ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠦᠢᠯᠡᠴᠢᠯᠡᠭᠡ
ᠦᠵᠦᠮᠦᠴᠢᠨ ᠮᠣᠩᠭᠤᠯᠴᠤᠳ ᠤᠨ ᠮᠡᠨᠳᠦᠯᠡᠭᠰᠡᠨ ᠦᠵᠦᠮ ᠤᠨ ᠠᠭᠤᠯᠠ ᠠᠯᠲᠠᠢ ᠬᠠᠩᠭᠠᠢ ᠶᠢᠨ ᠭᠠᠵᠠᠷ  ᠤᠨ ᠪᠠᠶᠢᠴᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2017/3/10
        ᠠᠯᠲᠠᠢ — ᠬᠠᠩᠭᠠᠢ ᠶᠢᠨ ᠠᠭᠤᠯᠠ ᠨᠢ ᠴᠣᠬᠤᠮ ᠬᠠᠮᠢᠭ᠎ᠠ ᠪᠠᠶᠢᠷᠢᠰᠢᠵᠤ ᠬᠡᠳᠦᠢ ᠭᠠᠵᠠᠷ ᠣᠷᠣᠨ ᠢ ᠬᠠᠷᠢᠶᠠᠯᠠᠳᠠᠭ ᠪᠣᠢ︖︕ ᠡᠭᠦᠨ ᠢ ᠲᠣᠳᠣᠷᠬᠠᠶᠢᠯᠠᠬᠤ ᠨᠢ ᠪᠠᠰᠠᠴᠤ ᠦᠵᠦᠮᠦᠴᠢᠨ ᠮᠣᠩᠭᠤᠯᠴᠤᠳ ᠤᠨ ᠡᠷᠲᠡᠨ ᠤ ᠬᠥᠷᠥᠰᠥ ᠰᠢᠷᠣᠢ ᠵᠢᠴᠢ ᠲᠡᠳᠡᠨ ᠤ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠲᠠᠷᠬᠠᠴᠠ᠂ ᠳᠣᠲᠣᠭᠠᠳᠤ ᠪᠦᠲᠦᠴᠡ ᠵᠡᠷᠭᠡ ᠶᠢ ᠵᠥᠪ ᠣᠨᠣᠪᠴᠢᠲᠠᠢ ᠲᠣᠭᠲᠠᠭᠠᠬᠤ ᠳᠤ ᠰᠢᠭᠤᠳ ᠠᠴᠢ ᠬᠤᠯᠪᠣᠭᠳᠠᠯ ᠲᠠᠢ ᠪᠠᠶᠢᠳᠠᠭ᠃ ᠡᠶᠢᠮᠦ ᠠᠴᠠ ᠳᠣᠣᠷ᠎ᠠ ᠠᠯᠲᠠᠢ ᠬᠠᠩᠭᠠᠢ ᠠᠭᠤᠯᠠ ᠶᠢᠨ ᠪᠣᠳᠠᠲᠤ ᠭᠠᠵᠠᠷ ᠤᠨ ᠪᠠᠶᠢᠴᠠ ᠪᠠ ᠲᠡᠭᠦᠨ ᠤ ᠬᠠᠷᠢᠶ᠎ᠠ ᠨᠤᠲᠤᠭ ᠢ ᠴᠢᠨᠠᠭᠰᠢᠳᠠ ᠰᠤᠳᠤᠯᠤᠶ᠎ᠠ ᠃            ︽ᠠᠯᠲᠠᠢ ᠬᠠᠩᠭᠠᠢ︾ ᠶᠢᠨ ᠠᠭᠤᠯᠠ ᠨᠢᠷᠤᠭᠤ ᠪᠣᠯ ᠮᠣᠩᠭᠤᠯ ᠤᠨ ᠥᠨᠳᠦᠷᠯᠢᠭ ᠤᠨ ᠪᠠᠷᠠᠭᠤᠨ ᠰᠠᠯᠪᠤᠷᠢ ᠪᠣᠯᠣᠨ᠎ᠠ᠃ ᠠᠯᠲᠠᠢ ᠶᠢᠨ ᠨᠢᠷᠤᠭᠤ ᠠᠴᠠ ᠬᠤᠶᠢᠰᠢ ᠪᠠᠨ ᠬᠠᠩᠭᠠᠢ ᠶᠢᠨ ᠠᠭᠤᠯᠠ ᠨᠢᠷᠤᠭᠤᠳ ᠢ ᠪᠠᠭᠲᠠᠭᠠᠳᠠᠭ᠃ ᠣᠳᠣᠬᠢ ᠮᠠᠨ ᠤ ᠤᠯᠤᠰ ᠤᠨ ᠰᠢᠨᠵᠢᠶᠠᠩ ᠤᠨ ᠤᠶᠢᠭᠤᠷ ᠦᠨᠳᠦᠰᠦᠲᠡᠨ ᠤ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠠᠴᠠ ᠬᠤᠶᠢᠰᠢ ᠮᠣᠩᠭᠤᠯ ᠤᠯᠤᠰ ᠤᠨ ᠪᠠᠷᠠᠭᠤᠨ ᠪᠡᠶ᠎ᠡ ᠪᠠᠷ ᠥᠭᠡᠳᠡᠯᠡᠵᠦ ᠤᠤᠯ ᠤᠨ ᠵᠥᠪᠯᠡᠯᠲᠦ ᠬᠤᠯᠪᠣᠭᠠᠲᠤ ᠤᠯᠤᠰ  ᠤᠨ ᠬᠢᠯᠢ ᠳᠤ ᠰᠢᠷᠭᠤᠭᠰᠠᠨ ᠠᠭᠤᠯᠠ ᠨᠤᠭᠤᠳ ᠬᠦᠷᠲᠡᠯ᠎ᠡ ᠦᠷᠭᠦᠯᠵᠢᠯᠡᠳᠡᠭ ᠪᠠᠶᠢᠨ᠎ᠠ᠃            ᠠᠯᠲᠠᠢ ᠬᠠᠩᠭᠠᠢ ᠶᠢᠨ ᠭᠠᠵᠠᠷ ᠤᠨ ᠪᠠᠶᠢᠴᠠ ᠪᠠᠭᠲᠠᠭᠠᠮᠵᠢ ᠶᠢ ᠵᠠᠩ ᠮᠦ ᠶᠢᠨ ︽ᠮᠣᠩᠭᠤᠯ ᠤᠨ ᠬᠤᠰᠢᠭᠤ ᠨᠤᠲᠤᠭ ᠤᠨ ᠲᠡᠮᠳᠡᠭᠯᠡᠯ︾ ᠳᠤ ᠲᠣᠩ ᠲᠣᠳᠣᠷᠬᠠᠢ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠳᠠᠭ᠃ ᠲᠡᠭᠦᠨ ᠳᠤ ᠠᠯᠲᠠᠢ ᠠᠭᠤᠯᠠ ᠶᠢ᠄ ︽ᠲᠠᠶᠢᠽᠦ ᠬᠠᠭᠠᠨ ᠨᠠᠢᠮᠠᠨ ᠢ ᠳᠠᠶᠢᠯᠠᠬᠤ ᠦᠶ᠎ᠡ ᠳᠤᠷ ᠨᠠᠢᠮᠠᠨ ᠠᠶᠢᠮᠠᠭ ᠤᠨ ᠲᠦᠷᠦᠭᠦᠦ ᠳᠠᠶᠠᠩ ᠬᠠᠨ ᠠᠨ ᠲᠠᠢ ︵ᠠᠯᠲᠠᠢ ᠶᠢᠨ ᠪᠤᠷᠤᠭᠤ ᠳᠠᠭᠤᠳᠠᠯᠭ᠎ᠠ︶ ᠠᠭᠤᠯᠠᠨ ᠠᠴᠠ ᠬᠠᠩᠭᠠᠢ ᠠᠭᠤᠯᠠᠨ ᠳᠤ ᠢᠷᠡᠵᠦ ᠴᠡᠷᠢᠭ ᠪᠠᠭᠤᠭᠰᠠᠨ ᠳᠤᠷ ᠲᠠᠶᠢᠽᠦ ᠬᠠᠭᠠᠨ ᠳᠠᠶᠠᠩ ᠬᠠᠨ ᠯᠤᠭ᠎ᠠ ᠶᠡᠭᠡ ᠪᠠᠷ ᠪᠠᠶᠢᠯᠳᠤᠨ ᠲᠡᠭᠦᠨ ᠢ ᠪᠠᠷᠢᠵᠤ ᠠᠯᠠᠪᠠᠢ ᠁ ᠡᠨᠡ ᠠᠭᠤᠯᠠ ᠪᠣᠯᠪᠠᠰᠤ ᠳᠠᠷᠤᠢ ᠡᠳᠦᠭᠡ ᠶᠢᠨ ᠠᠯᠲᠠᠢ ᠠᠭᠤᠯᠠ ᠮᠥᠨ︾ ︵︽ᠮᠣᠩᠭᠤᠯ ᠤᠨ ᠬᠤᠰᠢᠭᠤ ᠨᠤᠲᠤᠭ ᠤᠨ ᠲᠡᠮᠳᠡᠭᠯᠡᠯ ︵ᠳᠤᠮᠳᠠ︶︾ 38 ᠳ᠋ᠤᠭᠠᠷ ᠨᠢᠭᠤᠷ ᠲᠤ︶ ᠭᠡᠵᠦ ᠲᠣᠳᠣᠷᠬᠠᠶᠢᠯᠠᠵᠠᠢ᠃ ᠪᠠᠰᠠ ᠬᠠᠩᠭᠠᠢ ᠠᠭᠤᠯᠠ ᠶᠢ ︽ᠬᠠᠩᠭᠠᠢ ᠠᠭᠤᠯᠠ ᠪᠣᠯᠪᠠᠰᠤ ᠪᠠᠷᠠᠭᠤᠨ ᠤᠷᠲᠤᠷᠢᠭ ᠤᠨ ᠠᠷᠪᠠᠨ ᠳᠥᠷᠪᠡᠨ ᠭᠷᠠᠳᠦ᠋ᠰ᠂ ᠤᠮᠠᠷᠠᠲᠤ ᠥᠷᠭᠡᠷᠢᠭ ᠤᠨ ᠳᠥᠴᠢᠨ ᠵᠢᠷᠭᠤᠭᠠᠨ ᠭᠷᠠᠳᠦ᠋ᠰ᠂ ᠣᠷᠬᠤᠨ ᠭᠤᠣᠯ ᠤᠨ ᠡᠬᠢ ᠶᠢᠨ ᠤᠮᠠᠷ᠎ᠠ᠂ ᠰᠠᠨᠰᠢ᠂ ᠢᠷᠭᠤᠢ ᠶᠢᠨ ᠠᠰ ᠬᠤᠶᠢᠨ᠎ᠠ ᠪᠠᠷᠤᠭ ᠬᠤᠶᠠᠷ ᠮᠢᠩᠭᠠᠨ ᠭᠠᠵᠠᠷ᠂ ᠣᠩᠭᠢ ᠶᠢᠨ ᠭᠤᠣᠯ ᠤᠨ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠵᠠᠭᠤ ᠢᠯᠡᠭᠦᠦ ᠭᠠᠵᠠᠷ ᠲᠤᠷ ᠠᠮᠤᠢ᠃ ᠡᠨᠡ ᠠᠭᠤᠯᠠ ᠪᠣᠯᠪᠠᠰᠤ ᠬᠠᠮᠤᠭ ᠤᠨ ᠥᠨᠳᠥᠷ ᠶᠡᠭᠡ ᠠᠭᠤᠯᠠ ᠪᠣᠯᠠᠢ᠃ ᠠᠭᠤᠯᠠ ᠨᠢᠷᠤᠭᠤ ᠠᠨᠤ ᠪᠠᠷᠠᠭᠤᠨ ᠬᠤᠶᠢᠨᠠᠬᠢ ᠠᠯᠲᠠᠢ ᠠᠭᠤᠯᠠᠨ ᠠᠴᠠ ᠵᠠᠯᠭᠠᠨ ᠦᠷᠭᠦᠯᠵᠢᠯᠡᠵᠦ ᠵᠡᠭᠦᠨᠰᠢ ᠣᠷᠬᠤᠨ ᠲᠤᠤᠯᠠ ᠵᠡᠷᠭᠡ ᠭᠤᠣᠯ ᠤᠳ ᠢ ᠥᠩᠭᠡᠷᠡᠭᠡᠵᠦ ᠶᠡᠭᠡ ᠬᠢᠩᠭᠠᠨ ᠠᠴᠠ ᠬᠤᠶᠢᠰᠢ ᠮᠤᠷᠤᠶᠢᠵᠤ ᠰᠡᠯᠡᠩᠭᠡ ᠮᠥᠷᠡᠨ ᠤ ᠳᠡᠭᠡᠳᠦ ᠤᠷᠤᠰᠬᠠᠯ ᠤᠨ ᠣᠯᠠᠨ ᠭᠤᠣᠯ ᠤᠨ ᠡᠬᠢ ᠶᠢ ᠣᠷᠢᠶᠠᠨ ᠣᠷᠣᠰ ᠤᠨ ᠵᠠᠬ᠎ᠠ ᠬᠦᠷᠲᠡᠯ᠎ᠡ ᠮᠢᠩᠭ᠎ᠠ ᠭᠠᠷᠤᠢ ᠭᠠᠵᠠᠷ ᠦᠷᠭᠦᠯᠵᠢᠯᠡᠮᠦᠢ᠃ ᠣᠷᠬᠤᠨ ᠲᠠᠮᠢᠷ ᠵᠡᠷᠭᠡ ᠭᠤᠣᠯ ᠤᠳ ᠴᠥᠮ ᠠᠳᠡ ᠠᠴᠠ ᠡᠭᠦᠰᠬᠦ ᠪᠣᠯᠠᠢ᠃ ᠬᠠᠩᠭᠠᠢ ᠬᠡᠮᠡᠭᠰᠡᠨ ᠦᠭᠡ ᠪᠣᠯᠪᠠᠰᠤ ᠠᠭᠤᠯᠠ ᠶᠢᠨ ᠳᠦᠷᠰᠦ ᠢᠨᠦ ᠲᠡᠮᠡᠭᠡᠨ ᠤ ᠬᠡᠯᠪᠡᠷᠢᠲᠡᠢ ᠲᠤᠯᠠ ᠲᠡᠮᠡᠭᠡ ᠬᠡᠮᠡᠭᠰᠡᠨ ᠤᠳᠬ᠎ᠠ ᠲᠠᠢ ᠪᠣᠯᠠᠢ ᠁︾             ︽᠁ ᠬᠠᠩᠭᠠᠢ ᠪᠣᠯᠪᠠᠰᠤ ᠬᠠᠯᠬ᠎ᠠ ᠶᠢᠨ ᠵᠠᠬ᠎ᠠ ᠬᠢᠯᠢ ᠳᠣᠲᠣᠷᠠᠬᠢ ᠨᠡᠷᠡᠲᠦ ᠠᠭᠤᠯᠠ ᠪᠣᠯᠬᠤ ᠪᠣᠯᠠᠢ᠃ ᠨᠠᠷᠠᠰᠤ ᠣᠯᠠᠨ᠂ ᠪᠤᠯᠠᠭ ᠠᠨᠤ ᠲᠤᠩᠭᠠᠯᠠᠭ᠂ ᠲᠡᠭᠦᠨ ᠤ ᠬᠠᠮᠤᠭ ᠤᠨ ᠥᠨᠳᠥᠷ ᠣᠷᠭᠢᠯ ᠢ ᠠᠨᠤ ᠣᠳᠬᠤᠨ ᠲᠡᠭᠷᠢ ᠬᠡᠮᠡᠮᠦᠢ᠃ ᠠᠭᠤᠯᠠ ᠶᠢᠨ ᠡᠩᠭᠡᠷ ᠠᠨᠤ ᠬᠡᠳᠦ ᠬᠡᠳᠦᠨ ᠭᠠᠵᠠᠷ ᠬᠠᠯᠠᠭᠤᠨ ᠷᠠᠰᠢᠶᠠᠨ ᠤᠨᠳᠤᠷᠴᠤ ᠪᠤᠯᠠᠭ ᠲᠤᠷ ᠠᠨᠤ ᠵᠢᠭᠠᠰᠤ ᠪᠣᠢ᠃ ᠠᠳᠡ ᠬᠤᠸ᠎ᠠ ᠬᠡᠮᠡᠬᠦ ᠰᠢᠷ᠎ᠠ ᠴᠢᠯᠠᠭᠤ ᠭᠠᠷᠤᠮᠤᠢ᠃ ᠲᠡᠭᠦᠨ ᠢᠶᠠᠷ ᠬᠢᠭᠰᠡᠨ ᠡᠳ᠋ ᠬᠡᠷᠡᠭᠰᠡᠯ ᠢᠨᠦ ᠭᠡᠭᠡᠪᠳᠦᠷ ᠲᠤᠩᠭᠠᠯᠠᠭ ᠥᠩᠭᠡᠲᠡᠢ ᠪᠠᠭ᠋ᠠᠷᠠᠮᠠᠷ ᠰᠠᠶᠢᠬᠠᠨ ᠬᠠᠷᠠᠭᠳᠠᠨᠠᠮ᠃ ᠬᠠᠩᠭᠠᠢ ᠠᠭᠤᠯᠠ ᠬᠠᠶᠠ ᠲᠠᠰᠤᠷᠠᠭᠠᠳ ᠬᠠᠶᠠ ᠵᠠᠯᠭᠠᠯᠳᠤᠨ ᠮᠢᠩᠭᠠᠨ ᠭᠠᠵᠠᠷ ᠦᠷᠭᠦᠯᠵᠢᠯᠡᠮᠦᠢ᠃ ᠮᠣᠩᠭᠤᠯᠴᠤᠳ ᠤᠷᠭᠤᠭᠰᠠᠨ ᠮᠣᠳᠣ ᠴᠢᠯᠠᠭᠤ ᠪᠠᠷ ᠠᠨᠤ ᠲᠡᠭᠦᠨ ᠢ ᠢᠯᠭᠠᠵᠤ ᠲᠠᠨᠢᠬᠤ ᠲᠤᠯᠠᠳᠠ ᠬᠡᠳᠦᠢ ᠣᠯᠠᠨ ᠠᠭᠤᠯᠠ ᠵᠠᠯᠭᠠᠯᠳᠤᠵᠤ ᠦᠷᠭᠦᠯᠵᠢᠯᠡᠵᠦ᠂ ᠡᠰᠡᠬᠦᠯ᠎ᠡ ᠳᠤᠮᠳᠠ  ᠪᠠᠨ ᠬᠡᠳᠦᠨ ᠵᠠᠭᠤᠨ ᠭᠠᠵᠠᠷ ᠲᠠᠰᠤᠷᠠᠵᠤ ᠵᠠᠶᠢᠳᠠᠪᠠᠴᠤ ᠠᠯᠢ ᠠᠭᠤᠯᠠ ᠠᠨᠤ ᠭᠤᠣᠯ ᠨᠢᠷᠤᠭᠤ ᠪᠣᠯᠬᠤ ᠶᠢ ᠠᠳᠡᠭᠦᠷᠡᠬᠦ ᠦᠭᠡᠢ ᠪᠠᠷ ᠯᠠᠪᠲᠠᠢ ᠮᠡᠳᠡᠮᠦᠢ ᠬᠡᠮᠡᠵᠦᠬᠦᠢ᠃ ᠪᠠᠰᠠ ᠬᠡᠯᠡᠬᠦ ᠳᠡᠭᠡᠨ ᠬᠠᠩᠭᠠᠢ᠂ ᠠᠯᠲᠠᠢ ᠠᠭᠤᠯᠠ ᠶᠢᠨ ᠠᠷᠤ ᠳᠤᠷ ᠨᠠᠷᠠᠰᠤ ᠬᠠᠶᠢᠯᠠᠰᠤ ᠪᠦᠷᠬᠦᠨ ᠤᠷᠭᠤᠵᠤ ᠠᠭᠤᠯᠠᠨ ᠤ ᠡᠩᠭᠡᠷ ᠲᠤᠷ ᠠᠨᠤ ᠥᠴᠥᠬᠡᠨ ᠴᠦ ᠮᠣᠳᠣ ᠦᠭᠡᠢ ᠬᠠᠯᠴᠠᠭᠠᠢ ᠬᠡᠮᠡᠭᠰᠡᠨ ᠪᠥᠭᠡᠳ ᠪᠠᠰᠠ ᠬᠠᠩᠭᠠᠢ ᠠᠭᠤᠯᠠ ᠶᠢᠨ ᠡᠮᠦᠨ᠎ᠡ ᠲᠠᠯ᠎ᠠ ᠳᠤᠷ ᠪᠢᠴᠢᠭᠲᠦ ᠠᠭᠤᠯᠠ ᠪᠣᠢ᠃ ᠬᠠᠳᠠ ᠴᠢᠯᠠᠭᠤ ᠠᠨᠤ ᠡᠭᠴᠡ ᠪᠣᠰᠤᠭ᠎ᠠ ᠳᠡᠭᠡᠷ᠎ᠡ ᠠᠨᠤ ᠬᠥᠮᠥᠨ ᠠᠮᠢᠲᠠᠨ ᠢ ᠭᠡᠲᠦᠯᠭᠡᠭᠴᠢ ᠨᠣᠮ ᠢ ᠡᠷᠲᠡᠨ ᠤ ᠰᠠᠨᠰᠺᠷᠢᠲ ᠦᠰᠦᠭ  ᠢᠶᠠᠷ ᠰᠡᠶᠢᠯᠵᠦ᠂ ᠠᠯᠲᠠ ᠰᠠᠭᠤᠯᠭᠠᠨ᠂ ᠬᠠᠵᠠᠭᠤ ᠳᠤᠷ ᠠᠨᠤ ᠬᠢᠲᠠᠳ ᠦᠰᠦᠭ ᠤᠨ ᠬᠢᠴᠢᠶᠡᠩᠭᠦᠢ ᠲᠢᠭ ᠢᠶᠠᠷ ᠪᠢᠴᠢᠭᠲᠦ ᠬᠠᠳᠠ ᠬᠡᠮᠡᠭᠰᠡᠨ ᠳᠥᠷᠪᠡᠨ ᠦᠰᠦᠭ ᠢ ᠳᠡᠷᠢ ᠲᠡᠭᠰᠢ ᠪᠢᠴᠢᠵᠦ ᠰᠡᠶᠢᠯᠦᠭᠰᠡᠨ ᠠᠨᠤ ᠨᠢᠭᠡ ᠲᠣᠬᠤᠢ ᠤᠷᠲᠤ ᠪᠠᠶᠢᠮᠤᠢ᠃ ᠡᠨᠡ ᠪᠣᠯᠪᠠᠰᠤ ᠶᠤᠸᠠᠨ ᠤᠯᠤᠰ ᠤᠨ ᠦᠶ᠎ᠡ ᠶᠢᠨ ᠬᠠᠭᠤᠴᠢᠳ ᠪᠣᠯᠠᠢ ᠬᠡᠮᠡᠵᠦᠬᠦᠢ᠃︾ ︵ᠲᠤᠰ ᠨᠣᠮ᠂ ᠳᠤᠮᠳᠠ᠂ 34 ~ 35 ᠳ᠋ᠤᠭᠠᠷ ᠨᠢᠭᠤᠷ ᠲᠤ︶ ᠪᠠᠰᠠ ᠴᠦ ᠬᠠᠩᠭᠠᠢ ᠠᠭᠤᠯᠠ ᠪᠠ ᠬᠠᠷᠠᠬᠤᠷᠢᠮ ᠬᠤᠲᠠ ᠶᠢᠨ ᠪᠠᠶᠢᠷᠢᠰᠢᠯ ᠢ ᠲᠣᠳᠣᠷᠬᠠᠶᠢᠯᠠᠬᠤ ᠳᠠᠭᠠᠨ᠄ ︽ᠬᠠᠩᠭᠠᠢ ᠠᠭᠤᠯᠠ ᠠᠨᠤ ᠬᠠᠷ᠎ᠠ ᠬᠠᠳᠠ ᠠᠴᠠ ᠵᠡᠭᠦᠨᠰᠢ ᠬᠠᠷᠠᠬᠤᠷᠢᠮ  ᠠᠴᠠ ᠪᠠᠷᠠᠭᠤᠨᠰᠢ ᠪᠠᠶᠢᠬᠤ ᠪᠣᠯᠣᠮᠤᠢ︾ ︵ᠳᠡᠭᠡᠷᠡᠬᠢ ᠨᠣᠮ ᠤᠨ 38 ᠳ᠋ᠤᠭᠠᠷ ᠨᠢᠭᠤᠷ ᠲᠤ︶ ᠭᠡᠪᠡ᠃ ᠪᠠᠰᠠ᠄ ︽ᠵᠠᠩ ᠮᠦ ᠶᠢᠨ ᠴᠢᠬᠤᠯᠠᠴᠢᠯᠠᠭᠰᠠᠨ ᠠᠨᠤ ︵ᠮᠣᠩᠭᠤᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ︶ ᠳᠤᠷ ᠲᠠᠶᠢᠽᠦ ᠬᠠᠭᠠᠨ ᠤ ᠨᠠᠢᠮᠠᠨ ᠠᠶᠢᠮᠠᠭ ᠢ ᠳᠠᠶᠢᠯᠠᠭᠰᠠᠨ ᠶᠠᠪᠤᠳᠠᠯ ᠢ ᠲᠡᠮᠳᠡᠭᠯᠡᠬᠦ ᠳᠡᠭᠡᠨ ᠬᠤᠯᠤᠭᠠᠨ᠎ᠠ ᠵᠢᠯ ︵1204︶ ᠤᠨ ᠵᠣᠨ ᠤ ᠲᠡᠷᠢᠭᠦᠨ ᠰᠠᠷ᠎ᠠ ᠴᠢᠩᠭᠢᠰ ᠬᠠᠭᠠᠨ ᠲᠤᠭ ᠰᠠᠴᠤᠭᠠᠳ ᠨᠠᠢᠮᠠᠨ ᠳᠤᠷ ᠮᠣᠷᠢᠯᠠᠷᠤᠨ ᠁ ᠳᠠᠶᠠᠩ ᠬᠠᠨ ᠬᠠᠩᠭᠠᠢ  ᠶᠢᠨ ᠬᠠᠴᠠᠷ ᠤᠰᠤᠨ᠎ᠠ ᠠᠵᠤᠬᠤᠢ᠃ ᠲᠡᠨᠳᠡ ᠠᠴᠠ ᠬᠥᠳᠡᠯᠵᠦ ᠲᠠᠮᠢᠷ ᠤᠷᠤᠭᠤ ᠶᠠᠪᠤᠭᠠᠳ ᠣᠷᠬᠤᠨ ᠢ ᠭᠡᠲᠦᠯᠵᠦ ᠨᠠᠬᠤ ᠬᠤᠨ ᠤ ᠡᠪᠦᠷ ᠬᠦᠷᠴᠦ ᠠᠭᠤᠯᠠᠨ ᠤ ᠬᠤᠷᠮᠣᠢ ᠳᠤᠷ ᠪᠠᠭᠤᠵᠤᠬᠤᠢ ᠬᠡᠮᠡᠪᠡᠢ᠃ ᠬᠢᠨᠠᠬᠤᠯ᠎ᠠ ᠲᠠᠶᠢᠽᠦ ᠶᠢᠨ ᠴᠠᠳᠢᠭ ᠢᠶᠠᠷ ᠪᠣᠯᠪᠠᠰᠤ ᠳᠠᠶᠠᠩ ᠬᠠᠨ ᠠᠨ ᠲᠠᠢ ᠬᠠᠩᠭᠠᠢ ᠳᠤᠷ ᠢᠷᠡᠵᠦ ᠪᠠᠭᠤᠵᠤᠬᠤᠢ᠃ ᠡᠨᠡ ᠬᠠᠩᠭᠠᠢ ᠠᠨᠤ ᠳᠠᠷᠤᠢ ︵ᠨᠢᠭᠤᠴᠠ ᠲᠣᠪᠴᠢᠶᠠᠨ︶ ᠳᠤᠷ ᠳᠤᠷᠠᠳᠤᠭᠰᠠᠨ ᠬᠠᠩᠭᠠᠢ ᠮᠥᠨ ᠪᠣᠯᠠᠢ︾ ᠭᠡᠵᠡᠢ᠃ ︵ᠳᠡᠭᠡᠷᠡᠬᠢ ᠨᠣᠮ  ᠤᠨ 40 ᠳ᠋ᠦ᠋ᠭᠡᠷ ᠨᠢᠭᠤᠷ ᠲᠤ︶             ︽ᠮᠣᠩᠭᠤᠯ ᠤᠨ ᠬᠤᠰᠢᠭᠤ ᠨᠤᠲᠤᠭ ᠤᠨ ᠲᠡᠮᠳᠡᠭᠯᠡᠯ︾  ᠤᠨ ᠳᠡᠭᠡᠷᠡᠬᠢ ᠲᠡᠮᠳᠡᠭᠯᠡᠯ ᠠᠴᠠ ᠦᠵᠡᠬᠦ ᠳᠤ ᠠᠯᠲᠠᠢ ᠬᠠᠩᠭᠠᠢ ᠠᠭᠤᠯᠠ ᠪᠣᠯ ᠣᠳᠣ ᠶᠢᠨ ᠰᠢᠨᠵᠢᠶᠠᠩ ᠤᠨ ᠠᠯᠲᠠᠢ ᠠᠭᠤᠯᠠᠨ ᠠᠴᠠ ᠬᠠᠯᠬ᠎ᠠ ᠶᠢᠨ ᠪᠠᠷᠠᠭᠤᠨ ᠲᠠᠯ᠎ᠠ  ᠪᠠᠷ ᠳᠠᠮᠵᠢᠵᠤ ᠣᠷᠣᠰ ᠤᠨ ᠵᠠᠬ᠎ᠠ ᠬᠡᠴᠡ ᠳᠤ ᠣᠷᠣᠳᠠᠭ ᠠᠭᠤᠯᠠ ᠨᠢᠷᠤᠭᠤ ᠨᠤᠭᠤᠳ ᠮᠥᠨ ᠭᠡᠳᠡᠭ ᠨᠢ ᠤᠯᠠᠮ ᠲᠣᠳᠣᠷᠬᠠᠢ ᠪᠣᠯᠵᠠᠢ᠃ ᠲᠡᠭᠦᠨ ᠳᠤ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠮᠣᠩᠭᠤᠯ ᠤᠨ ᠨᠡᠶᠢᠰᠯᠡᠯ ᠬᠠᠷᠠᠬᠤᠷᠢᠮ ᠠᠴᠠ ᠪᠠᠷᠠᠭᠤᠨᠰᠢᠬᠢ ᠭᠠᠵᠠᠷ ᠢᠶᠠᠷ ᠭᠤᠣᠯ ᠪᠣᠯᠭᠠᠭᠰᠠᠨ ᠮᠣᠩᠭᠤᠯ ᠣᠷᠣᠨ ᠦᠷᠭᠦᠯᠵᠢ ᠪᠠᠭᠲᠠᠨ᠎ᠠ᠃ ᠠᠳᠡ ᠠᠯᠢ ᠡᠷᠲᠡ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠤᠳᠤᠮ ᠤᠭᠰᠠᠭ᠎ᠠ ᠡᠭᠦᠰᠴᠦ 12 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢᠨ ᠳᠤ ᠴᠢᠩᠭᠢᠰ ᠬᠠᠭᠠᠨ  ᠢᠶᠠᠷ ᠲᠥᠯᠥᠭᠡᠯᠡᠭᠦᠯᠦᠭᠰᠡᠨ ᠮᠣᠩᠭᠤᠯᠴᠤᠳ ᠮᠣᠩᠭᠤᠯ ᠠᠶᠢᠮᠠᠭ ᠤᠳ ᠢ ᠨᠢᠭᠡᠳᠬᠡᠵᠦ ᠪᠠᠭᠠᠲᠤᠷᠯᠢᠭ ᠲᠡᠮᠡᠴᠡᠯ ᠢᠶᠠᠷ  ᠢᠶᠠᠨ ᠶᠡᠭᠡ ᠮᠣᠩᠭᠤᠯ ᠤᠯᠤᠰ ᠢ ᠪᠠᠶᠢᠭᠤᠯᠤᠭᠰᠠᠨ ᠲᠠᠷᠬᠠᠨ ᠨᠤᠲᠤᠭ ᠪᠣᠯᠵᠠᠢ᠃ ᠡᠨᠡ ᠭᠠᠵᠠᠷ ᠨᠢ ᠶᠠᠭ ᠦᠵᠦᠮᠦᠴᠢᠨ ᠮᠣᠩᠭᠤᠯᠴᠤᠳ ᠤᠨ ᠬᠡᠯᠡᠳᠡᠭ ︽ᠦᠵᠦᠮ ᠤᠨ ᠠᠭᠤᠯᠠ — ᠠᠯᠲᠠᠢ ᠬᠠᠩᠭᠠᠢ︾ ᠭᠡᠳᠡᠭ ᠭᠠᠵᠠᠷ ᠮᠥᠨ᠃ ᠦᠵᠦᠮᠦᠴᠢᠨ ᠮᠣᠩᠭᠤᠯᠴᠤᠳ ᠤᠨ ᠨᠡᠭᠦᠵᠦ ᠢᠷᠡᠭᠰᠡᠨ ᠡᠷᠲᠡᠨ ᠤ ᠨᠤᠲᠤᠭ ᠪᠣᠯ ᠶᠠᠭ ᠡᠨᠡ ᠭᠠᠵᠠᠷ ᠶᠤᠮ᠃             ᠡᠶᠢᠮᠦ ᠠᠴᠠ ᠦᠵᠦᠮᠦᠴᠢᠨ ᠮᠣᠩᠭᠤᠯᠴᠤᠳ ᠤᠨ ᠮᠡᠨᠳᠦᠯᠡᠭᠰᠡᠨ ᠦᠵᠦᠮ ᠤᠨ ᠠᠭᠤᠯᠠ ᠠᠯᠲᠠᠢ ᠬᠠᠩᠭᠠᠢ  ᠶᠢᠨ ᠭᠠᠵᠠᠷ ᠤᠨ ᠪᠠᠶᠢᠴᠠ ᠪᠣᠯ ᠠᠯᠲᠠᠢ ᠨᠢᠷᠤᠭᠤ ᠠᠴᠠ ᠣᠷᠣᠰ ᠤᠨ ᠬᠢᠯᠢ᠂ ᠬᠠᠷᠠᠬᠤᠷᠢᠮ ᠠᠴᠠ ᠢᠵᠢᠯ ᠮᠥᠷᠡᠨ ᠢ ᠪᠠᠭᠲᠠᠭᠠᠭᠰᠠᠨ ᠠᠯᠲᠠᠢ ᠬᠠᠩᠭᠠᠢ ᠠᠭᠤᠯᠠ ᠶᠢᠨ ᠥᠷᠭᠡᠨ ᠠᠭᠤᠳᠠᠮ ᠣᠷᠣᠨ ᠮᠥᠨ᠃       ︽ᠦᠵᠦᠮᠦᠴᠢᠨ ᠮᠣᠩᠭᠤᠯᠴᠤᠳ︾ ︵ᠭᠣ᠂ ᠷᠠᠬᠸ᠎ᠠ︶
 
ᠢᠷᠡᠯᠲᠡ᠄ ︽ᠦᠵᠦᠮᠦᠴᠢᠨ ᠮᠣᠩᠭᠤᠯᠴᠤᠳ︾
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠦᠵᠦᠮᠦᠴᠢᠨ ᠪᠦᠬᠡ
ᠦᠵᠦᠮᠦᠴᠢᠨ ᠤᠷᠲᠤ  ᠶᠢᠨ ᠳᠠᠭᠤᠤ
ᠦᠵᠦᠮᠦᠴᠢᠨ ᠬᠤᠷᠢᠮ  ᠤᠨ ᠶᠤᠰᠤ
ᠦᠵᠦᠮᠦᠴᠢᠨ ᠲᠠᠬᠢᠯᠭ᠎ᠠ
ᠦᠵᠦᠮᠦᠴᠢᠨ ᠪᠡᠯᠭᠡᠯᠡᠬᠦ ᠶᠤᠰᠤ
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号