ᠪᠣᠷᠣ ᠪᠣᠯᠵᠣᠮᠣᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/3/18
                                    ᠫᠤ · ᠰᠠᠨᠠᠭᠠᠷᠪᠣᠣ    ᠪᠣᠷᠣ ᠪᠣᠯᠵᠣᠮᠣᠷ ᠨᠢ ᠤᠮᠠᠷᠠᠲᠤ ᠰᠡᠷᠢᠭᠦᠨ ᠪᠦᠰᠡᠨ ᠤ ᠭᠡᠵᠤ ᠬᠡᠯᠡᠬᠦ ᠶᠤᠮ ᠦᠦ᠂ ᠮᠡᠳᠡᠬᠦ ᠦᠭᠡᠢ᠂ ᠶᠠᠭᠤ ᠴᠦ ᠭᠡᠰᠡᠨ ᠮᠠᠨ ᠤ ᠦᠪᠦᠷ ᠮᠣᠩᠭᠤᠯ ᠤᠨ ᠬᠡᠭᠡᠷ᠎ᠡ ᠬᠥᠳᠡᠭᠡ ᠪᠠᠷ ᠨᠡᠶᠢᠳᠡᠮ ᠬᠠᠷᠠᠭᠳᠠᠳᠠᠭ ᠰᠢᠪᠠᠭᠤ᠃ ᠲᠡᠷᠡ ᠵᠢᠪ ᠵᠢᠭᠠᠬᠠᠨ ᠪᠡᠶ᠎ᠡ᠂ ᠣᠬᠤᠷ ᠬᠠᠷ᠎ᠠ ᠡᠪᠡᠷ ᠬᠤᠰᠢᠭᠤ᠂ ᠪᠣᠷᠣ ᠥᠳᠥ ᠵᠢᠭᠦᠷ ᠲᠠᠢ᠂ ᠨᠢᠰᠦᠯᠭᠡ ᠨᠢ ᠬᠥᠩᠭᠡᠨ ᠭᠠᠪᠰᠢᠭᠠᠢ ᠴᠦ ᠪᠢᠰᠢ᠂ ᠲᠣᠯᠤᠭᠠᠢ  ᠪᠠᠨ  ᠡᠷᠭᠦᠰᠬᠢᠨ ᠠᠯᠳᠠ ᠠᠯᠳᠠ ᠪᠠᠷ ᠬᠦᠴᠦ ᠪᠠᠨ ᠰᠡᠯᠪᠢᠨ ᠨᠢᠰᠴᠦ ᠯᠠ ᠪᠠᠶᠢᠳᠠᠭ᠃       ᠬᠥᠬᠡᠬᠤᠲᠠ ᠳᠤ ᠪᠣᠯᠵᠣᠮᠣᠷ ᠱᠠᠭᠠᠵᠠᠭᠠᠢ ᠠᠷᠪᠢᠨ᠃ ᠭᠤᠣᠯ ᠵᠡᠭᠡᠯᠢ᠂ ᠭᠠᠳᠠᠨ᠎ᠠ ᠲᠣᠭᠤᠷᠢᠭ᠂ ᠠᠰᠠᠷ ᠪᠠᠷᠢᠯᠭ᠎ᠠ ᠶᠢᠨ ᠥᠨᠴᠥᠭ ᠰᠡᠵᠢᠭᠦᠷ᠂ ᠲᠠᠷᠢᠮᠠᠯ ᠮᠣᠳᠣᠳ ᠤᠨ ᠡᠰᠢ ᠨᠠᠮᠠᠭᠠᠨ ᠳᠡᠭᠡᠷ᠎ᠡ᠂ ᠡᠵᠡᠭᠦᠢ ᠪᠠᠭᠤᠷᠢ ᠰᠠᠭᠤᠷᠢᠨ ᠁ ᠵᠦᠩᠳᠡᠭᠡᠨ ᠯᠠ ᠬᠠᠷᠠᠭᠳᠠᠨ᠎ᠠ᠃ ᠪᠣᠯᠵᠣᠮᠣᠷ ᠱᠠᠭᠠᠵᠠᠭᠠᠢ ᠬᠡᠬᠦ ᠡᠨᠡ ᠬᠤᠶᠠᠷ ᠵᠢᠭᠦᠷᠲᠡᠨ ᠭᠡᠷᠰᠡᠭ ᠭᠡᠵᠤ ᠬᠡᠯᠡᠬᠦ ᠶᠤᠮ ᠦᠦ᠂ ᠡᠰᠡᠭᠦᠯ᠎ᠡ ᠬᠥᠮᠥᠨ ᠠᠮᠢᠲᠠᠨ ᠢ ᠳᠠᠭᠠᠭᠠᠳ ᠠᠮᠢᠳᠤᠷᠠᠪᠠᠯ ᠢᠳᠡᠬᠦ ᠶᠠᠭᠤᠮ᠎ᠠ ᠣᠯᠳᠠᠨ᠎ᠠ᠂ ᠥᠯᠪᠡᠷᠴᠦ ᠦᠬᠦᠬᠦ ᠪᠠᠷ ᠦᠭᠡᠢ ᠭᠡᠵᠤ ᠪᠤᠳᠤᠳᠠᠭ ᠪᠣᠯᠣᠯᠲᠠᠢ᠃ ᠱᠠᠭᠠᠵᠠᠭᠠᠢ ᠨᠢ ᠪᠣᠯ ᠪᠡᠶ᠎ᠡ ᠪᠠᠷ ᠲᠣᠮᠣ ᠪᠣᠯᠬᠤᠷ ᠡᠭᠦᠳᠡ ᠴᠣᠩᠬᠤ ᠲᠠᠢ ᠣᠶᠢᠷᠠᠲᠤᠳᠠᠭ ᠦᠭᠡᠢ᠂ ᠨᠠᠮᠬᠠᠨ ᠠᠰᠠᠷ ᠤᠨ ᠣᠷᠣᠢ᠂ ᠠᠭᠤᠵᠢᠭᠤ ᠲᠠᠯᠪᠢᠭᠤ ᠢᠯᠡ ᠭᠠᠵᠠᠷ᠂ ᠮᠣᠳᠣᠳ ᠤᠨ ᠨᠠᠮᠠᠭ᠎ᠠ ᠳᠠᠮᠵᠢᠨ ᠬᠦᠯᠬᠦᠵᠦ ᠪᠠᠶᠢᠳᠠᠭ᠃ ᠪᠣᠯᠵᠣᠮᠣᠷ ᠨᠢ ᠪᠣᠯ ᠠᠰᠠᠷ ᠤᠨ ᠴᠣᠩᠬᠤᠨ ᠲᠠᠶᠢᠵᠠ᠂ ᠬᠤᠭ ᠰᠠᠪᠠᠯᠠᠬᠤ ᠬᠠᠶᠢᠷᠴᠠᠭ᠂ ᠲᠠᠷᠢᠮᠠᠯ᠂ ᠵᠠᠰᠠᠮᠠᠯ ᠵᠢᠭᠳᠡᠯᠡᠭᠰᠡᠨ ᠮᠣᠳᠣᠳ᠂ ᠰᠤᠯᠠ ᠡᠪᠡᠰᠤᠨ ᠳᠤᠮᠳᠠᠭᠤᠷ ᠴᠦ ᠰᠦᠯᠵᠢᠨ ᠫᠦᠷᠴᠢᠬᠢᠨᠡᠵᠤ ᠪᠠᠶᠢᠳᠠᠭ᠃     ᠬᠥᠬᠡᠬᠤᠲᠠ ᠶᠢᠨ ᠠᠯᠢ ᠬᠤᠷᠢᠶᠠᠯᠠᠯ ᠳᠤ ᠴᠦ ᠪᠣᠯᠵᠣᠮᠣᠷ ᠢᠶᠠᠷ ᠲᠤᠲᠠᠬᠤ ᠦᠭᠡᠢ᠃ ᠮᠢᠨᠤ ᠰᠠᠭᠤᠵᠤ ᠪᠣᠢ ᠠᠰᠠᠷ ᠤᠨ ᠳᠤᠮᠳᠠᠭᠤᠷ ᠦᠷᠭᠦᠯᠵᠢ ᠯᠠ ᠨᠢᠭᠡ ᠰᠦᠷᠦᠭ ᠭᠡᠵᠤ ᠬᠡᠯᠡᠬᠦ ᠶᠤᠮ ᠦᠦ᠂ ᠬᠤᠷᠢ ᠭᠤᠴᠢᠭᠠᠳ ᠪᠣᠷᠣ ᠪᠣᠯᠵᠣᠮᠣᠷ ᠠᠮᠢᠳᠤᠷᠠᠵᠤ ᠪᠣᠢ ᠰᠢᠭ᠋᠃ ᠣᠣᠯ ᠨᠢ ᠮᠢᠨᠤ ᠰᠠᠭᠤᠳᠠᠭ ᠨᠢᠭᠡᠳᠦᠭᠡᠷ ᠠᠰᠠᠷ ᠤᠨ ᠡᠮᠦᠨ᠎ᠡ ᠬᠤᠭ ᠰᠠᠪᠠᠯᠠᠬᠤ ᠬᠤᠶᠠᠷ ᠲᠣᠮᠦ ᠨᠣᠭᠤᠭᠠᠨ ᠬᠠᠶᠢᠷᠴᠠᠭ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠭᠷᠢ ᠭᠡᠭᠡᠷᠡᠮᠡᠭᠴᠡ ᠯᠠ ᠠᠷᠪᠠᠭᠠᠳ ᠪᠣᠯᠵᠣᠮᠣᠷ ᠴᠤᠭᠯᠠᠷᠠᠨ᠂ ᠡᠷᠬᠢᠨ ᠬᠤᠷᠭᠤᠨ ᠨᠢᠭᠡ ᠶᠠᠭᠤᠮ᠎ᠠ ᠲᠣᠩᠰᠢᠵᠤ ᠯᠠ ᠪᠠᠶᠢᠳᠠᠭ ᠶᠤᠮ᠃ ᠠᠰᠠᠷ ᠳᠡᠭᠡᠷ᠎ᠡ ᠠᠴᠠ ᠥᠩᠭᠡᠶᠢᠪᠡᠯ ᠢᠳᠡᠮᠡᠷ ᠶᠠᠭᠤᠮ᠎ᠠ ᠦᠭᠡᠢ ᠴᠦ ᠰᠢᠭ᠂ ᠡᠩᠬᠢᠬᠦ ᠪᠠᠷ ᠪᠢ ᠬᠠᠶᠠ ᠳᠠᠭᠠᠨ ᠴᠠᠶᠢᠯᠭᠠᠭᠰᠠᠨ ᠨᠠᠷᠢᠮᠤ ᠪᠣᠶᠣ ᠲᠣᠲᠣᠷᠭ᠎ᠠ ᠰᠠᠴᠤᠯᠠᠨ ᠥᠭᠳᠡᠭ᠃ ᠨᠠᠮᠠᠶᠢ ᠣᠶᠢᠷᠰᠤᠬᠤ ᠪᠠᠷ ᠫᠦᠷᠬᠢᠨ ᠨᠢᠰᠦᠭᠡᠳ ᠶᠠᠪᠤᠴᠢᠬᠠᠭᠰᠠᠨ ᠪᠣᠷᠣ ᠪᠣᠯᠵᠣᠮᠣᠷ ᠤᠳ ᠮᠢᠨᠢ ᠳᠠᠩᠴᠢ ᠣᠳᠠᠯ ᠦᠭᠡᠢ ᠨᠢᠰᠦᠯᠳᠦᠨ ᠢᠷᠡᠭᠡᠳ ᠶᠠᠭᠠᠷᠠᠣᠬᠠᠨ ᠭᠡᠭᠴᠢ ᠲᠣᠩᠰᠢᠯᠠᠳᠠᠭ᠃        ᠣᠳᠣ ᠲᠦᠷᠦ ᠵᠠᠰᠠᠭ ᠠᠴᠠ ᠬᠤᠲᠠ ᠪᠠᠯᠭᠠᠰᠤᠨ ᠤ ᠠᠷᠢᠭᠤᠨ ᠴᠡᠪᠡᠷᠵᠢᠭᠦᠯᠦᠯᠲᠡ ᠶᠢ ᠠᠬᠢᠭᠤᠯᠤᠨ᠂ ᠬᠠᠶᠠᠬᠤ ᠪᠣᠳᠠᠰ ᠢᠶᠠᠨ ᠢᠯᠭᠠᠨ ᠰᠠᠯᠭᠠᠵᠤ ᠰᠠᠪᠠᠯᠠ︕ ᠬᠡᠮᠡᠨ ᠤᠷᠢᠶᠠᠯᠠᠬᠤ ᠪᠣᠯᠬᠤᠷ ᠮᠠᠨ ᠤ ᠬᠤᠶᠠᠷ ᠰᠠᠭᠤᠭᠠᠯᠢ ᠠᠰᠠᠷ ᠤᠨ  ᠬᠢᠨ ᠤ ᠣᠷᠣᠵᠤ ᠭᠠᠷᠬᠤ ᠶᠡᠭᠡ ᠡᠭᠦᠳᠡᠨ ᠤ ᠣᠶᠢᠷᠠᠯᠴᠠᠭ᠎ᠠ ᠨᠠᠢᠮᠠᠨ ᠲᠣᠮᠦ ᠨᠤᠭᠤᠭᠠᠨ ᠬᠠᠶᠢᠷᠴᠠᠭ ᠵᠡᠷᠭᠡᠴᠡᠭᠦᠯᠦᠨ ᠦᠰᠦᠭ᠂ ᠳᠦᠷᠰᠦ ᠳᠡᠮᠳᠡᠭ ᠢ ᠨᠢ ᠦᠵᠡᠵᠦ᠂ ᠬᠤᠭ ᠢᠶᠠᠨ ᠲᠡᠨᠳᠡ ᠯᠠ ᠬᠠᠶᠠᠬᠤ ᠪᠣᠯᠵᠠᠢ᠃ ᠬᠠᠶᠠ ᠤᠨᠠᠵᠤ ᠲᠤᠰᠤᠭᠰᠠᠨ ᠢ ᠨᠢ ᠲᠣᠩᠰᠢᠬᠤ ᠭᠡᠵᠤ ᠪᠣᠯᠵᠣᠮᠣᠷ ᠤᠳ ᠲᠡᠨᠳᠡ ᠴᠤᠭᠯᠠᠷᠠᠨ᠎ᠠ᠃ ᠡᠨᠡ ᠨᠢ ᠮᠢᠨᠤ ᠡᠭᠦᠳᠡᠨ ᠠᠴᠠ ᠵᠠᠭᠤ ᠢᠯᠡᠭᠦᠦ ᠮᠧᠲᠷ ᠤᠨ ᠵᠠᠢ ᠲᠠᠢ ᠪᠣᠯᠬᠤᠷ ᠪᠢ ᠴᠦ ᠪᠣᠯᠵᠣᠮᠣᠷ ᠢᠶᠠᠨ ᠲᠡᠵᠢᠭᠡᠬᠦ ᠪᠠᠨ ᠪᠣᠯᠢᠵᠠᠢ᠃ ᠠᠱᠢᠭᠦᠢ︕ ᠬᠤᠭ ᠤᠨ ᠬᠠᠶᠢᠷᠴᠠᠭ ᠤᠨ ᠴᠠᠭᠠᠨ᠎ᠠ᠂ ᠲᠠᠷᠢᠮᠠᠯ ᠮᠣᠳᠣᠳ ᠤᠨ ᠳᠤᠮᠳᠠ ᠬᠤᠩᠬᠤᠷ ᠵᠠᠢ ᠪᠠᠶᠢᠵᠤ᠂ ᠡᠨᠡᠭᠦᠷ ᠲᠡᠨᠡᠭᠦᠷ  ᠨᠢ ᠬᠠᠭᠤᠴᠢᠨ ᠰᠠᠪᠠ ᠰᠠᠭᠤᠯᠭ᠎ᠠ ᠬᠥᠭᠯᠡᠷᠡᠵᠦ᠂ ᠥᠷᠥᠪᠴᠢᠬᠡᠨ ᠰᠡᠳᠬᠢᠯ ᠲᠠᠢ ᠰᠠᠭᠠᠬᠠᠯᠲᠠ ᠶᠢᠨ ᠬᠢᠨ ᠦᠯᠡᠳᠡᠵᠦ ᠲᠤᠰᠤᠭᠰᠠᠨ ᠬᠤᠭᠤᠯᠠ ᠪᠣᠳᠠᠭ᠎ᠠ ᠪᠠᠨ ᠣᠷᠬᠢᠳᠠᠭ ᠪᠠᠶᠢᠪᠠ᠃ ᠡᠨᠡ ᠨᠢ ᠲᠡᠨᠦᠮᠡᠯ ᠪᠠᠭᠠᠯ᠂ ᠨᠣᠬᠠᠢ᠂ ᠱᠠᠭᠠᠵᠠᠭᠠᠢ ᠪᠣᠯᠵᠣᠮᠣᠷ ᠤᠳ ᠲᠤ ᠳᠠᠶᠢᠯᠠᠯᠭ᠎ᠠ ᠰᠢᠳᠬᠠᠨ ᠶᠠᠭᠤᠮ᠎ᠠ ᠪᠣᠯᠳᠠᠭ ᠪᠠᠶᠢᠵᠠᠢ᠃ ᠭᠡᠲᠡᠯ᠎ᠡ ᠨᠢᠭᠡ ᠡᠳᠦᠷ ᠳᠥᠷᠪᠡ ᠲᠠᠪᠤᠨ ᠭᠤᠳᠣᠮᠵᠢ ᠴᠡᠪᠡᠷᠯᠡᠭᠴᠢ ᠬᠦᠷᠴᠦ ᠢᠷᠡᠭᠡᠳ ᠣᠰᠣ᠂ ᠬᠤᠭᠤᠯᠠ ᠪᠣᠳᠠᠭ᠎ᠠ ᠤᠷᠬᠢᠳᠠᠭ ᠰᠠᠪᠠ ᠰᠠᠭᠤᠯᠭ᠎ᠠ ᠶᠢ ᠨᠢ ᠬᠤᠪᠬᠤ ᠴᠡᠪᠡᠷᠯᠡᠭᠡᠳ ᠠᠷᠢᠯᠴᠢᠬᠠᠪᠠ᠃ ᠬᠥᠭᠡᠷᠦᠬᠦᠢ︕ ᠭᠤᠷᠠᠩᠳᠠᠭᠰᠠᠨ᠂ ᠬᠠᠶᠠᠭᠳᠠᠮᠠᠯ ᠪᠠᠭᠠᠯ ᠨᠣᠬᠠᠢ᠂ ᠥᠯᠥᠨ ᠪᠣᠯᠵᠣᠮᠣᠷ ᠤᠳ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠴᠢᠳᠠᠳᠠᠭ ᠰᠠᠨ ᠪᠣᠯ ᠱᠤᠷᠬᠢᠷᠡᠳᠡᠯ᠎ᠡ ᠤᠬᠢᠯᠠᠬᠤ ᠪᠠᠶᠢᠭᠰᠠᠨ ᠳ᠋ᠠ᠃          ᠲᠡᠭᠡᠭᠡᠳ ᠪᠢ ᠴᠦ ᠵᠣᠪᠠᠯ᠎ᠠ᠃ ᠭᠡᠪᠡᠴᠦ ᠶᠠᠮᠠᠷ ᠠᠷᠭ᠎ᠠ ᠪᠠᠶᠢᠬᠤ ᠪᠣᠢ︖ ᠨᠢᠭᠡ ᠡᠳᠦᠷ᠂ ᠮᠢᠨᠤ ᠠᠰᠠᠷ ᠤᠨ ᠡᠮᠦᠨ᠎ᠡ᠂ ᠲᠣᠭᠤᠭᠠᠨ ᠭᠡᠷ ᠲᠠᠢ ᠠᠰᠯᠠᠵᠤ ᠪᠠᠶᠢᠬᠤ᠂ ᠬᠠᠶᠢᠯᠠᠰᠤᠨ ᠮᠣᠳᠣᠨ ᠤ ᠣᠷᠣᠢ ᠳᠤ ᠭᠡᠳᠦᠨ ᠪᠣᠯᠵᠣᠮᠣᠷ ᠰᠠᠭᠤᠵᠤ ᠬᠠᠷᠠᠭᠳᠠᠯ᠎ᠠ᠃ ᠪᠢ ᠰᠡᠭᠡᠰᠬᠢᠨ ᠭᠤᠮ ᠰᠠᠪᠠ ᠣᠯᠵᠤ ᠳᠤᠲᠤᠷᠭᠠᠨ ᠰᠠᠪᠠᠨ ᠠᠴᠠ ᠠᠳᠬᠤ ᠪᠣᠳᠠᠭ᠎ᠠ ᠬᠤᠳᠬᠤᠭᠠᠳ᠂ ᠠᠰᠠᠷ ᠤᠨ ᠴᠣᠩᠬᠤᠨ ᠤ ᠬᠤᠶᠠᠷ ᠳᠦᠷᠪᠡᠯᠵᠢᠨ ᠮᠧᠲᠷ  ᠤᠨ ᠲᠠᠶᠢᠵᠠᠨ ᠳᠡᠭᠡᠷ᠎ᠡ ᠰᠠᠴᠤᠭᠠᠳ ᠪᠣᠴᠠᠨ ᠣᠷᠣᠵᠤ᠂ ᠬᠥᠬᠡ ᠴᠠᠢ ᠪᠠᠨ ᠬᠥᠯᠥᠷᠡᠲᠡᠯ᠎ᠡ ᠤᠤᠭᠤᠨ ᠥᠷᠯᠥᠭᠡᠨ ᠬᠤᠭᠤᠯᠠ ᠪᠠᠨ ᠢᠳᠡᠴᠢᠬᠡᠭᠡᠳ᠂ ᠠᠶᠠᠭ᠎ᠠ ᠰᠠᠪᠬ᠎ᠠ ᠪᠠᠨ ᠬᠤᠷᠢᠶᠠᠬᠤ ᠶᠢᠨ ᠳᠠᠭᠠᠤ ᠴᠣᠩᠬᠤ ᠥᠩᠭᠡᠶᠢᠨ ᠦᠵᠡᠪᠡᠯ ᠬᠥᠭᠡᠷᠥᠬᠦᠨ ᠪᠣᠯᠵᠣᠮᠣᠷ ᠤᠳ ᠢᠷᠡᠴᠢᠬᠡᠵᠦ᠂ ᠶᠠᠭᠠᠷᠠᠤ ᠰᠠᠨᠳᠤᠷᠠᠤ ᠪᠣᠯᠪᠠᠴᠤ ᠰᠡᠷᠡᠮᠵᠢᠲᠡᠢ ᠲᠣᠩᠰᠢᠵᠠᠭᠠᠵᠤ ᠪᠠᠶᠢᠯ᠎ᠠ᠃          ᠡᠨᠡ ᠤᠳᠠᠭᠠᠨ ᠤ ᠪᠣᠳᠠᠭᠠᠯᠠᠯᠭ᠎ᠠ ᠠᠴᠠ ᠬᠤᠶᠢᠰᠢ ᠥᠷᠯᠥᠭᠡ ᠪᠣᠯᠭᠠᠨ ᠮᠢᠨᠤ ᠪᠣᠰᠬᠤ ᠶᠢᠨ ᠪᠠᠷᠤᠭ ᠢᠶᠠᠷ ᠲᠣᠭᠤᠭᠠᠨ ᠭᠡᠷ ᠤᠨ ᠳᠤᠤᠷᠠᠬᠢ᠂ ᠬᠤᠣᠰ ᠠᠯᠳᠠ ᠥᠨᠳᠥᠷ ᠬᠠᠶᠢᠯᠠᠰᠤᠨ ᠮᠣᠳᠣᠨ ᠤ ᠨᠠᠮᠠᠭᠠᠨ ᠳᠤ ᠪᠣᠯᠵᠣᠮᠣᠷ ᠤᠳ ᠪᠡᠭᠡᠪᠡᠶᠢᠨ ᠰᠠᠭᠤᠵᠠᠭᠠᠬᠤ ᠪᠣᠯᠪᠠ᠃ ᠲᠡᠭᠡᠭᠡᠳ ᠥᠷᠯᠥᠭᠡ ᠪᠣᠯᠭᠠᠨ ᠬᠡᠳᠦᠨ ᠬᠠᠯᠪᠠᠭ᠎ᠠ ᠨᠠᠷᠢᠮᠤ ᠪᠣᠶᠣ ᠳᠤᠳᠤᠷᠭ᠎ᠠ ᠰᠠᠴᠤᠯᠠᠬᠤ ᠠᠵᠢᠯ ᠲᠠᠢ ᠪᠣᠯᠪᠠ᠃ ᠰᠠᠶ᠋ᠢ ᠡᠬᠢᠯᠡᠬᠦ ᠳᠡᠭᠡᠨ ᠬᠤᠶᠠᠷ ᠭᠤᠷᠪᠠᠨ ᠪᠣᠯᠵᠣᠮᠣᠷ ᠯᠠ ᠢᠷᠡᠵᠦ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠳᠡ ᠮᠠᠰᠢ ᠰᠡᠷᠭᠡᠭ ᠮᠥᠷᠲᠡᠭᠡᠨ ᠠᠶᠤᠮᠠᠲᠠᠭᠠᠢ᠂ ᠠᠶᠤᠮᠠᠲᠠᠭᠠᠢ ᠡᠷ᠎ᠡ ᠶᠢ ᠪᠣᠯᠵᠣᠮᠣᠷ ᠤᠨ ᠵᠢᠷᠦᠬᠡ ᠲᠠᠢ ᠭᠡᠵᠤ ᠳᠣᠭᠤᠬᠢᠯᠠᠳᠠᠭ ᠨᠢ ᠨᠡᠬᠡᠷᠡᠨ ᠣᠨᠣᠭᠰᠠᠨ ᠦᠭᠡ᠃ ᠠᠰᠠᠷ ᠤᠨ ᠳᠣᠣᠷᠠᠬᠢ ᠡᠭᠦᠳᠡ ︽ ᠲᠤᠷ︾ ᠭᠡᠬᠦ ᠪᠣᠶᠣ ᠲᠡᠷᠭᠡ ᠮᠣᠲ᠋ᠣᠷ ᠲᠠᠢ ᠬᠥᠮᠥᠰ ᠢᠷᠡᠪᠡᠴᠦ ︽ᠫᠥᠷ︾ ᠭᠡᠳ ᠯᠠ ᠨᠢᠰᠤᠨ ᠣᠳᠣᠨ᠎ᠠ᠃ ᠡᠶᠢᠮᠦ ᠠᠶᠤᠮᠠᠲᠠᠭᠠᠢ ᠪᠣᠯᠬᠤᠷ ᠪᠢ ᠲᠡᠳᠡᠨ ᠢ ᠢᠷᠡᠭᠡ ᠦᠭᠡᠢ ᠪᠠᠶᠢᠬᠤ ᠳᠤᠨᠢ ᠪᠣᠳᠠᠭ᠎ᠠ ᠪᠠᠨ ᠰᠠᠴᠤᠳᠠᠭ᠃ ᠣᠳᠠᠭᠠᠨ ᠠᠵᠢᠭᠯᠠᠭᠰᠠᠭᠠᠷ ᠪᠠᠶᠢᠵᠤ ᠪᠢ ᠲᠡᠳᠡᠨ ᠢ ᠪᠠᠭ᠋ᠠᠨ ᠤᠶᠢᠯᠭᠠᠵᠠᠢ᠃ ᠲᠡᠳᠡ ᠮᠣᠳᠣᠨ ᠨᠠᠮᠠᠭᠠᠨ ᠳᠡᠭᠡᠷ᠎ᠡ ᠪᠠᠨ ᠰᠠᠭᠤᠵᠤ᠂ ᠨᠠᠮᠠᠶᠢ᠂ ᠮᠠᠨ ᠤ ᠲᠣᠭᠤᠭᠠᠨ ᠭᠡᠷ ᠤᠨ ᠴᠣᠩᠬᠤ ᠶᠢ ᠬᠠᠷᠠᠭᠤᠯᠳᠠᠨ  ᠰᠠᠭᠤᠳᠠᠭ ᠶᠤᠮ ᠪᠠᠶᠢᠨ᠎ᠠ᠃ ᠲᠡᠳᠡ ᠲᠠᠩᠴᠢ ᠣᠳᠠᠯ ᠦᠭᠡᠢ ᠳᠡᠭᠡᠷ᠎ᠡ ᠳᠤᠤᠷ᠎ᠠ ᠠᠰᠠᠷ ᠤᠨ ᠴᠣᠩᠬᠤᠨ  ᠲᠠᠶᠢᠵᠠᠨ ᠳᠡᠭᠡᠷ᠎ᠡ ᠢᠷᠡᠴᠢᠬᠡᠭᠡᠳ ᠶᠡᠬᠡᠯ᠎ᠡ ᠲᠣᠮᠤᠭ᠎ᠠ‌‍ᠲ᠋ᠠᠢ ᠥᠤᠪᠡᠶᠢᠨ ᠰᠠᠭᠤᠵᠤ᠂ ᠵᠢᠵᠢᠭ ᠱᠥᠪᠥᠭᠡᠷ ᠲᠣᠯᠣᠭᠠᠢ ᠪᠠᠨ ᠡᠷᠭᠢᠭᠦᠯᠭᠡ ᠲᠠᠢ ᠶᠤᠮ ᠰᠢᠭ᠋ ᠬᠦᠳᠡᠯᠭᠡᠨ ᠰᠡᠷᠡᠮᠵᠢᠲᠡᠶᠢᠬᠡᠨ ᠬᠠᠷᠠᠭᠤᠯᠳᠠᠨ ᠪᠠᠶᠢᠳᠠᠭ᠃ ᠲᠡᠷᠡ ᠦᠶ᠎ᠡ ᠳᠤᠨᠢ ᠴᠤᠩᠬᠤ ᠪᠠᠨ ᠨᠡᠭᠡᠭᠡᠬᠦ ᠪᠣᠶᠣ ᠰᠢᠯ ᠤᠨ ᠳᠤᠲᠤᠷ᠎ᠠ ᠠᠴᠠ ᠬᠠᠷᠠᠪᠠᠯ ᠰᠠᠩᠳᠠ ᠮᠡᠩᠳᠡ ᠨᠢᠰᠦᠨ ᠠᠷᠢᠯᠤᠨ᠎ᠠ᠃ ᠲᠡᠭᠡᠬᠦ ᠪᠠᠷ ᠨᠢ ᠰᠠᠨᠠᠭ᠎ᠠ ᠠᠮᠤᠷ ᠵᠣᠭᠤᠭᠯᠠᠭᠤᠯᠬᠤ ᠪᠠᠷ ᠵᠣᠴᠢᠳ ᠤᠨ ᠥᠷᠥᠭᠡᠨ ᠳᠡᠭᠡᠨ ᠣᠷᠣᠭᠠᠳ ᠴᠠᠢ ᠤᠤᠭᠤᠬᠤ ᠪᠤᠶᠤ ᠨᠣᠮ ᠦᠵᠡᠴᠢᠬᠡᠳᠡᠭ᠃ ᠦᠳᠡ ᠶᠢᠨ ᠬᠤᠭᠤᠯᠠᠨ ᠤ ᠦᠶ᠎ᠡ ᠱᠠᠭᠠᠶᠢᠭᠠᠳ ᠦᠵᠡᠪᠡᠯ ᠰᠠᠴᠤᠭᠰᠠᠨ ᠪᠣᠳᠠᠭ᠎ᠠ ᠶᠢ ᠮᠢᠨᠢ ᠬᠤᠪᠬᠤ ᠴᠣᠬᠢᠴᠢᠬᠠᠭᠰᠠᠨ ᠪᠠᠶᠢᠳᠠᠭ᠃ ᠡᠩᠬᠢᠭᠡᠳ ᠪᠢ ᠬᠡᠷᠰᠢᠭᠦᠯᠵᠤ ᠲᠠᠰᠬᠠᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ ᠭᠡᠷ ᠤᠨ ᠢᠶᠠᠨ ᠲᠡᠷᠭᠡᠲᠡ ᠠᠮᠢᠳᠤ ᠬᠥᠭᠵᠢᠮ — — ᠬᠡᠳᠦᠨ ᠬᠥᠭᠡᠷᠦᠬᠡᠨ ᠪᠣᠯᠵᠣᠮᠣᠷ ᠲᠠᠢ ᠪᠣᠯᠣᠭᠰᠠᠨ ᠡ︕      ᠭᠤᠷᠪᠠᠨ ᠰᠠᠷ᠎ᠠ ᠶᠢᠨ ᠡᠬᠢᠨ ᠪᠣᠯᠴᠢᠬᠠᠯ᠎ᠠ᠃ᠪᠢ ᠳ᠋ᠠᠪᠠᠨ ᠳᠤ ᠶᠠᠪᠤᠬᠤ ᠶᠢᠨ ᠡᠮᠦᠨ᠎ᠡ ᠭᠠᠶᠢᠭᠤᠶᠢᠬᠠᠨ ᠭᠡᠭᠴᠢ ᠪᠤᠳᠠᠭ᠎ᠠ ᠰᠠᠴᠤᠯᠠᠭᠠᠳ ᠰᠡᠳᠬᠢᠯ ᠳᠠᠩ ᠳᠤᠩ ᠲᠠᠢ ᠶᠠᠪᠤᠯ᠎ᠠ᠃ ᠡᠳᠡᠨᠦᠰ ᠮᠠᠨᠢ ᠭᠡᠳᠦᠨ ᠡᠳᠦᠷ ᠬᠡᠢ ᠨᠠᠮᠨᠠᠬᠤ ᠳ᠋ᠠ᠃          ᠪᠣᠳᠣᠭᠠᠳ ᠪᠠᠶᠢᠪᠠᠯ ᠪᠢ ᠡᠷᠲᠡᠨ ᠠᠴᠠ ᠪᠠᠨ ᠪᠣᠯᠵᠣᠮᠣᠷ ᠲᠠᠢ ᠳᠣᠳᠣᠨᠣᠰᠬᠤ ᠬᠤᠪᠢ ᠲᠠᠪᠢᠯᠠᠩ ᠲᠠᠢ ᠪᠣᠢ ᠎ᠠ᠃ ᠬᠡᠦᠬᠡᠳ ᠪᠠᠶᠢᠬᠤ ᠳᠤ ᠮᠢᠨᠤ ᠨᠣᠲᠤᠭ ᠪᠠᠭᠠᠷᠢᠨ ᠪᠠᠶᠠᠨ ᠠᠭᠤᠯᠠ ᠶᠢᠨ ᠡᠪᠦᠯ ᠭᠡᠵᠢ ᠮᠠᠰᠢ ᠬᠥᠢᠲᠡᠨ ᠪᠠᠶᠢᠭᠰᠠᠨ ᠡ︕ ᠢᠳᠡᠷ ᠶᠢᠰᠦ ᠶᠢᠨ ᠬᠥᠢᠲᠡᠨ ᠳᠤ ᠨᠣᠯᠮᠣᠪᠠᠯ ᠰᠢᠯᠦᠰᠦ ᠭᠠᠵᠠᠷ ᠬᠦᠷᠦᠩᠭᠡᠨ ᠬᠥᠯᠳᠡᠴᠢᠬᠡᠳᠡᠭ᠃ ᠨᠢᠳᠦᠨ ᠪᠣᠯᠠᠭ ᠤᠨ ᠡᠬᠢᠨ ᠠᠴᠠ ᠣᠰᠣ ᠬᠤᠳᠬᠤᠬᠤ ᠪᠠᠷ ᠨᠣᠶᠢᠳᠤᠨ ᠭᠠᠷ ᠰᠠᠭᠤᠯᠭᠠᠨ ᠳᠤ ᠬᠦᠷᠦᠩᠭᠡᠨ ᠨᠠᠭᠠᠯᠳᠤᠴᠢᠬᠠᠬᠤ ᠶᠤᠮ᠃ ᠶᠠᠰᠤ ᠶᠠᠩᠬᠢᠨᠠᠮ᠎ᠠ ᠥᠷᠯᠥᠭᠡ ᠮᠠᠯ ᠵᠠᠯᠠᠬᠤ ᠳᠤ ᠰᠢᠭᠤᠷᠭ᠎ᠠ ᠰᠥᠷᠥᠨ ᠵᠢᠳᠬᠦᠯᠡᠬᠦ ᠭᠤᠨᠠᠨ ᠦᠬᠡᠷ ᠡᠪᠡᠷ ᠢᠶᠠᠨ ᠰᠡᠭᠰᠦᠷᠦᠨ ᠬᠥᠶᠥᠳᠡᠭ ᠪᠠᠶᠢᠭᠰᠠᠨ᠃ ᠡᠶᠢᠮᠦ ᠪᠠᠷ ᠢᠶᠠᠨ ᠮᠠᠯᠴᠢᠨ ᠠᠶᠢᠯ ᠤᠨ ᠬᠢᠨ ᠬᠥᠢᠲᠡᠨ ᠣᠷᠣᠬᠤ ᠠᠴᠠ ᠡᠮᠦᠨ᠎ᠡ ᠬᠠᠰᠢᠶ᠎ᠠ ᠰᠠᠷᠠᠪᠴᠢ ᠪᠠᠨ ᠰᠠᠶᠢᠨ ᠪᠠᠬᠢᠯᠡᠳᠡᠭ᠃ ᠨᠠᠪᠴᠢ ᠨᠢ ᠤᠨᠠᠭ᠎ᠠ ᠦᠭᠡᠢ ᠱᠢᠷᠭᠠᠯᠰᠢᠨ ᠤᠯᠠᠶᠢᠭᠰᠠᠨ ᠨᠢᠯᠵᠢᠷᠠᠢ  ᠤᠯᠠᠪᠤᠷ ︵ᠴᠠᠷᠠᠰᠤᠨ ᠮᠣᠳᠣ︶ ᠶᠢ ᠡᠯᠵᠢᠭᠡᠨ ᠲᠡᠷᠭᠡᠨ ᠳᠤ ᠨᠢᠴᠠᠷᠠᠲᠠᠯ᠎ᠠ ᠲᠡᠭᠡᠭᠡᠵᠦ ᠲᠡᠭᠡᠭᠡᠳ ᠵᠣᠪ  ᠵᠤᠵᠠᠭᠠᠨ ᠲᠡᠭᠡᠪᠦᠷᠢᠯᠡᠵᠤ᠂ ᠰᠠᠷᠠᠪᠴᠢ ᠪᠠᠨ ᠯᠦᠪᠬᠢᠮ᠎ᠡ ᠳᠤᠯᠠᠭᠠᠨ ᠪᠣᠯᠭᠠᠳᠠᠭ᠃ ᠡᠩᠬᠢᠪᠡᠯ‌‍ᠴᠠᠰᠤ ᠵᠤᠳ᠂ ᠲᠡᠰᠬᠢᠮ᠎ᠡ ᠬᠦᠢᠲᠡᠨ  ᠳᠤ ᠬᠤᠨᠢ ᠮᠠᠯ ᠪᠡᠭᠡᠷᠡᠵᠦ ᠬᠥᠯᠳᠡᠨ᠎ᠡ ᠭᠡᠰᠡᠨ ᠣᠴᠢᠷ ᠦᠭᠡᠢ᠃ ᠡᠩᠭᠢᠵᠤ ᠵᠤᠵᠠᠭᠠᠯᠠᠨ ᠪᠠᠬᠢᠯᠡᠭᠰᠡᠨ ᠰᠢᠷᠭᠠᠯ ᠪᠣᠷᠣ ᠴᠢᠷᠡᠰᠤᠨ ᠰᠠᠷᠠᠪᠴᠢ ︵ᠫᠧᠩ︶ ᠮᠠᠨᠢ ᠲᠡᠵᠢᠭᠡᠪᠦᠷᠢ ᠮᠠᠯ ᠳᠤ ᠨᠥᠮᠥᠷᠢ ᠪᠣᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠰᠠᠨᠠᠭᠠᠨ ᠳᠤ ᠦᠭᠡᠢ ᠬᠤᠨᠣᠭᠯᠠᠭᠤ ᠵᠣᠴᠢᠳ — — ᠬᠡᠭᠡᠷ᠎ᠡ ᠶᠢᠨ ᠪᠣᠯᠵᠣᠮᠣᠷ ᠤᠨ ᠳᠤᠯᠠᠭᠠᠨ ᠪᠠᠭᠤᠴᠠ᠂ ᠡᠪᠦᠯᠵᠢᠶ᠎ᠡ ᠪᠣᠯᠳᠠᠭ ᠢ ᠠᠵᠢᠭᠯᠠᠵᠤ ᠮᠡᠳᠡᠪᠡ᠃ ᠲᠡᠭᠡᠭᠡᠳ ᠪᠢ ᠶᠢᠰᠦ ᠶᠢᠨ ᠡᠷᠴᠢ ᠴᠢᠩᠭᠠᠷᠠᠵᠤ᠂ ᠰᠠᠯᠬᠢ ᠨᠢᠭᠤᠷ ᠨᠢᠳᠦ ᠦᠭᠡᠢ ᠦᠯᠢᠶᠡᠬᠦ ᠦᠳᠡᠰᠢ ᠪᠠᠷ ᠠᠪᠤ ᠶᠢᠨ ᠢᠶᠠᠨ ᠤᠲᠤᠮᠠᠯ ᠪᠣᠷᠣ ᠬᠤᠨᠢᠨ ᠠᠷᠠᠰᠤᠨ ᠳᠠᠪᠡᠯ ᠢ ᠬᠦᠭᠡᠷᠭᠡᠨ ᠬᠡᠲᠦᠷᠴᠤ᠂ ᠳ᠋ᠢᠶᠠᠨᠪᠠᠷ ᠪᠠᠷᠢᠭᠠᠳ ᠵᠤᠵᠠᠭᠠᠨ ᠵᠤᠯᠠᠭᠰᠠᠨ ᠴᠠᠷᠠᠰᠤᠨ ᠰᠠᠷᠠᠪᠴᠢᠨ ᠳᠤ ᠠᠷᠤᠭ ᠠᠪᠴᠤ ᠬᠥᠷᠦᠭᠡᠳ ᠳᠡᠭᠡᠷ᠎ᠡ ᠨᠢ ᠭᠢᠰᠬᠢᠵᠦ᠂ ᠪᠡᠷᠪᠡᠶᠢᠨ ᠬᠤᠷᠭᠤᠳᠠᠬᠤ ᠪᠣᠯᠵᠣᠮᠣᠷ ᠤᠳ ᠢ ᠨᠡᠩᠵᠢᠪᠡᠯ ᠨᠢᠳᠦ ᠨᠢ ᠲᠤᠳᠤᠶᠢᠨ᠂ ᠲᠤᠲᠠᠭᠠᠬᠤ ᠴᠦ ᠦᠭᠡᠢ ᠣᠯᠳᠠᠳᠠᠭ ᠃ ᠬᠤᠷᠴᠠ ᠭᠡᠷᠡᠯ ᠳᠤ ᠨᠢᠳᠦ ᠨᠢ ᠬᠠᠷᠠᠯᠠᠳᠠᠭ ᠪᠣᠯᠣᠯᠲᠠᠢ᠃ ᠭᠠᠷ ᠢᠶᠠᠨ ᠰᠤᠩᠭᠠᠪᠠᠯ ᠯᠠ ᠨᠢᠭᠡ ᠶᠢ ᠪᠠᠷᠢᠴᠢᠬᠠᠨ᠎ᠠ᠂ ᠨᠢᠭᠡ ᠶᠢ ᠪᠠᠷᠢᠪᠠᠯ ᠨᠢᠭᠡ ᠶᠢ ᠡᠪᠦᠷᠲᠦᠯᠡᠭᠡᠳ᠂ ᠳᠤᠯᠤ ᠨᠠᠢᠮᠠ ᠪᠣᠯᠣᠨ ᠠᠷᠪᠢᠳᠤᠭᠠᠳ ᠢᠷᠡᠬᠦ ᠪᠠᠷ ᠭᠠᠷ ᠰᠤᠩᠭᠠᠨ ᠥᠭᠡᠷ᠎ᠡ ᠨᠢᠭᠡ ᠶᠢ ᠪᠠᠷᠢᠶ᠎ᠠ ᠭᠡᠲᠡᠯ᠎ᠡ ᠪᠠᠭᠲᠠ ᠶᠠᠳᠠᠨ ᠪᠠᠶᠢᠭᠰᠠᠨ ᠪᠣᠯᠵᠣᠮᠣᠷ ᠤᠳ ᠨᠥᠭᠦᠭᠡ ᠬᠠᠨᠴᠤᠢ ᠪᠠᠷ ᠫᠦᠷᠭᠢᠨ ᠨᠢᠰᠦᠭᠡᠳ ᠵᠠᠶᠢᠳᠠᠭᠤ ᠴᠠᠷᠰᠤᠨ᠎ᠠ ᠰᠢᠷᠭᠤᠴᠢᠬᠠᠳᠠᠭ᠃ ᠡᠪᠦᠷ ᠢᠶᠠᠨ ᠲᠡᠮᠲᠡᠷᠢᠨ᠂ ᠣᠯᠵᠠ ᠪᠣᠯᠣᠭᠰᠠᠨ ᠪᠣᠯᠵᠣᠮᠣᠷ ᠢᠶᠠᠨ ᠠᠳᠬᠤᠭᠠᠳ ᠦᠵᠡᠬᠦᠯᠡᠷ ᠲᠡᠶᠢᠴᠢᠯᠡᠵᠦ ᠴᠢᠳᠠᠯ ᠦᠭᠡᠢ ᠮᠡᠯᠲᠡᠭᠡᠨᠡᠵᠦ ᠪᠠᠶᠢᠳᠠᠭ ᠰᠠᠨ᠃ ᠬᠥᠷ ᠪᠠᠶᠠᠷ ᠢᠶᠠᠨ ᠡᠳ᠋ᠯᠡᠴᠢᠬᠡᠭᠡᠳ ᠡᠩᠭᠡᠷ ᠤᠨ ᠲᠣᠪᠴᠢ ᠪᠠᠨ ᠰᠤᠯᠠᠯᠠᠬᠤᠯᠠᠷ  ᠨᠢᠰᠦᠨ ᠭᠠᠷᠤᠯ᠎ᠠ ᠴᠦ ᠰᠠᠷᠠᠪᠴᠢᠨ ᠠᠴᠠ ᠬᠤᠯᠠᠳᠠᠯ ᠦᠭᠡᠢ ᠴᠠᠷᠠᠰᠤᠨ ᠨᠠᠪᠴᠢᠨ ᠳᠤᠮᠳᠠ ᠪᠠᠨ ᠯᠠ ᠰᠢᠷᠭᠤᠵᠠᠭᠠᠳᠠᠭ ᠪᠢᠯᠡ᠃          ᠪᠢ ᠳ᠋ᠠᠪᠠᠨ ᠳᠤ ᠰᠠᠷ᠎ᠠ ᠢᠯᠡᠭᠦᠦ ᠪᠣᠯᠣᠭᠠᠳ ᠢᠷᠡᠪᠡ᠃ ᠪᠣᠯᠵᠣᠮᠣᠷ ᠢᠶᠠᠨ ᠡᠷᠢᠭᠰᠡᠨ ᠭᠡᠵᠢ᠃ ᠨᠠᠷᠠ ᠰᠢᠩᠭᠡᠭᠰᠡᠨ ᠪᠣᠯᠬᠤᠷ ᠪᠣᠯᠵᠣᠮᠣᠷ ᠤᠨ ᠪᠠᠷ᠎ᠠ ᠠᠯᠠᠭ᠎ᠠ᠃ ᠴᠣᠩᠬᠤᠨ ᠲᠠᠶᠢᠵᠠ ᠢᠯᠤᠮ ᠵᠢᠯᠦᠮ᠃ ᠠᠰᠠᠷ ᠳᠣᠣᠷᠠᠬᠢ ᠬᠠᠶᠢᠯᠠᠰᠤᠨ ᠮᠣᠳᠣᠨ ᠤ ᠨᠠᠮᠠᠭ᠎ᠠ ᠨᠠᠪᠴᠢᠯᠠᠮᠠᠷ ᠨᠠᠪᠴᠢᠯᠠᠮᠠᠷ᠂ ᠵᠢᠵᠢᠭ ᠪᠣᠷᠤ ᠪᠦᠮᠪᠦᠭᠡ ᠰᠠᠭᠤᠵᠠᠢ᠃          ᠥᠷᠯᠥᠭᠡ ᠪᠣᠰᠴᠤ ᠴᠣᠩᠬᠤ ᠪᠠᠨ ᠨᠡᠭᠡᠭᠡᠪᠡᠯ ᠴᠢᠭᠢᠭ ᠤᠨ ᠦᠨᠦᠷ᠂ ᠰᠢᠨ᠎ᠡ ᠨᠤᠭᠤᠭᠠᠨ ᠤ ᠰᠣᠷᠭᠤᠭ ᠦᠨᠦᠷ ᠠᠩᠬᠢᠯᠤᠨ᠎ᠠ᠃ ᠪᠣᠷᠣᠭᠠᠨ ᠣᠷᠣᠭᠰᠠᠨ ᠠᠵᠢ᠃ ᠳᠦᠷᠪᠡᠳᠦᠭᠡᠷ ᠰᠠᠷ᠎ᠠ ᠶᠢᠨ ᠬᠥᠬᠡᠬᠤᠲᠠ ᠭᠡᠵᠢ ᠴᠢᠭᠢᠭᠯᠢᠭ᠂ ᠴᠡᠩᠬᠡᠷ ᠂ ᠶᠠᠭᠤᠮ᠎ᠠ ᠪᠦᠬᠦᠨ ᠰᠡᠷᠭᠦᠨ ᠠᠮᠢᠯᠠᠬᠤ ᠰᠠᠶᠢᠬᠠᠨ ᠦᠶ᠎ᠡ᠃ ᠭᠠᠳᠠᠨ᠎ᠠ ᠰᠡᠷᠢᠭᠦᠨ ᠲᠠᠭᠠᠯᠠᠮᠵᠢᠲᠠᠢ᠃ ᠣᠷᠣᠢ ᠶᠢ ᠨᠢ ᠬᠢᠷᠭᠠᠭᠰᠠᠨ ᠰᠢᠷᠭᠠᠯ ᠪᠣᠷᠣ ᠥᠩᠭᠡ ᠶᠢᠨ ᠲᠠᠷᠢᠮᠠᠯ ᠮᠣᠳᠣᠳ ᠤᠨ ᠡᠩᠭᠡᠷ ᠡᠭᠡᠪᠦᠷ ᠢᠶᠠᠷ ᠬᠠᠶᠠ ᠵᠦᠯᠭᠡᠯᠢᠭ ᠨᠣᠭᠤᠭ᠎ᠠ ᠂ ᠡᠯᠳᠡᠪ ᠡᠪᠡᠰᠦ ᠰᠥᠭᠡᠮ ᠣᠷᠭᠤᠭᠰᠠᠨ ᠪᠠᠶᠢᠯ᠎ᠠ᠃ ᠨᠠᠷᠠᠨ ᠤ ᠢᠯᠡ ᠳᠤ ᠪᠢᠨᠳᠠᠷ ᠲᠣᠭᠤᠷ ᠤᠨ ᠴᠡᠴᠡᠭ ᠡᠰᠢ ᠨᠠᠮᠠᠭ᠎ᠠ ᠪᠠᠨ ᠲᠡᠪᠡᠷᠢᠭᠡᠳ ᠪᠠᠭᠰᠢᠷᠠᠲᠠᠯ᠎ᠠ ᠰᠠᠭᠤᠵᠠᠢ᠃ ᠲᠡᠷᠢᠭᠦᠯᠡᠭᠴᠢ ᠴᠡᠴᠡᠭ ᠢ ᠰᠠᠨᠠᠭᠳᠠᠭᠤᠯᠣᠮ᠎ᠠ᠂ ᠬᠢᠮᠡᠯ ᠴᠡᠴᠡᠭ ᠭᠡᠵᠤ ᠴᠦ ᠪᠣᠳᠣᠭᠳᠠᠭᠤᠯᠤᠮᠠᠷ᠂ ᠨᠠᠪᠴᠢ ᠨᠢ ᠪᠣᠯᠲᠠᠶᠢᠭ᠎ᠠ ᠴᠦ ᠦᠭᠡᠢ ᠪᠠᠶᠢᠬᠤ ᠳᠤ ᠴᠡᠴᠡᠭ ᠨᠢ ᠪᠠᠭᠲᠠᠨ ᠶᠠᠳᠠᠨ ᠪᠣᠶᠢᠵᠢᠵᠠᠢ᠃ᠭᠤᠶᠣ ᠡ᠂ ᠬᠠᠪᠤᠷ ᠣᠷᠤᠶᠢᠲᠡᠵᠤ ᠢᠷᠡᠳᠡᠭ ᠤᠮᠠᠷᠠᠲᠤ ᠣᠷᠣᠨ ᠤ ᠬᠤᠲᠠ ᠶᠢ ᠡᠨᠡᠬᠦ ᠴᠡᠴᠡᠭᠲᠦ ᠮᠣᠳᠣ ᠬᠡᠰᠡᠭ ᠬᠡᠰᠡᠭ ᠭᠦᠨ ᠬᠤᠨᠳᠠᠨ ᠲᠣᠸ᠋ᠽᠠ ᠪᠠᠷ ᠳᠤᠸᠠᠯᠠᠭᠤᠯᠴᠢᠬᠠᠵᠠᠢ᠃        ᠲᠡᠭᠷᠢ ᠬᠡᠶᠢᠪᠡᠷᠭᠡᠨ ᠪᠥᠷᠥᠩᠬᠦᠶᠢᠯᠡᠵᠤ᠂ ᠪᠣᠷᠤᠭ᠎ᠠ ᠠᠯᠳᠠᠭ ᠣᠨᠤᠭ ᠲᠣᠰᠣᠯᠠᠯ᠎ᠠ᠃ ᠱᠠᠯ ᠨᠣᠶᠢᠲᠠᠨ ᠴᠣᠩᠬᠤᠨ ᠲᠠᠶᠢᠵᠠᠨ ᠳᠡᠭᠡᠷ᠎ᠡ ᠳᠣᠲᠣᠷᠭ᠎ᠠ᠂ ᠨᠠᠷᠢᠮᠤ᠂ ᠬᠤᠯᠢᠵᠤ ᠪᠠᠶᠢᠭᠠᠳ ᠰᠠᠴᠤᠯ᠎ᠠ᠃ ᠮᠠᠷᠲᠠᠮᠳᠠᠭᠠᠢ ᠪᠣᠯᠵᠣᠮᠣᠷ ᠤᠳ ᠮᠢᠨᠢ ᠢᠷᠡᠳᠡᠭ ᠪᠣᠯ ᠦᠦ︖︖︕ ᠬᠤᠶᠠᠷ ᠡᠳᠦᠷ ᠤᠨ ᠳᠠᠷᠠᠭ᠎ᠠ ᠦᠵᠡᠬᠦᠯᠡᠷ ᠰᠠᠴᠤᠭᠰᠠᠨ ᠪᠣᠳᠠᠭ᠎ᠠ ᠠᠯᠠᠭ᠎ᠠ ᠪᠣᠯᠴᠢᠬᠠᠵᠤ᠂ ᠮᠠᠰᠢ ᠪᠠᠶᠠᠷᠯᠠᠯ᠎ᠠ᠂ ᠲᠡᠳᠡ ᠨᠠᠮᠠᠶᠢ ᠬᠠᠷᠢᠭᠠᠳ ᠢᠷᠡᠭᠰᠡᠨ ᠢ ᠮᠡᠳᠡᠴᠢᠬᠡᠵᠡᠢ᠂ ᠬᠥᠭᠡᠷᠦᠬᠦᠢ︕ ᠲᠡᠭᠡᠭᠡᠳ ᠯᠠ ᠥᠷᠯᠥᠭᠡ ᠪᠣᠯᠭᠠᠨ ᠴᠠᠢ ᠴᠢᠨᠠᠬᠤ ᠶᠢᠨ ᠪᠠᠷᠤᠭ ᠢᠶᠠᠷ ᠡᠳᠦᠷ ᠠᠴᠠ ᠡᠳᠦᠷ ᠨᠠᠪᠴᠢ ᠪᠠᠨ ᠳᠡᠯᠭᠡᠨ ᠪᠠᠶᠢᠭ᠎ᠠ ᠬᠠᠶᠢᠯᠠᠰᠤᠨ ᠮᠣᠳᠣᠨ ᠤ ᠣᠷᠣᠢ ᠳᠤ᠂ ᠲᠣᠭᠤᠭᠠᠨ ᠭᠡᠷ ᠤᠨ ᠴᠣᠩᠬᠤ ᠶᠢ ᠰᠢᠷᠲᠡᠭᠡᠳ ᠥᠣᠪᠡᠶᠢᠯᠴᠡᠨ ᠰᠠᠭᠤᠨ᠎ᠠ᠃ ᠲᠡᠭᠡᠭᠡᠳ ᠯᠠ ᠴᠣᠩᠬᠤ ᠪᠠᠨ ᠵᠠᠷᠲᠠᠶᠢᠲᠠᠯ᠎ᠠ ᠨᠡᠭᠡᠭᠡᠵᠦ᠂ ᠴᠣᠮᠣ ᠲᠠᠢ ᠪᠣᠳᠠᠭ᠎ᠠ ᠪᠠᠨ ᠱᠣᠸᠠᠷ ᠬᠢᠨ ᠰᠠᠴᠤᠬᠤ ᠪᠠᠷ ᠮᠣᠳᠣᠨ ᠳᠣᠣᠷ᠎ᠠ ᠠᠴᠠ ᠴᠦ ᠭᠡᠰᠡᠨ ᠲᠠᠪᠤ ᠵᠢᠷᠭᠤᠭᠠᠨ ᠪᠣᠯᠵᠣᠮᠣᠷ ᠳᠡᠭᠳᠡᠨ ᠨᠢᠰᠦᠭᠡᠳ ᠮᠣᠳᠣᠨ ᠤ ᠨᠠᠮᠠᠭᠠᠨ ᠳᠤ ᠨᠡᠪᠲᠡᠯᠵᠡᠨ ᠰᠠᠭᠤᠳᠠᠭ᠃ ᠪᠣᠯᠵᠣᠮᠣᠷ ᠤᠳ ᠭᠠᠳᠠᠨ᠎ᠠ ᠠᠴᠠ ᠬᠥᠮᠥᠨ ᠢᠷᠡᠬᠦ ᠳᠤ ᠰᠤᠴᠢᠬᠤ ᠦᠭᠡᠢ᠂ ᠭᠡᠨᠡᠳᠲᠡ ᠠᠰᠠᠷ ᠠᠴᠠ ᠬᠥᠮᠥᠨ ᠭᠠᠷᠪᠠᠯ ᠣᠮ ᠬᠤᠮ ᠦᠭᠡᠢ ᠵᠢᠭᠤᠳᠠᠨ᠎ᠠ᠃ ᠭᠡᠯ᠎ᠡ ᠴᠦ ᠬᠡᠳᠦᠨ ᠮᠢᠨᠦ᠋ᠲ ᠤᠨ ᠳᠠᠷᠠᠭ᠎ᠠ ᠯᠠᠪ ᠢᠷᠡᠨ᠎ᠡ᠃ ᠲᠡᠳᠡ ᠪᠠᠰᠠ ᠶᠡᠭᠡ ᠡᠷᠬᠢᠮᠰᠦᠭ ᠶᠤᠮ᠂ ᠪᠣᠳᠠᠭ᠎ᠠ ᠰᠠᠴᠤᠭᠰᠠᠨ ᠢ ᠦᠵᠡᠯ᠎ᠡ ᠴᠦ ᠦᠬᠦᠨ ᠬᠠᠳᠠᠨ ᠬᠥᠶᠦᠯᠴᠡᠭᠡᠳ ᠢᠷᠡᠬᠦ ᠦᠭᠡᠢ᠃ ᠲᠡᠳᠡ ᠪᠠᠰᠠ ᠶᠡᠭᠡ ᠢᠴᠢᠮᠡᠲᠡᠭᠡᠢ ᠰᠢᠭ ᠶᠤᠮ᠂ ᠴᠤᠩᠬᠤ ᠪᠠᠷ ᠱᠠᠭᠠᠶᠢᠬᠤ ᠨᠠᠮᠠᠶᠢ ᠦᠵᠡᠴᠢᠬᠡᠭᠡᠳ ᠮᠣᠳᠣᠨ ᠤ ᠥᠷᠭᠡᠨ ᠨᠠᠪᠴᠢᠨ ᠤ ᠠᠷᠤ ᠳᠤ ᠳᠠᠯᠳᠠᠯᠠᠴᠢᠬᠠᠳᠠᠭ ᠶᠤᠮ᠃         ᠪᠢ ᠪᠣᠯ ᠭᠤᠣᠯᠳᠠᠭᠤ ᠥᠷᠯᠥᠭᠡ ᠳᠡᠭᠡᠨ ᠪᠤᠳᠠᠭ᠎ᠠ ᠰᠠᠴᠤᠬᠤ ᠠᠴᠠ ᠪᠢᠰᠢ᠂ ᠦᠳᠡ ᠣᠷᠣᠢ ᠦᠭᠳᠡᠭ ᠦᠭᠡᠢ᠃ ᠭᠡᠲᠡᠯ᠎ᠡ ᠡᠳᠡᠨᠦᠰ ᠠᠶᠤᠨ ᠰᠤᠴᠢᠭᠰᠠᠭᠠᠷ ᠪᠠᠶᠢᠭᠠᠳ ᠴᠣᠩᠬᠤᠨ ᠲᠠᠶᠢᠵᠠᠨ ᠤ ᠪᠣᠯᠣᠩ ᠳᠤ ᠡᠳᠦᠢ ᠲᠡᠳᠦᠢ ᠶᠢ ᠨᠢ ᠦᠯᠡᠳᠡᠭᠡᠴᠢᠬᠡᠭᠡᠳ ᠦᠳᠡ ᠤᠶᠢᠷᠠᠳᠤᠬᠤᠯᠠᠷ ᠰᠠᠳᠣᠨ ᠰᠦᠯᠪᠡᠭᠡ ᠲᠠᠢ ᠪᠠᠨ ᠪᠣᠯᠪᠠ ᠦᠦ  ᠂ ᠣᠯᠠᠭᠤᠯᠠ ᠢᠷᠡᠴᠢᠭᠡᠳᠡᠭ ᠃ ᠲᠡᠭᠡᠪᠡᠯ ᠢᠳᠡᠵᠦ ᠬᠦᠷᠬᠦ ᠦᠭᠡᠢ ᠶᠤᠮ ᠴᠢᠨᠢ ᠳ᠋ᠠ᠂ ᠠᠷᠭ᠎ᠠ ᠪᠣᠰᠤ ᠨᠡᠮᠡᠵᠦ ᠥᠭᠳᠡᠭ᠃        ᠡᠬᠡᠨᠡᠷ ᠪᠢᠳᠡ ᠬᠤᠶᠠᠷ ᠥᠷᠯᠥᠭᠡᠨ ᠴᠠᠢ ᠬᠤᠭᠤᠯᠠ ᠪᠠᠨ ᠲᠠᠭᠠᠲᠠᠢ ᠣᠣᠭᠤᠵᠤ ᠢᠳᠡᠬᠦ ᠶᠢᠨ ᠰᠠᠴᠠᠭᠤ ᠥᠭᠡᠷ᠎ᠡ ᠨᠢᠭᠡ ᠵᠦᠢᠯ ᠤᠨ ᠪᠠᠶᠠᠷ ᠪᠠᠭ᠋ᠠᠳᠤᠯ ᠢ ᠣᠯᠬᠤ ᠪᠣᠯᠪᠠ᠃ ᠳᠠᠯᠳᠠ ᠠᠴᠠ ᠬᠠᠷᠠᠭᠤᠯᠳᠠᠵᠤ ᠪᠣᠯᠬᠤ ᠬᠦᠦ ᠶᠢᠨ ᠭᠡᠷ ᠤᠨ ᠴᠣᠩᠬᠤᠨ ᠬᠥᠰᠢᠭᠡ ᠶᠢ ᠰᠡᠮᠡᠭᠡᠷᠬᠡᠨ ᠵᠠᠪᠰᠠᠷᠯᠠᠵᠤ᠂  ᠪᠣᠯᠵᠣᠮᠣᠷ ᠤᠨ ᠢᠶᠠᠨ ᠢᠳᠡᠯᠭᠡ ᠶᠢ ᠦᠵᠡᠨ᠎ᠡ᠃ ᠪᠦᠬᠦᠨ ᠢ ᠢᠳᠡᠴᠢᠭᠡᠪᠡᠯ ᠪᠠᠶᠠᠷᠯᠠᠨ᠎ᠠ᠃ ᠢᠲᠠᠭ ᠲᠠᠲᠠᠭ ᠭᠡᠳ ᠰᠣᠴᠢᠨ ᠪᠣᠯᠬᠢᠭᠠᠳ ᠮᠣᠳᠣᠨ ᠨᠠᠮᠠᠭᠠᠨ ᠳᠡᠭᠡᠷ᠎ᠡ ᠪᠠᠨ ᠪᠡᠭᠡᠪᠡᠶᠢᠨ ᠬᠦᠯᠢᠶᠡᠪᠡᠯ ᠳᠣᠭᠤᠬᠢᠯᠠᠨ᠎ᠠ᠃ ᠪᠣᠯᠵᠣᠮᠣᠷ ᠢ ᠳᠣᠳᠣᠨᠣᠴᠢᠯᠠᠬᠤ ᠨᠢ ᠪᠠᠭᠠᠯ᠂ ᠮᠤᠤᠷ ᠢ ᠲᠡᠵᠢᠭᠡᠭᠰᠡᠨ ᠠᠴᠠ ᠠᠮᠠᠷ᠂ ᠰᠢᠭᠡᠯᠭᠡᠨ ᠪᠠᠭᠠᠯᠭᠠᠬᠤ ᠶᠢᠨ ᠤᠴᠢᠷ ᠦᠭᠡᠢ᠂ ᠨᠠᠷᠠ ᠰᠠᠯᠬᠢ ᠦᠵᠡᠭᠦᠯᠬᠦ ᠶᠠᠷᠰᠢᠭ ᠦᠭᠡᠢ᠂ ᠭᠠᠳᠠᠭᠰᠢ ᠭᠠᠷᠪᠠᠯ ᠳᠠᠭᠠᠭᠤᠯᠬᠤ ᠪᠣᠶᠣ ᠬᠥᠮᠥᠨ ᠳᠤ ᠨᠠᠶᠢᠳᠠᠬᠤ ᠶᠢᠨ ᠤᠴᠢᠷ ᠦᠭᠡᠢ᠃ ᠥᠲᠡᠯᠦᠨ ᠮᠣᠨᠣᠬᠤ ᠳᠤᠨᠢ ᠠᠰᠠᠷᠠᠬᠤ ᠣᠷᠬᠢᠬᠤ ᠶᠢᠨ ᠵᠣᠪᠠᠨᠢᠯ ᠦᠭᠡᠢ᠃ ᠠᠵᠤ ᠠᠬᠤᠢ ᠶᠢᠨ ᠲᠠᠯ᠎ᠠ ᠪᠠᠷ ᠠᠪᠴᠤ ᠬᠡᠯᠡᠪᠡᠯ ᠠᠷᠪᠠᠭᠠᠳ ᠯᠠ ᠪᠣᠯᠵᠣᠮᠣᠷ ᠢ ᠨᠢᠭᠡ ᠵᠢᠯ ᠲᠡᠵᠢᠭᠡᠯ᠎ᠡ ᠴᠦ ᠠᠬ᠎ᠠ ᠳᠠᠭᠦᠦ ᠨᠠᠷ ᠲᠠᠢ ᠪᠠᠨ ᠨᠠᠶᠢᠷᠯᠠᠬᠤ ᠨᠢᠭᠡ ᠰᠢᠷᠡᠭᠡᠨ ᠤ ᠮᠥᠩᠭᠦ ᠣᠷᠣᠬᠤ ᠦᠭᠡᠢ᠂ ᠨᠠᠰᠤ ᠪᠠᠷ ᠨᠢ ᠲᠡᠵᠢᠭᠡᠯ᠎ᠡ ᠴᠦ ᠬᠡᠳᠦᠢ ᠯᠠ ᠬᠠᠶᠢᠷᠴᠠᠭ ᠫᠸᠤ᠋ ᠶᠢᠨ ᠮᠥᠩᠭᠦ ᠶᠤᠮ ᠪᠣᠢ︖         ᠪᠣᠯᠵᠣᠮᠣᠷ ᠢ ᠲᠡᠵᠢᠭᠡᠬᠦ ᠨᠢ᠂ ᠲᠡᠭᠦᠨ ᠠᠴᠠ ᠪᠠᠶᠠᠷ ᠪᠠᠭ᠋ᠠᠳᠤᠯ ᠬᠦᠷᠲᠡᠬᠦ ᠨᠢ ᠰᠢᠯᠦᠭ ᠵᠣᠬᠢᠶᠠᠯ ᠪᠢᠴᠢᠬᠦ ᠲᠠᠢ ᠠᠳᠠᠯᠢ᠂ ᠰᠢᠯᠦᠭ ᠵᠣᠬᠢᠶᠠᠯ ᠪᠢᠴᠢᠬᠦ ᠶᠠᠪᠤᠴᠠ ᠶᠢᠨ ᠪᠠᠶᠠᠷ ᠪᠠᠭ᠋ᠠᠳᠤᠯ ᠨᠢ ᠰᠡᠳᠬᠢᠯᠭᠡ ᠮᠢᠨᠢ ᠪᠢᠯᠬᠠᠷᠠᠵᠤ᠂ ᠬᠠᠭᠤᠳᠠᠰᠤ ᠴᠠᠭᠠᠰᠤ ᠪᠠᠨ ᠲᠡᠭᠰᠢᠯᠡᠵᠦ ᠵᠠᠪᠳᠣᠮ᠎ᠠ ᠦᠭᠡᠢ ᠬᠥᠭᠡᠷᠦᠯ ᠨᠢ᠂ ᠭᠤᠶᠣ ᠪᠦᠳᠦᠭᠡᠯ ᠪᠣᠯᠣᠭᠰᠠᠨ ᠭᠡᠵᠤ ᠪᠣᠳᠣᠭᠳᠠᠬᠤ ᠠᠭᠱᠠᠨ ᠤ ᠲᠠᠶᠢᠳᠬᠤᠷᠠᠯ ᠨᠢ᠂ ᠶᠠᠭᠠᠬᠢᠭᠰᠠᠨ ᠴᠦ ᠲᠡᠭᠦᠨ ᠤ ᠣᠯᠵᠣ ᠮᠡᠳᠡᠬᠦ ᠥᠴᠥᠬᠡᠨ ᠬᠠᠷᠠᠮᠵᠢ ᠠᠴᠠ ᠬᠠᠪᠢ ᠦᠭᠡᠢ ᠦᠨ᠎ᠡ ᠲᠠᠢ ᠪᠠᠶᠢᠬ᠎ᠠ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠪᠢ ᠪᠣᠯᠵᠣᠮᠣᠷ ᠢ ᠲᠡᠵᠢᠭᠡᠬᠦ ᠳᠤ ᠲᠡᠳᠡᠨᠦᠰ ᠤᠨ ᠥᠯ ᠳᠠᠷᠤᠬᠤ᠂ ᠴᠠᠳᠬᠤ ᠨᠢ ᠲᠡᠳᠡᠨ ᠤ ᠶᠠᠪᠤᠳᠠᠯ᠂ ᠬᠡᠯᠡᠯᠭᠡᠨ ᠦᠭᠡᠢ ᠴᠠᠳᠬᠤ ᠶᠢ ᠨᠢ ᠬᠦᠰᠡᠨ᠎ᠡ᠃ ᠲᠡᠳᠡᠨ ᠤ ᠭᠡᠳᠡᠰᠤ ᠴᠢᠨᠢ ᠬᠡᠳᠦᠬᠡᠨ ᠳᠤᠳᠤᠷᠭ᠎ᠠ ᠣᠷᠣᠪᠠᠯ ᠳᠦᠭᠦᠷᠴᠢᠬᠡᠨ᠎ᠡ᠂ ᠬᠡᠳᠦᠷᠲᠡᠯ᠎ᠡ ᠢᠳᠡᠭᠡᠳ ᠬᠡᠳᠡᠰᠤ ᠪᠠᠨ ᠠᠭᠰᠠᠶᠢᠯᠭᠠᠬᠤ ᠦᠭᠡᠢ ᠪᠢᠵᠡ ᠭᠡᠵᠤ ᠵᠣᠪᠠᠨ᠎ᠠ᠃ ᠦᠷᠭᠦᠯᠵᠢ ᠶᠢᠨ ᠬᠦᠨᠡᠰᠦ ᠡᠪᠡᠰᠤᠨ ᠦᠷ᠎ᠡ ᠳᠡᠭᠡᠨ ᠳᠤᠷ᠎ᠠ ᠠᠯᠳᠠᠷᠠᠬᠤ ᠦᠭᠡᠢ ᠪᠢᠵᠡ ᠭᠡᠵᠤ ᠴᠦ ᠰᠠᠨᠠᠨ᠎ᠠ᠃ ᠪᠢ ᠲᠡᠳᠡᠨ ᠤ ᠬᠠᠷᠠᠪᠲᠤᠷ ᠬᠤᠰᠢᠭᠤ᠂ ᠪᠣᠷᠣ ᠲᠣᠯᠣᠭᠠᠢ ᠪᠠᠨ ᠰᠤᠩᠭᠠᠰᠬᠢᠨ ᠮᠣᠳᠣᠨ ᠤ ᠨᠠᠮᠠᠭ᠎ᠠ ᠶᠢ ᠮᠢᠳᠠᠯᠵᠠᠭᠤᠯᠤᠨ᠂ ᠨᠠᠪᠴᠢᠰ ᠢ ᠰᠦᠯᠵᠢᠨ᠂ ᠰᠡᠷᠡᠮᠵᠢᠲᠡᠢ ᠬᠠᠷᠠᠭᠤᠯᠳᠠᠬᠤ ᠣᠷᠠᠨ ᠭᠡᠭᠡᠮᠰᠦᠭ ᠦᠢᠯᠡ ᠶᠢ ᠨᠢ ᠪᠠᠭ᠋ᠠᠷᠬᠠᠨ᠎ᠠ᠃          ᠣᠳᠣ ᠪᠢ ᠵᠣᠴᠢᠳ ᠤᠨ ᠥᠷᠥᠭᠡᠨ ᠤ ᠴᠣᠩᠬᠤ ᠪᠠᠷ ᠪᠤᠳᠠᠭ᠎ᠠ ᠰᠠᠴᠤᠯᠠᠬᠤ ᠪᠣᠯᠪᠠ᠃ ᠠᠰᠠᠷ ᠤᠨ ᠡᠮᠦᠨ᠎ᠡ ᠨᠢᠭᠡ ᠬᠤᠶᠠᠷ ᠲᠡᠷᠭᠡ ᠵᠣᠭᠰᠤᠪᠠᠴᠤ ᠢᠯᠡ ᠵᠠᠢ ᠪᠠᠶᠢᠨ᠎ᠠ᠃ ᠨᠢᠭᠡ ᠥᠷᠯᠦᠭᠡ ᠵᠠᠭᠤ ᠭᠠᠷᠤᠢ ᠪᠣᠯᠵᠣᠮᠤᠷ ᠬᠦᠯᠭᠡᠯᠵᠢᠵᠦ ᠪᠠᠶᠢᠯ᠎ᠠ᠂ ᠰᠣᠴᠢᠭᠰᠠᠨ ᠭᠡᠵᠢ᠃ ᠪᠢ ᠴᠢᠨᠢ ᠣᠳᠣ ᠬᠦᠬᠡᠬᠤᠲᠠ ᠶᠢᠨ ᠪᠦᠬᠦ ᠪᠣᠯᠵᠣᠮᠤᠷ ᠢ ᠲᠡᠵᠢᠭᠡᠬᠦ ᠪᠣᠯᠵᠦ ᠪᠠᠶᠢᠨ᠎ᠠ ᠦᠦ︖          ᠪᠣᠷᠣ ᠪᠣᠯᠵᠣᠮᠣᠷ ᠤᠳ ᠬᠤᠲᠠ ᠶᠢᠨ ᠬᠥᠮᠥᠰ ᠢ ᠢᠲᠡᠭᠡᠳᠡᠭ ᠦᠭᠡᠢ ᠪᠣᠯᠣᠯᠲᠠᠢ᠃ ᠪᠢ ᠬᠡᠦᠬᠡᠳ ᠨᠠᠰᠤᠨ ᠳᠠᠭᠠᠨ ᠰᠢᠪᠠᠷ ᠪᠠᠶᠢᠰᠢᠩ ᠤᠨ ᠭᠤᠷᠪᠠᠯᠵᠢᠨ ᠰᠠᠷᠠᠪᠴᠢᠨ ᠤ ᠵᠦᠢᠮᠡᠯ ᠮᠣᠳᠣᠨ ᠤ ᠵᠠᠪᠰᠠᠷ ᠪᠣᠯᠵᠣᠮᠣᠷ ᠤᠳ ᠤᠩᠭᠠᠰᠤ ᠨᠣᠣᠰᠣ ᠂ ᠨᠢᠷᠠᠢ ᠡᠪᠡᠰᠦ ᠴᠤᠭᠯᠠᠭᠤᠯᠤᠨ ᠡᠭᠦᠷ ᠵᠠᠰᠠᠨ ᠥᠨᠳᠡᠭᠡᠯᠡᠳᠡᠭ ᠢ ᠦᠵᠡᠵᠦ ᠪᠠᠶᠢᠭᠰᠠᠨ ᠯᠠ ᠳ᠋ᠠ᠃ ᠡᠬᠡ ᠪᠠᠨ ᠢᠷᠡᠬᠦ ᠪᠠᠷ ᠲᠣᠮᠣ ᠰᠢᠷ᠎ᠠ ᠵᠠᠪᠠᠵᠢ ᠲᠠᠢ ᠠᠩᠭᠠᠬᠠᠢ ᠨᠢ ᠠᠩᠵᠭᠠᠯᠵᠠᠨ ᠥᠨᠳᠡᠯᠵᠡᠳᠡᠭ ᠢ ᠬᠠᠷᠠᠵᠤ ᠪᠠᠶᠢᠭᠰᠠᠨ ᠯᠠ ᠳ᠋ᠠ᠃ ᠭᠡᠪᠡᠴᠦ ᠪᠢ ᠡᠨᠡ ᠬᠤᠲᠠ ᠶᠢᠨ ᠨᠠᠷᠠᠪᠴᠢ ᠲᠡᠶᠢᠵᠠ᠂ ᠲᠠᠷᠢᠮᠠᠯ ᠮᠣᠳᠣᠳ ᠤᠨ ᠳᠤᠮᠳᠠ ᠠᠴᠠ ᠲᠡᠭᠦᠨ ᠤ ᠥᠨᠳᠡᠭᠡ ᠵᠤᠯᠵᠠᠭ᠎ᠠ ᠶᠢ ᠨᠢᠭᠡ ᠶᠢ ᠴᠦ ᠣᠯᠵᠣ ᠦᠵᠡᠭᠡ ᠦᠭᠡᠢ᠃ ᠲᠡᠶᠢᠮᠦ ᠡ᠂ ᠲᠡᠳᠡᠨ ᠤ ᠬᠥᠮᠥᠨ ᠢ᠂ ᠨᠡᠩ ᠢᠯᠠᠩᠭᠤᠶ᠎ᠠ ᠬᠤᠲᠠ ᠶᠢᠨ ᠬᠥᠮᠥᠰ ᠢ ᠰᠡᠷᠭᠡᠶᠢᠯᠡᠬᠦ ᠨᠢ ᠲᠠᠭᠠᠷᠠᠨ᠎ᠠ᠃ ᠰᠤᠴᠢᠬᠤ ᠨᠢ ᠴᠦ ᠲᠠᠭᠠᠷᠠᠨ᠎ᠠ᠃
 
ᠢᠷᠡᠯᠲᠡ᠄ ᠬᠤᠯᠪᠤᠭ᠎ᠠ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
 
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号