᠡ | ᠨᠠᠢᠮᠠᠨ ᠳᠠᠬᠢᠯ ᠤᠨ ᠰᠢᠯᠦᠭ ᠢᠶᠠᠨ | ᠨᠠᠶᠢᠷ ᠤᠨ ᠮᠠᠩᠯᠠᠢ ᠳᠤ ᠡᠷᠭᠦᠶᠡ | ᠨᠠᠷᠠ ᠪᠠᠨᠴᠢᠨ ᠪᠣᠭᠳᠠ ᠳᠠᠭᠠᠨ | ᠨᠠᠭᠠᠳᠤᠮ ᠤᠨ ᠴᠢᠮᠡᠭ ᠢᠶᠠᠷ ᠰᠣᠨᠣᠷᠳᠠᠭᠤᠯᠤᠶᠠ | ᠰᠠᠶᠢᠲᠤᠷ ᠨᠠᠢᠮᠠᠨ ᠳᠠᠬᠢᠯ ᠢᠶᠠᠨ | ᠰᠠᠨᠰᠠᠷ ᠤᠨ ᠲᠠᠩᠨᠠᠢ ᠳᠤ ᠮᠢᠷᠠᠯᠵᠠᠭᠤᠯᠤᠶᠠ | ᠱᠠᠰᠢᠨ ᠤ ᠳᠡᠭᠡᠳᠦ ᠪᠣᠭᠳᠠ ᠳᠠᠭᠠᠨ | ᠰᠠᠴᠤᠯᠢ ᠡᠷᠭᠦᠭᠡᠳ ᠮᠥᠷᠭᠦᠶᠡ᠃ | ᠲᠠᠪᠤ᠂ ᠠᠷᠤ ᠵᠤᠤ ᠳᠠᠭᠠᠨ ᠰᠦᠵᠢᠭ ᠲᠠᠢ | ᠤᠷᠢᠳᠤ ᠨᠢᠭᠡ ᠵᠢᠯ᠂ ᠦᠵᠦᠮᠦᠴᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠵᠠᠰᠠᠭ ᠲᠥᠷᠥ ᠶᠢᠨ ᠬᠤᠱᠣᠢ ᠰᠡᠴᠡᠨ ᠴᠢᠨ | ᠸᠠᠩ ᠰᠣᠳᠨᠠᠮᠷᠠᠪᠳᠠᠨ ᠵᠤᠤ ᠤᠳᠠ ᠶᠢᠨ ᠴᠢᠭᠤᠯᠭᠠᠨ ᠤ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠤ ᠭᠢᠯᠪᠡᠷ ᠵᠤᠤ ︵ᠪᠠᠰᠠ | ᠴᠠᠭᠠᠨ ᠤᠲᠠᠢ ᠭᠡᠳᠡᠭ︶ ᠳᠤ ᠮᠥᠷᠭᠦᠬᠦ ᠪᠠᠷ ᠣᠴᠢᠬᠤ ᠳᠠᠭᠠᠨ᠂ ᠰᠡᠦᠬᠡᠨ ᠳᠡᠭᠡᠨ ᠰᠠᠭᠤᠭᠰᠠᠨ ᠦᠭᠡᠢ ᠶᠠᠪᠠᠭᠠᠨ | ᠢᠶᠠᠷ ᠶᠠᠪᠤᠵᠤ ᠢᠷᠡᠭᠰᠡᠨ ᠭᠡᠳᠡᠭ᠃ ᠨᠣᠶᠠᠨᠲᠠᠨ ᠢ ᠮᠣᠷᠢᠯᠠᠵᠤ ᠪᠠᠶᠢᠬᠤ ᠳᠤ ᠨᠢᠭᠡ ᠡᠳᠦᠷ ᠲᠡᠭᠷᠢ ᠮᠠᠭᠤᠬᠠᠶᠢᠷᠠᠵᠤ | ᠰᠠᠯᠬᠢ ᠲᠣᠭᠤᠰᠣ ᠳᠡᠭᠳᠡᠵᠦ᠂ ᠳᠠᠪᠠᠭᠠᠨ ᠣᠷᠣᠢ᠂ ᠵᠠᠮ ᠤᠨ ᠭᠤᠣᠯ ᠳᠤ ᠪᠠᠷᠰ ᠬᠡᠪᠲᠡᠭᠡ ᠲᠠᠭᠠᠷᠠᠭᠰᠠᠨ ᠭᠡᠨᠡ᠃ | ᠨᠣᠶᠠᠨᠲᠠᠨ ᠲᠡᠭᠡᠭᠡᠳ ᠲᠥᠷᠥ ᠶᠢᠨ ᠳᠡᠪᠡᠯ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠴᠦ ᠵᠡᠭᠦᠭᠡᠳ᠂ ᠲᠦᠰᠢᠮᠡᠳ ᠢᠶᠠᠷ ᠵᠠᠮ | ᠤᠳᠤᠷᠢᠳᠤᠭᠤᠯᠤᠨ ᠪᠠᠷᠰ ᠤᠨ ᠬᠠᠷᠠᠭᠳᠠᠬᠤ ᠭᠠᠵᠠᠷ ᠲᠤ ᠣᠴᠢᠵᠤ ᠳᠥᠷᠪᠡᠨ ᠬᠥᠯ ᠲᠠᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠦᠵᠢᠰ | ᠤᠨ ᠬᠦᠯᠢᠯ ᠳᠤ ᠶᠢᠰᠦᠨ ᠤᠷᠲᠤ ᠬᠦᠵᠢ ᠤᠩᠭᠤᠰᠬᠠᠵᠤ ᠲᠡᠭᠷᠢ ᠳᠤ ᠮᠥᠷᠭᠦᠨ᠄ ︽ᠲᠡᠭᠷᠢ ᠶᠢᠨ ᠪᠣᠱᠣᠭᠤ ᠪᠠᠷ | ᠤᠯᠠᠷᠢᠯ ᠢ ᠨᠡᠭᠡᠭᠡᠭᠰᠡᠨ ᠶᠡᠭᠡ ᠳᠠᠶᠢᠴᠢᠩ ᠭᠦᠷᠦᠨ ᠤ ᠲᠣᠯᠣᠭᠠᠢ ᠲᠥᠷᠥ ᠶᠢᠨ ᠬᠤᠱᠣᠢ ᠰᠡᠴᠡᠨ ᠴᠢᠨ ᠸᠠᠩ | ᠰᠣᠳᠨᠠᠮᠷᠠᠪᠲᠠᠨ ᠪᠡᠶᠡ ᠪᠠᠷ ᠮᠣᠷᠢᠯᠠᠵᠤ ᠪᠠᠶᠢᠬᠤ ᠳᠤ ᠠᠭᠤᠯᠠ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠤᠳ ᠲᠣᠭᠰᠢᠨ ᠵᠡᠷᠯᠢᠭ | ᠠᠷᠢᠶᠠᠲᠠᠨ ᠢ ᠵᠠᠮ ᠭᠡᠷᠦᠭᠦᠯᠭᠦ ᠨᠢ ᠶᠠᠭᠤᠨ︖ ᠠᠭᠤᠯᠠ ᠶᠢᠨ ᠨᠣᠶᠠᠨ ᠣᠢ ᠳᠠᠭᠠᠨ ᠪᠤᠴᠠᠵᠤ᠂ ᠤᠯᠤᠰ ᠤᠨ ᠨᠣᠶᠠᠨ | ᠵᠠᠮ ᠥᠩᠭᠡᠷᠡᠨᠡ︾ ᠬᠡᠮᠡᠨ ᠥᠨᠳᠥᠷ ᠳᠠᠭᠤᠨ ᠢᠶᠠᠷ ᠰᠢᠪᠰᠢᠭᠰᠡᠨ ᠳᠤ ᠲᠡᠷᠡ ᠪᠠᠷᠰ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ | ᠠᠭᠤᠯᠠᠨ ᠠᠴᠠ ᠪᠠᠭᠤᠵᠤ ᠣᠢ ᠳᠤ ᠰᠢᠷᠭᠤᠨ ᠵᠠᠮ ᠲᠠᠯᠪᠢᠵᠤ ᠥᠭᠭᠦᠭᠰᠡᠨ ᠶᠤᠮ ᠭᠡᠨᠡ᠃ | ᠨᠣᠶᠠᠨᠲᠠᠨ ᠢ ᠣᠷᠳᠣᠨ ᠳᠠᠭᠠᠨ ᠮᠣᠷᠢᠯᠠᠵᠤ ᠪᠠᠭᠤᠭᠰᠠᠨ ᠳᠠᠷᠤᠢ ᠳᠤ ᠴᠢᠯᠡᠭᠡ ᠲᠠᠶᠢᠯᠬᠤ ᠬᠤᠷᠢᠮ ᠨᠠᠶᠢᠷ | ᠥᠷᠨᠢᠭᠦᠯᠵᠦ᠂ ᠵᠢᠷᠠᠨ ᠳᠦᠷᠪᠡᠨ ᠪᠥᠬᠡ ᠪᠠᠷᠢᠯᠳᠤᠭᠤᠯᠵᠤ ᠮᠧᠶ᠋ᠢᠩ ᠬᠠᠷᠪᠤᠨ᠂ ᠱᠣᠭᠴᠢᠨ ᠨᠠᠰᠤᠨᠪᠥ᠋ᠬᠡ ᠪᠠᠷ ᠱᠤᠭ | ᠭᠠᠷᠭᠠᠭᠤᠯᠵᠤ ᠨᠣᠶᠠᠨ ᠢ ᠪᠠᠶᠠᠰᠬᠠᠵᠤ ᠪᠠᠶᠢᠬᠤ ᠳᠤ ᠲᠣᠶᠢᠩᠺᠠᠷ ᠡᠩᠡ ᠡᠨᠡ ᠳᠠᠭᠤᠤ ᠶᠢ ᠵᠣᠬᠢᠶᠠᠵᠤ ᠳᠠᠭᠤᠯᠠᠵᠤ | ᠡᠷᠭᠦᠭᠰᠡᠨ ᠭᠡᠳᠡᠭ᠃ ᠲᠡᠷᠡ ᠳᠠᠭᠤᠤ ᠶᠢᠨ ᠰᠢᠯᠦᠭ ᠨᠢ᠄ | ᠠᠷᠤ ᠵᠤᠤ ᠳᠠᠭᠠᠨ ᠰᠦᠵᠢᠭ ᠲᠠᠢ | ᠠᠷᠢᠶᠠᠪᠠᠯᠤ ᠶᠢᠨ ᠳᠦᠷᠢᠮ ᠲᠠᠢ | ᠠᠮᠢᠲᠠᠨ ᠠᠴᠠ ᠢᠯᠡᠭᠦᠦ ᠪᠤᠶᠠᠨ ᠲᠠᠢ | ᠡᠵᠡᠨ ᠤ ᠲᠠᠮᠠᠭᠠ ᠲᠠᠢ ᠴᠢᠨ ᠸᠠᠩ ᠨᠣᠶᠠᠨ ᠡ︕ | ᠤᠯᠠᠭᠠᠨ ︵ᠴᠦ︶ ᠬᠤᠶᠠᠷ ᠵᠢᠭᠠᠩ ᠲᠠᠢ | ᠤᠷᠠᠨ ︵ᠴᠦ︶ ᠬᠤᠶᠠᠷ ᠬᠦᠨᠢᠶᠠᠩ ᠲᠠᠢ | ᠤᠯᠤᠰ ᠠᠴᠠ ᠢᠯᠡᠭᠦᠦ ᠪᠤᠶᠠᠨ ᠲᠠᠢ | ᠡᠵᠡᠨ ᠤ ᠲᠠᠮᠠᠭᠠ ᠲᠠᠢ ᠴᠢᠨ ᠸᠠᠩ ᠨᠣᠶᠠᠨ ᠡ︕ | ᠰᠧ ᠤᠨ ︵ᠴᠦ︶ ᠬᠤᠶᠠᠷ ᠣᠷᠳᠣᠨ ᠲᠠᠢ | ᠰᠡᠷᠭᠦᠯᠡᠩ ᠬᠤᠶᠠᠷ ᠭᠦᠨᠢᠶᠠᠩ ᠲᠠᠢ | ᠰᠢᠯᠵᠢᠰᠢ ᠦᠭᠡᠢ ᠶᠡᠭᠡ ᠪᠤᠶᠠᠨ ᠲᠠᠢ | ᠡᠵᠡᠨ ᠤ ᠲᠠᠮᠠᠭᠠ ᠲᠠᠢ ᠴᠢᠨ ᠸᠠᠩ ᠨᠣᠶᠠᠨ ᠡ︕ | ᠳᠠᠯᠠᠢ ᠡᠵᠢ ᠳᠡᠭᠡᠨ ᠴᠦᠹᠧᠩ ᠲᠠᠢ | ᠳᠠᠪᠤᠰᠤᠨ ᠰᠦᠮᠡ ᠳᠡᠭᠡᠨ ᠬᠤᠷᠠᠯ ᠲᠠᠢ | ᠲᠠᠰᠤᠷᠠᠯ ᠦᠭᠡᠢ ᠶᠡᠭᠡ ᠪᠤᠶᠠᠨ ᠲᠠᠢ | ᠡᠵᠡᠨ ᠤ ᠲᠠᠮᠠᠭᠠ ᠲᠠᠢ ᠴᠢᠨ ᠸᠠᠩ ᠨᠣᠶᠠᠨ ᠡ︕ | ᠵᠢᠷᠭᠤᠭᠠ᠂ ᠬᠠᠨ ᠠᠭᠤᠯᠠ ᠶᠢᠨ ᠰᠡᠭᠦᠳᠡᠷ | ᠦᠵᠦᠮᠦᠴᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠤᠯᠠᠭᠠᠨ ᠬᠠᠭᠠᠯᠭᠠ ᠰᠦᠮᠡ ᠶᠢᠨ ᠰᠢᠷᠡᠭᠡᠨ ᠪᠯᠠᠮᠠ ᠸᠴᠢᠷ ᠳ᠋ᠠᠷᠠ | ᠪᠠᠭᠰᠢ ᠶᠢᠨ ᠭᠡᠭᠡᠨ ᠤ ᠨᠢᠭᠡᠨ ᠳᠦᠷᠢ ᠶᠢ ᠵᠠᠯᠠᠬᠤ ᠵᠠᠯᠠᠯᠭᠠ ᠶᠢᠨ ᠨᠠᠶᠢᠷ ᠲᠤ ᠬᠦᠷᠦᠭᠡᠳ ᠲᠣᠶᠢᠩᠺᠠᠷ ᠡᠩᠡ ᠡᠨᠡ | ᠳᠠᠭᠤᠤ ᠶᠢ ᠵᠣᠬᠢᠶᠠᠭᠰᠠᠨ ᠭᠡᠯᠴᠡᠳᠡᠭ᠃ | ᠬᠠᠨ ᠠᠭᠤᠯᠠ ᠶᠢᠨ ᠰᠡᠭᠦᠳᠡᠷ ᠨᠢ | ᠬᠠᠵᠠᠭᠤ ᠳᠡᠭᠡᠷᠡ ᠪᠠᠨ ᠲᠣᠳᠣᠷᠬᠠᠢ | ᠬᠠᠮᠪᠤ ᠪᠠᠭᠰᠢ ᠶᠢᠨ ᠭᠡᠭᠡᠨ ᠨᠢ | ᠮᠠᠨ ᠤ ᠳᠡᠭᠡᠷᠡ ᠪᠠᠨ ᠲᠣᠳᠣᠷᠬᠠᠢ | ᠪᠣᠭᠳᠠ ᠠᠭᠤᠯᠠ ᠶᠢᠨ ᠰᠡᠭᠦᠳᠡᠷ ᠨᠢ | ᠪᠤᠷᠤᠭᠤ ᠬᠠᠵᠠᠭᠤ ᠳᠡᠭᠡᠷᠡ ᠪᠠᠨ ᠲᠣᠳᠣᠷᠬᠠᠢ | ᠪᠤᠷᠬᠠᠨ ᠪᠠᠭᠰᠢ ᠶᠢᠨ ᠭᠡᠭᠡᠨ ᠨᠢ | ᠮᠠᠨ ᠤ ᠳᠡᠭᠡᠷᠡ ᠪᠠᠨ ᠲᠣᠳᠣᠷᠬᠠᠢ | ᠡᠷᠳᠡᠨᠢ ᠠᠭᠤᠯᠠ ᠶᠢᠨ ᠰᠡᠭᠦᠳᠡᠷ ᠨᠢ | ᠡᠩᠭᠡᠷ ᠳᠡᠭᠡᠷᠡ ᠪᠠᠨ ᠲᠣᠳᠣᠷᠬᠠᠢ | ᠡᠷᠳᠡᠮ ᠲᠠᠢ ᠪᠠᠭᠰᠢ ᠶᠢᠨ ᠭᠡᠭᠡᠨ ᠨᠢ | ᠮᠠᠨ ᠤ ᠳᠡᠭᠡᠷᠡ ᠪᠠᠨ ᠲᠣᠳᠣᠷᠬᠠᠢ | ᠬᠤᠳᠤᠷᠭᠠ ᠶᠢᠨ ᠳᠤᠮᠳᠠ ᠪᠠᠨ ᠵᠣᠬᠢᠷᠠᠭᠰᠠᠨ | ᠬᠤᠯᠠ ᠬᠠᠯᠵᠠᠨ ᠯᠠᠭᠤᠰᠠ | ᠬᠤᠷᠠᠯ ᠤᠨ ᠳᠤᠮᠳᠠ ᠪᠠᠨ ᠵᠣᠬᠢᠷᠠᠭᠰᠠᠨ | ᠮᠠᠨ ᠤ ᠪᠠᠭᠰᠢ ᠶᠢᠨ ᠭᠡᠭᠡᠨ | ᠡᠷᠪᠡᠯᠵᠢ ᠶᠢᠨ ᠳᠤᠮᠳᠠ ᠪᠠᠨ ᠵᠣᠬᠢᠷᠠᠭᠰᠠᠨ | ᠡᠷᠡᠭᠭᠡᠲᠡ ᠬᠠᠯᠵᠠᠨ ᠯᠠᠭᠤᠰᠠ | ᠡᠷᠢᠬᠡ ᠶᠢᠨ ᠳᠤᠮᠳᠠ ᠪᠠᠨ ᠵᠣᠬᠢᠷᠠᠭᠰᠠᠨ | ᠮᠠᠨ ᠤ ᠪᠠᠭᠰᠢ ᠶᠢᠨ ᠭᠡᠭᠡᠨ | ᠣᠭᠤᠰᠣᠷ ᠤᠨ ᠳᠤᠮᠳᠠ ᠪᠠᠨ ᠵᠣᠬᠢᠷᠠᠭᠰᠠᠨ | ᠣᠷᠳᠣᠨ ᠴᠠᠭᠠᠨ ᠥᠷᠭᠦᠭᠡ | ᠣᠯᠪᠣᠭ ᠤᠨ ᠳᠤᠮᠳᠠ ᠪᠠᠨ ᠵᠣᠬᠢᠷᠠᠭᠰᠠᠨ | ᠮᠠᠨ ᠤ ᠪᠠᠭᠰᠢ ᠶᠢᠨ ᠭᠡᠭᠡᠨ | ᠡᠷᠭᠢ ᠲᠣᠬᠤᠢ ᠶᠢᠨ ᠤᠰᠤ ᠨᠢ | ᠡᠷᠭᠢ ᠪᠠᠨ ᠳᠠᠭᠠᠭᠠᠳ ᠤᠷᠤᠰᠤᠨᠠ | ᠡᠩᠭᠡᠷ ᠵᠢᠷᠭᠤᠭᠠᠨ ᠬᠡᠶᠢᠳ ᠨᠢ | ᠪᠯᠠᠮᠠ ᠪᠠᠨ ᠵᠠᠯᠠᠭᠠᠳ ᠮᠥᠷᠭᠦᠨᠡ | ᠭᠤᠷᠣᠬᠠᠨ ᠭᠤᠣᠯ ᠤᠨ ᠤᠰᠤ ᠨᠢ | ᠭᠤᠣᠯ ᠢᠶᠠᠨ ᠳᠠᠭᠠᠭᠠᠳ ᠤᠷᠤᠰᠤᠨᠠ | ᠬᠤᠰᠢᠭᠤᠨ ᠵᠢᠷᠭᠤᠭᠠᠨ ᠬᠡᠶᠢᠳ ᠨᠢ | ᠪᠯᠠᠮᠠ ᠪᠠᠨ ᠵᠠᠯᠠᠭᠠᠳ ᠮᠥᠷᠭᠦᠨᠡ᠃ | ᠳᠣᠯᠤᠭᠠ᠂ ᠠᠯᠲᠠᠨ ᠵᠢᠭᠦᠷᠲᠠᠢ ᠴᠡᠭᠴᠡᠦᠬᠡᠢ | ᠤᠷᠢᠳᠤ ᠦᠵᠦᠮᠦᠴᠢᠨ ᠴᠢᠨ ᠸᠠᠩ ᠫᠣᠩᠰᠣᠭᠨᠠᠮᠵᠢᠯ ᠢ ᠥᠭᠡᠳᠡ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ ᠵᠢᠯ ᠨᠢ ᠶᠤᠮ | ᠭᠡᠨᠡ᠃ ᠨᠢᠭᠡ ᠡᠳᠦᠷ ᠲᠣᠶᠢᠩᠺᠠᠷ ᠡᠩᠡ ᠶᠢ ᠨᠣᠮ ᠦᠵᠡᠭᠡᠳ ᠰᠠᠭᠤᠵᠤ ᠪᠠᠶᠢᠬᠤ ᠳᠤ᠂ ᠲᠡᠭᠦᠨ ᠤ ᠪᠢᠴᠢᠭ ᠤᠨ | ᠭᠡᠷ ᠤᠨ ᠰᠠᠷᠠᠪᠴᠢᠨ ᠳᠣᠣᠷᠠ ᠨᠢᠭᠡᠨ ᠰᠠᠶᠢᠬᠠᠨ ᠥᠩᠭᠡᠲᠡᠢ ᠰᠢᠷᠠ ᠪᠣᠯᠵᠣᠮᠣᠷ ᠰᠠᠭᠤᠭᠠᠳ ᠱᠠᠭᠰᠢᠨ ᠳᠣᠩᠭᠤᠳᠴᠤ | ᠭᠡᠨᠡ᠃ ᠲᠡᠷᠡ ᠭᠱᠠᠨ ᠳᠤ ᠲᠣᠶᠢᠩᠺᠠᠷ ᠡᠩᠡ ᠴᠦ ᠥᠩᠭᠡᠷᠡᠵᠦ ᠣᠳᠣᠭᠰᠠᠨ ᠥᠲᠡᠭᠦᠰ ᠢᠶᠠᠨ ᠰᠠᠨᠠᠭᠠᠯᠵᠠᠵᠤ | ᠪᠠᠶᠢᠭᠰᠠᠨ ᠲᠠᠢ ᠨᠢ ᠲᠣᠬᠢᠶᠠᠭᠰᠠᠨ ᠪᠣᠯᠬᠤᠷ ᠪᠢᠷ ᠪᠡᠬᠡᠰ ᠨᠡᠶᠢᠯᠡᠭᠦᠯᠦᠨ ᠲᠠᠲᠠᠯᠠᠵᠤ ᠲᠣᠰ ᠳᠠᠭᠤᠤ ᠶᠢ ᠵᠣᠬᠢᠶᠠᠭᠰᠠᠨ | ᠭᠡᠳᠡᠭ᠃ ᠲᠡᠷᠡ ᠰᠢᠯᠦᠭ ᠨᠢ᠄ | ᠠᠯᠲᠠᠨ ᠵᠢᠭᠦᠷᠲᠠᠢ ᠴᠡᠭᠴᠡᠦᠬᠡᠢ ᠨᠢ | ᠠᠭᠠᠷ ᠠᠴᠠ ᠨᠠᠭᠠᠭᠤᠷ ᠵᠢᠷᠭᠢᠨᠡ | ᠠᠳᠠᠯᠢᠬᠠᠨ ᠬᠤᠶᠠᠷ ᠴᠡᠭᠴᠡᠦᠬᠡᠢ ᠨᠢ | ᠠᠲᠠᠭᠠ ᠲᠠᠯᠪᠢᠭᠠᠳ ᠵᠢᠷᠭᠢᠨᠡ | ᠥᠳᠥᠨ ᠵᠢᠭᠦᠷᠲᠠᠢ ᠴᠡᠭᠴᠡᠦᠬᠡᠢ ᠨᠢ | ᠡᠭᠦᠯᠡᠨ ᠠᠴᠠ ᠨᠠᠭᠠᠭᠤᠷ ᠵᠢᠷᠭᠢᠨᠡ | ᠥᠭᠡᠷᠡ ᠦᠭᠡᠢ ᠬᠤᠶᠠᠷ ᠴᠡᠭᠴᠡᠦᠬᠡᠢ ᠨᠢ | ᠥᠳᠥ ᠪᠠᠨ ᠲᠠᠯᠪᠢᠭᠠᠳ ᠵᠢᠷᠭᠢᠨᠡ | ᠠᠷᠪᠠᠨ ᠬᠠᠨᠠᠲᠤ ᠶᠢᠨ ᠲᠦᠰᠢᠯᠭᠡ ᠨᠢ | ᠠᠯᠲᠠᠨ ᠯᠤᠤ ᠲᠠᠢ ᠲᠤᠯᠭᠠᠭᠤᠷᠢ | ᠠᠩᠬᠠ ᠶᠢᠨ ᠪᠢᠳᠡᠨ ᠤ ᠲᠦᠰᠢᠯᠭᠡ ᠨᠢ | ᠠᠪᠤ ᠡᠵᠢ ᠬᠤᠶᠠᠷ | ᠪᠠᠷᠢᠯᠳᠤᠬᠤ ᠪᠥᠬᠡ ᠶᠢᠨ ᠲᠦᠰᠢᠯᠭᠡ ᠨᠢ | ᠪᠠᠷᠢᠳᠠᠯ ᠰᠠᠶᠢᠲᠠᠢ ᠵᠣᠳᠤᠭ | ᠪᠠᠭᠠᠴᠤᠳ ᠪᠢᠳᠠᠨ ᠤ ᠲᠦᠰᠢᠯᠭᠡ ᠨᠢ | ᠠᠪᠤ ᠡᠵᠢ ᠬᠤᠶᠠᠷ | ᠤᠷᠤᠰᠬᠠᠯ ᠭᠤᠣᠯ ᠤᠨ ᠲᠦᠰᠢᠯᠭᠡ ᠨᠢ | ᠠᠭᠤᠯᠠ ᠬᠠᠳᠠ ᠬᠤᠶᠠᠷ | ᠤᠷᠢᠳᠤ ᠶᠢᠨ ᠪᠢᠳᠠᠨ ᠤ ᠲᠦᠰᠢᠯᠭᠡ ᠨᠢ | ᠠᠪᠤ ᠡᠵᠢ ᠬᠤᠶᠠᠷ | ᠬᠤᠯᠪᠣᠭᠠ ᠪᠦᠬᠡᠲᠦ ᠶᠢᠨ ᠲᠦᠰᠢᠯᠭᠡ ᠨᠢ | ᠬᠤᠮ ᠪᠠᠮᠪᠠᠢ ᠬᠤᠶᠠᠷ | ᠬᠡᠦᠬᠡᠳ ᠪᠢᠳᠠᠨ ᠤ ᠲᠦᠰᠢᠯᠭᠡ ᠨᠢ | ᠠᠪᠤ ᠡᠵᠢ ᠬᠤᠶᠠᠷ᠃ |